ਬੀਜਿੰਗ/ਮਾਸਕੋ, 19 ਜੂਨ (ਪੀ.ਟੀ.ਆਈ.)-ਚੀਨੀ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਤੇ ਉਨ੍ਹਾਂ ਦੇ ਰੂਸੀ ਹਮਰੁਤਬਾ ਵਲਾਦੀਮੀਰ ਪੁਤਿਨ ਨੇ ਵੀਰਵਾਰ ਨੂੰ ਈਰਾਨ 'ਤੇ ਇਜ਼ਰਾਈਲੀ ਹਮਲਿਆਂ ਦੀ ਸਖ਼ਤ ਨਿੰਦਾ ਕੀਤੀ ਤੇ ਖਾਸ ਕਰਕੇ ਇਜ਼ਰਾਈਲ ਵਲੋਂ ਤੁਰੰਤ ਜੰਗਬੰਦੀ ਤੇ ਨਾਗਰਿਕਾਂ 'ਤੇ ਹਮਲਿਆਂ ਨੂੰ ਖਤਮ ਕਰਨ ਦੀ ਮੰਗ ਕੀਤੀ | ਇਕ ਫ਼ੋਨ ਕਾਲ 'ਚ ਸ਼ੀ ਨੇ ਪੁਤਿਨ ਨਾਲ ਇਜ਼ਰਾਈਲ-ਈਰਾਨ ਟਕਰਾਅ 'ਤੇ ਚਰਚਾ ਕੀਤੀ ਅਤੇ ਕਿਹਾ ਕਿ ਪੱਛਮੀ ਏਸ਼ੀਆ 'ਚ ਟਕਰਾਅ ਨੂੰ ਸੁਲਝਾਉਣ ਲਈ ਜੰਗਬੰਦੀ ਇਕ ਜ਼ਰੂਰੀ ਤਰਜੀਹ ਹੈ ਅਤੇ ਅੰਤਰਰਾਸ਼ਟਰੀ ਵਿਵਾਦਾਂ ਨੂੰ ਹੱਲ ਕਰਨ ਲਈ ਤਾਕਤ ਦੀ ਵਰਤੋਂ ਸਹੀ ਤਰੀਕਾ ਨਹੀਂ ਹੈ | ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਈਰਾਨ ਨੂੰ ਚਿਤਾਵਨੀ ਅਤੇ ਇਜ਼ਰਾਈਲ ਵਲੋਂ ਈਰਾਨ ਦੇ ਸੁਪਰੀਮ ਲੀਡਰ ਅਯਾਤੁੱਲਾ ਅਲੀ ਖਾਮੇਨੇਈ ਨੂੰ ਨਿਸ਼ਾਨਾ ਬਣਾਉਣ ਦੀ ਧਮਕੀ ਦੇ ਵਿਚਕਾਰ, ਖੇਤਰ 'ਚ ਮੌਜੂਦਾ ਟਕਰਾਅ 'ਤੇ ਇਹ ਸ਼ੀ ਦੀ ਪਹਿਲੀ ਟਿੱਪਣੀ ਸੀ |
