ਕਮਿਸ਼ਨਰੇਟ ਪੁਲਿਸ ਵਲੋਂ ਨਾਈਜੀਰੀਅਨ ਸਪਲਾਇਰ ਤੇ 2 ਡਿਸਟ੍ਰੀਬਿਊਟਰ ਕਾਬੂ

ਅੰਮਿ੍ਤਸਰ, 17 ਜੂਨ (ਗਗਨਦੀਪ ਸ਼ਰਮਾ)-ਕਮਿਸ਼ਨਰੇਟ ਪੁਲਿਸ ਵਲੋਂ ਨਾਈਜੀਰੀਅਨ ਸਪਲਾਇਰ ਅਤੇ ਅੰਮਿ੍ਤਸਰ ਆਧਾਰਿਤ 2 ਡਿਸਟ੍ਰੀਬਿਊਟਰਾਂ ਨੂੰ ਕਾਬੂ ਕਰਕੇ ਉਨ੍ਹਾਂ ਪਾਸੋਂ ਕਮਰਸ਼ੀਅਲ ਮਿਕਦਾਰ 'ਚ 112 ਗ੍ਰਾਮ ਕੋਕੀਨ ਤੇ .32 ਬੋਰ ਦਾ ਪਿਸਤੌਲ ਬਰਾਮਦ ਕਰਨ ਦੀ ਸਫਲਤਾ ਹਾਸਿਲ ਕੀਤੀ ਗਈ ਹੈ | ਜ਼ਿਲ੍ਹਾ ਪੁਲਿਸ ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਭੁੱਲਰ ਨੇ ਇਹ ਖੁਲਾਸਾ ਅੱਜ ਇੱਥੇ ਪੁਲਿਸ ਲਾਈਨ ਵਿਖੇ ਪੱਤਰਕਾਰ ਸੰਮੇਲਨ ਦੌਰਾਨ ਕੀਤਾ | ਉਨ੍ਹਾਂ ਦੱਸਿਆ ਕਿ ਕੋਲਨਿਜ਼ ਵਾਸੀ ਨਾਈਜੀਰੀਆ ਸਾਲ 2023 ਵਿਚ ਆਪਣੇ ਲੜਕੇ ਦੇ ਡਾਕਟਰੀ ਇਲਾਜ ਲਈ ਭਾਰਤ ਆਇਆ ਸੀ, ਜੋ ਕਿ ਗ਼ੈਰ-ਕਾਨੂੰਨੀ ਤੌਰ 'ਤੇ ਭਾਰਤ ਵਿਚ ਰਿਹਾ | ਉਸ ਸਮੇਂ ਤੋਂ ਉਹ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦੀਆਂ ਗਤੀਵਿਧੀਆਂ 'ਚ ਸ਼ਾਮਿਲ ਹੈ ਅਤੇ ਮੁੱਖ ਤੌਰ 'ਤੇ ਦਿੱਲੀ ਦੇ ਮਹਰੋਲੀ ਤੋਂ ਕੰਮ ਕਰਦਾ ਸੀ | ਉਨ੍ਹਾਂ ਦੱਸਿਆ ਕਿ ਇਸ ਮਾਮਲੇ 'ਚ ਗਿ੍ਫ਼ਤਾਰ ਕੀਤੇ ਡਿਸਟਰੀਬਿਊਟਰਾਂ ਦੀ ਸ਼ਨਾਖ਼ਤ ਇਸ਼ਪ੍ਰੀਤ ਸਿੰਘ ਉਰਫ਼ ਹਰਸ਼ ਵਾਸੀ ਬਸੰਤ ਐਵੀਨਿਊ ਅਤੇ ਅਖਿਲੇਸ਼ ਵਿਜ ਵਾਸੀ ਬਸੰਤ ਐਵੀਨਿਊ ਵਜੋਂ ਹੋਈ ਹੈ |
ਉਨ੍ਹਾਂ ਦੱਸਿਆ ਕਿ ਇਹ ਸਾਰੇ ਆਪਸ ਵਿਚ ਵੱਟਸਐਪ ਰਾਹੀਂ ਤਾਲਮੇਲ ਕਰਕੇ ਕੰਮ ਕਰਦੇ ਸਨ | ਮੁੱਖ ਸਪਲਾਇਰ ਕੋਲਿਨਜ਼ ਹੀ ਸੀ, ਜਿਸਨੇ ਨਸ਼ੀਲੇ ਪਦਾਰਥਾਂ ਦਾ ਸਰੋਤ ਬਣਾਇਆ ਅਤੇ ਉੱਤਰੀ ਭਾਰਤ ਵਿਚ ਆਪਣੇ ਸਥਾਨਕ ਸੰਪਰਕਾਂ ਰਾਹੀਂ ਅੱਗੇ ਵੰਡਿਆ | ਉਨ੍ਹਾਂ ਦੱਸਿਆ ਕਿ ਅਖਿਲੇਸ਼ ਜਾਂ ਤਾਂ ਸਿੱਧੇ ਕੋਲਨਿਜ਼ ਤੋਂ ਖੇਪਾਂ ਪ੍ਰਾਪਤ ਕਰਦਾ ਸੀ ਜਾਂ ਉਨ੍ਹਾਂ ਨੂੰ ਪ੍ਰਾਪਤ ਕਰਨ ਲਈ ਖੁਦ ਜਾਂਦਾ ਸੀ | ਇਹ ਸਿੱਧੇ ਤੌਰ 'ਤੇ ਅਮੀਰ ਘਰਾਣਿਆਂ ਦੇ ਗ੍ਰਾਹਕਾਂ ਦਾ ਨੈੱਟਵਰਕ ਤੇ ਉਨ੍ਹਾਂ ਨੂੰ ਨਿਸ਼ਾਨਾ ਬਣਾ ਕੇ 20,000 ਰੁਪਏ ਤੱਕ ਪ੍ਰਤੀ ਗ੍ਰਾਮ ਕੋਕੀਨ ਵੇਚਦੇ ਸਨ |