ਟਰੰਪ ਵਲੋਂ ਐਚ-1ਬੀ ਵੀਜ਼ਾ ਫੀਸ ਸਾਲਾਨਾ 1 ਲੱਖ ਡਾਲਰ ਕਰਨ ਦਾ ਐਲਾਨ

ਨਿਊਯਾਰਕ/ਵਾਸ਼ਿੰਗਟਨ/ਸਾਨ ਫਰਾਂਸਿਸਕੋ, 20 ਸਤੰਬਰ (ਪੀ.ਟੀ.ਆਈ., ਐਸ ਅਸ਼ੋਕ ਭੌਰਾ)-ਅਮਰੀਕਾ 'ਚ ਭਾਰਤੀ ਪੇਸ਼ੇਵਰਾਂ 'ਤੇ ਉਲਟ ਪ੍ਰਭਾਵ ਪਾਉਣ ਵਾਲੇ ਇਕ ਕਦਮ ਤਹਿਤ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਐਚ-1ਬੀ ਵੀਜ਼ਾ ਫੀਸ ਨੂੰ ਸਾਲਾਨਾ 1 ਲੱਖ ਡਾਲਰ ਤੱਕ ਵਧਾਉਣ ਲਈ ਇਕ ਐਲਾਨਨਾਮੇ 'ਤੇ ਹਸਤਾਖਰ ਕੀਤੇ ਹਨ | ਟਰੰਪ ਨੇ ਕੁਝ ਗੈਰ-ਅਪ੍ਰਵਾਸੀ ਕਾਮਿਆਂ ਦੇ ਦਾਖਲੇ 'ਤੇ ਪਾਬੰਦੀ ਦੇ ਐਲਾਨਨਾਮੇ 'ਤੇ ਹਸਤਾਖਰ ਕਰਦੇ ਹੋਏ ਕਿਹਾ ਕਿ ਐਚ-1ਬੀ ਵੀਜ਼ਾ ਪ੍ਰੋਗਰਾਮ ਦੀ ਗਲਤ ਵਰਤੋਂ ਰਾਸ਼ਟਰੀ ਸੁਰੱਖਿਆ ਲਈ ਖਤਰਾ ਹੈ | ਅਮਰੀਕਾ ਹੁਣ ਐਚ-1ਬੀ ਵੀਜ਼ਾ ਲਈ ਸਾਲਾਨਾ 1 ਲੱਖ ਡਾਲਰ (ਲਗਭਗ 88 ਲੱਖ ਰੁਪਏ) ਦੀ ਅਰਜ਼ੀ ਫੀਸ ਲਵੇਗਾ | ਨਵੀਂ ਫੀਸ 21 ਸਤੰਬਰ ਤੋਂ ਲਾਗੂ ਹੋਵੇਗੀ | ਪਹਿਲਾਂ ਇਕ ਐਚ-1ਬੀ ਵੀਜ਼ਾ ਦੀ ਔਸਤਨ ਕੀਮਤ 5 ਲੱਖ ਰੁਪਏ ਸੀ | ਇਹ ਤਿੰਨ ਸਾਲਾਂ ਲਈ ਵੈਧ ਸੀ ਤੇ ਇਸ ਨੂੰ ਹੋਰ ਤਿੰਨ ਸਾਲਾਂ ਲਈ ਨਵਿਆਇਆ ਜਾ ਸਕਦਾ ਸੀ | ਹੁਣ, ਅਮਰੀਕਾ 'ਚ ਇਕ ਐਚ-1ਬੀ ਵੀਜ਼ਾ ਦੀ ਕੀਮਤ ਛੇ ਸਾਲਾਂ 'ਚ 5.28 ਕਰੋੜ ਰੁਪਏ ਹੋਵੇਗੀ, ਯਾਨੀ ਕਿ ਖਰਚਾ ਕਰੀਬ 50 ਗੁਣਾ ਵਧ ਜਾਵੇਗਾ | ਅਮਰੀਕੀ ਸਰਕਾਰ ਲਾਟਰੀ ਰਾਹੀਂ ਸਾਲਾਨਾ 85000 ਐਚ-1ਬੀ ਵੀਜ਼ਾ ਜਾਰੀ ਕਰਦੀ ਹੈ, ਜੋ ਜ਼ਿਆਦਾਤਰ ਤਕਨੀਕੀ ਨੌਕਰੀਆਂ ਲਈ ਵਰਤੇ ਜਾਂਦੇ ਹਨ | ਸਭ ਤੋਂ ਵੱਧ ਭਾਰਤੀ (72%) ਇਸ ਦਾ ਇਸਤੇਮਾਲ ਕਰਦੇ ਹਨ, ਜੋ ਸਭ ਤੋਂ ਵੱਧ ਉਪਭੋਗਤਾ ਹਨ | ਵਧੀ ਹੋਈ ਵੀਜ਼ਾ ਫੀਸ 3 ਲੱਖ ਤੋਂ ਵੱਧ ਭਾਰਤੀਆਂ ਨੂੰ ਸਿੱਧੇ ਤੌਰ 'ਤੇ ਪ੍ਰਭਾਵਿਤ ਕਰੇਗੀ |