ਹਲਵਾਰਾ, 17 ਜੂਨ (ਮਨਦੀਪ ਸਿੰਘ ਉੱਭੀ)-ਸੱਯਦ ਕੁਤਬ ਸ਼ਾਹ ਬੁਖਾਰੀ ਲਾਲਾ ਵਾਲੇ ਦੀ ਦਰਗਾਹ ਹਲਵਾਰਾ ਦੇ ਮੁੱਖ ਸੇਵਾਦਾਰ ਝਲਮਣ ਸਿੰਘ ਲੈਬਨਾਨ ਵਾਲਿਆਂ ਨੇ ਜਾਣਕਾਰੀ ਦਿੰਦਿਆ ਦੱਸਿਆ ਪੀਰ ਸਾਹਿਬ ਦਾ ਉਰਸ ਮੁਬਾਰਕ 19 ਤੇ 20 ਜੂਨ ਨੂੰ ਮਨਾਇਆ ਜਾ ਰਿਹਾ ਹੈ | ਪਹਿਲੇ ਦਿਨ 19 ਜੂਨ ਨੂੰ ਚਾਦਰ ਚੜ੍ਹਾਉਣ ਦੀ ਰਸਮ ਉਪਰੰਤ ਰਫੀ ਮੁਹੰਮਦ ਮਲੇਰਕੋਟਲੇ ਵਾਲੇ ਅਤੇ ਅਲੀ ਪੰਜ ਗਰਾਈਆਂ ਵਾਲਿਆਂ ਦੀਆਂ ਕੱਵਾਲ ਪਾਰਟੀਆਂ ਸੂਫੀਆਨ ਕੱਵਾਲ ਪੇਸ਼ ਕਰਨਗੀਆਂ | 20 ਜੂਨ ਨੂੰ ਗਾਇਕੀ ਦਾ ਖੁੱਲ੍ਹਾ ਅਖਾੜਾ ਹੋਵੇਗਾ ਅਤੇ ਬਾਬਾ ਭੀਖਣ ਸ਼ਾਹ ਘੁੜਾਮ ਸਰੀਫ ਦੇ ਗੱਦੀਨਸ਼ੀਨ ਬਾਬਾ ਭੋਲੂ ਸ਼ਾਹ ਮਾਰਫਤੀ ਪ੍ਰਵਚਨ ਕਰਨਗੇ | ਪਿੰਡ ਹਲਵਾਰਾ ਤੋਂ ਹਿਜਰਤ ਕਰਕੇ ਗਏ ਸ਼ਰਧਾਲੂ ਪੰਜ ਹਾੜ ਮੁਤਾਬਕ ਹਰੇਕ ਸਾਲ ਉਰਸ ਮੁਬਾਰਕ ਚੱਕ ਨੰਬਰ 40 ਜ਼ਿਲਾ ਫੈਸਲਾਬਾਦ ਪਾਕਿਸਤਾਨ ਵਿਚ ਪੂਰੀ ਅਕੀਦਤ ਨਾਲ ਮਨਾਉਂਦੇ ਹਨ | ਦੋਵੇਂ ਦਿਨ ਅਤੁੱਟ ਲੰਗਰ ਵਰਤਾਇਆ ਜਾਵੇਗਾ |
