ਬਟਾਲਾ, 22 ਅਕਤੂਬਰ (ਰਾਕੇਸ਼ ਰੇਖੀ)-ਬੀਤੇ ਦਿਨੀਂ ਸੜਕ ਹਾਦਸੇ ਵਿਚ ਗੰਭੀਰ ਜ਼ਖ਼ਮੀ ਹੋਏ 19 ਸਾਲ ਦੇ ਪਾਰਸ ਖੋਸਲਾ ਦੀ ਇਲਾਜ ਦੌਰਾਨ ਹਸਪਤਾਲ ਵਿਚ ਮੌਤ ਹੋ ਗਈ | ਬੀਤੀ 15 ਅਕਤੂਬਰ ਨੂੰ ਹੋਏ ਹਾਦਸੇ ਵਿਚ ਉਹ ਜ਼ਖ਼ਮੀ ਹੋ ਗਿਆ ਸੀ | ਫ਼ਤਹਿਗੜ੍ਹ ਚੂੜੀਆਂ ਦੇ ਰਹਿਣ ਵਾਲੇ ਰਮਨ ਕੁਮਾਰ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ ਕਿ ਉਸ ਦਾ ਸਭ ਤੋਂ ਛੋਟਾ ਬੇਟਾ 19 ਸਾਲ ਦਾ ਪਾਰਸ ਉਰਫ਼ ਰਿਸ਼ੂ 15 ਅਕਤੂਬਰ ਨੂੰ ਸ਼ਾਮ ਕਰੀਬ 6:15 ਵਜੇ ਆਪਣੇ ਦੋਸਤ ਗੁਰਸੇਵਕ ਸਿੰਘ ਨਾਲ ਉਸ ਦੀ ਸਕੂਟੀ ਰਾਹੀਂ ਦੋਵੇਂ ਕਿਸੇ ਕੰਮ ਲਈ ਧਿਆਨਪੁਰ ਗਏ ਸਨ, ਜਦੋਂ ਉਹ ਦੋਵੇਂ ਪਿੰਡ ਬਸੰਤਕੋਟ ਤੋਂ ਚੰਦੂਸੂਜਾ ਜਾ ਰਹੇ ਸਨ ਤਾਂ ਚੰਦੂਸੂਜਾ ਨੇੜੇ ਸਾਹਮਣੇ ਤੋਂ ਮੋਟਰਸਾਈਕਲ 'ਤੇ ਜਸ਼ਨਪ੍ਰੀਤ ਸਿੰਘ ਵਾਸੀ ਅਕਰਪੁਰਾ ਆ ਰਿਹਾ ਸੀ, ਇਸੇ ਦੌਰਾਨ ਹਨੇਰਾ ਹੋਣ ਕਾਰਨ ਪਾਰਸ ਦੀ ਸਕੂਟੀ ਦਾ ਸੜਕ ਵਿਚ ਪਏ ਟੋਏ ਕਾਰਨ ਸੰਤੁਲਨ ਵਿਗੜ ਜਾਣ 'ਤੇ ਦੋਵੇਂ ਦੋ ਪਹੀਆ ਵਾਹਨ ਆਪਸ ਵਿਚ ਟਕਰਾ ਗਏ | ਸੜਕ 'ਤੇ ਡਿੱਗਣ ਕਾਰਨ ਪਾਰਸ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ | ਇਲਾਜ ਲਈ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ | ਇਲਾਜ ਦੌਰਾਨ 6 ਦਿਨ ਜ਼ਿੰਦਗੀ ਤੇ ਮੌਤ ਦੀ ਜੰਗ ਲੜਦਿਆਂ ਉਸ ਦੀ ਮੌਤ ਹੋ ਗਈ | ਪੁਲਿਸ ਨੇ ਇਸ ਸਬੰਧ ਵਿਚ ਬਣਦੀ ਕਾਰਵਾਈ ਕੀਤੀ ਹੈ |
