ਦੀਪਾਵਲੀ ਦੀ ਰਾਤ ਹੈ,
ਕੋਈ ਨੂਰ ਦੀ ਬਰਸਾਤ ਹੈ।
ਹਰ ਤਰਫ਼ ਹੈ ਜਲਵਾ ਤੇਰਾ,
ਹਰ ਤਰਫ਼ ਤੇਰੀ ਬਾਤ ਹੈ।
ਖ਼ੁਸ਼ੀਆਂ ਦੇ ਅੰਦਰ ਝੂਮਦੀ,
ਸਾਰੀ ਹੀ ਕਾਇਨਾਤ ਹੈ।
ਹਰ ਤਰਫ਼ ਮੰਗਲਾਚਾਰ ਹੈ,
ਹਰ ਤਰਫ਼ ਤੇਰੀ ਝਾਤ ਹੈ।
ਅੱਜ ਮੱਸਿਆ ਦੀ ਰਾਤ ਨੇ,
ਪੁੰਨਿਆ ਨੂੰ ਕੀਤਾ ਮਾਤ ਹੈ।
ਸਾਰੇ ਹਨੇਰੇ ਜਗ ਪਏ,
ਕਿੰਨੀ ਪਿਆਰੀ ਦਾਤ ਹੈ।
ਕਣ ਕਣ 'ਚ ਤੇਰੀ ਰੌਸ਼ਨੀ,
ਦੀਵਾ ਵੀ ਤੇਰੀ ਜ਼ਾਤ ਹੈ।
ਸ਼ਗਨਾਂ ਦੀ ਵੰਡਦੀ ਸ਼ੀਰਨੀ,
ਅੱਜ ਤਾਰਿਆਂ ਦੀ ਪਰਾਤ ਹੈ।
ਲੱਗੀ ਝੜੀ ਅਨੰਦ ਦੀ,
ਰੰਗਾਂ ਭਰੀ ਇਹ ਰਾਤ ਹੈ।
ਮੱਥਿਆਂ 'ਚ ਦੀਵੇ ਬਾਲ ਦੇ,
ਦਿਲ ਮੰਗਦਾ ਖ਼ੈਰਾਤ ਹੈ।
ਚਿਣਗਾਂ ਮੁਹੱਬਤ ਵਾਲੀਆਂ,
ਵਿਚ ਨੂਰ ਦੀ ਸੌਗ਼ਾਤ ਹੈ।
-0-
ਨੂਰ ਦੀ ਬਰਸਾਤ <h4>* ਡਾ. ਸਰਬਜੀਤ ਕੌਰ ਸੰਧਾਵਾਲੀਆ *</h4>
ਅਜੀਤ ਡੈਸਕ
04-11-2021
