ਗੜ੍ਹਸ਼ੰਕਰ, 31 ਅਗਸਤ (ਧਾਲੀਵਾਲ)- ਪਿਛਲੇ ਦਿਨਾਂ ਤੋਂ ਲਗਾਤਾਰ ਰੁਕ ਰੁਕ ਕੇ ਪੈ ਰਹੇ ਮੀਂਹ ਨਾਲ ਜਿੱਥੇ ਸੂਬੇ ਵਿਚ ਹੜ੍ਹਾਂ ਵਾਲੇ ਹਾਲਾਤ ਬਣੇ ਹੋਏ ਹਨ ਉਥੇ ਗੜ੍ਹਸ਼ੰਕਰ ਖੇਤਰ ਦੇ ਕਈ ਪਿੰਡਾਂ 'ਚ ਵੀ ਪਾਣੀ ਜਮਾਂ ਹੋਣ ਨਾਲ ਹਾਲਾਤ ਹੜ੍ਹਾਂ ਵਰਗੇ ਬਣੇ ਹੋਏ ਹਨ | ਐਤਵਾਰ ਨੂੰ ਤੜਕਸਾਰ ਤੋਂ ਮੀਂਹ ਪੈਣ ਨਾਲ ਹਲਕੇ ਦੇ ਪਿੰਡ ਇਬਰਾਹੀਮਪੁਰ ਬਗਵਾਈਾ, ਖ਼ਾਨਪੁਰ, ਪਾਹਲੇਵਾਲ ਅਤੇ ਸ਼ਹਿਰ ਦੇ ਕਈ ਹਿੱਸਿਆਂ 'ਚ ਹਾਲਾਤ ਵਿਗੜੇ ਹੋਏ ਨਜ਼ਰ ਆਏ | ਪਿੰਡ ਇਬਰਾਹੀਮਪੁਰ/ਬਗਵਾਈਾ ਵਿਖੇ ਹਰ ਵਾਰ ਦੀ ਤਰ੍ਹਾਂ ਗੁਰਦੁਆਰਾ ਸਾਹਿਬ ਨੇੜਲੇ ਘਰਾਂ 'ਚ ਪਾਣੀ ਦਾਖਲ ਹੋਣ ਨਾਲ ਲੋਕਾਂ ਨੂੰ ਭਾਰੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪਿਆ | ਇਸੇ ਤਰ੍ਹਾਂ ਪਿੰਡ ਖ਼ਾਨਪੁਰ ਵਿਖੇ ਪਾਣੀ ਆਉਣ ਨਾਲ ਸਰਕਾਰੀ ਸਕੂਲ ਨੇੜਲੇ ਕਈ ਘਰਾਂ 'ਚ ਪਾਣੀ ਦਾਖਲ ਹੋ ਗਿਆ | ਇਸੇ ਤਰ੍ਹਾਂ ਪਿੰਡ ਪਾਹਲੇਵਾਲ ਦੇ ਨੀਵੇਂ ਘਰ ਅਤੇ ਸਥਾਨਕ ਸ਼ਹਿਰ ਕੁੱਝ ਹਿੱਸਿਆ 'ਚ ਮੀਂਹ ਦਾ ਪਾਣੀ ਰੁਕਣ ਨਾਲ ਜਨਜੀਵਨ ਪ੍ਰਭਾਵਿਤ ਹੋਇਆ | ਇਲਾਕੇ ਵਿਚ ਫ਼ਿਲਹਾਲ ਹਾਲਾਤ ਖ਼ਤਰੇ ਤੋਂ ਬਾਹਰ ਹਨ |
