ਪੰਚਕੂਲਾ, 18 ਜੂਨ (ਕਪਿਲ)-ਪੰਚਕੂਲਾ ਦੇ ਪਿੰਡ ਗਣੇਸ਼ਪੁਰ ਭੋਰੀਆਂ ਵਿਖੇ 15 ਜੂਨ ਨੂੰ ਸਰਪੰਚ ਦੇ ਅਹੁਦੇ ਲਈ ਉਪ ਚੋਣਾਂ ਹੋਈਆਂ ਸਨ, ਜਿਸ 'ਚ ਉਮੀਦਵਾਰ ਅੰਜੂ ਬਾਲਾ ਨੇ ਜਿੱਤ ਦਰਜ ਕੀਤੀ ਸੀ | ਜਿੱਤ ਤੋਂ ਬਾਅਦ ਪਿੰਡ ਪੱਤਣ ਸਥਿਤ ਅੰਜੂ ਬਾਲਾ ਦੇ ਘਰ ਉੱਤੇ ਜਸ਼ਨ ਮਨਾਇਆ ਜਾ ਰਿਹਾ ਸੀ ਕਿ ਇਸੇ ਦੌਰਾਨ ਇਕ ਨੌਜਵਾਨ ਨੇ ਹਵਾਈ ਫਾਇਰ ਕਰ ਦਿੱਤਾ | ਪੁਲਿਸ ਨੇ ਇਸ ਮਾਮਲੇ 'ਚ ਇਕ ਨਾਬਾਲਗ ਦੇ ਖ਼ਿਲਾਫ਼ ਅਸਲ੍ਹਾ ਐਕਟ ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਥਾਣਾ ਪਿੰਜੌਰ ਦੇ ਇੰਚਾਰਜ ਨੂੰ ਉਨ੍ਹਾਂ ਦੇ ਨਿੱਜੀ ਮੋਬਾਈਲ ਨੰਬਰ 'ਤੇ ਕਿਸੇ ਵਲੋਂ ਇਕ ਵੀਡੀਓ ਭੇਜੀ ਗਈ ਸੀ, ਜਿਸ 'ਚ ਕੁਝ ਲੋਕ ਨੱਚਦੇ ਦਿਖਾਈ ਦੇ ਰਹੇ ਸਨ, ਜਦਕਿ ਇਕ ਨੌਜਵਾਨ ਪਿਸਤੌਲ ਨੂੰ ਅਸਮਾਨ ਵੱਲ ਕਰਕੇ ਫਾਇਰ ਕਰਦਾ ਨਜ਼ਰ ਆ ਰਿਹਾ ਸੀ | ਮਾਮਲੇ ਦੀ ਜਾਂਚ ਦੌਰਾਨ ਪਤਾ ਚੱਲਿਆ ਕਿ ਇਹ ਵੀਡੀਓ 16-17 ਜੂਨ ਦੀ ਦਰਮਿਆਨੀ ਰਾਤ ਨੂੰ ਸਰਪੰਚ ਅੰਜੂ ਬਾਲਾ ਦੀ ਜਿੱਤ ਦੀ ਖੁਸ਼ੀ 'ਚ ਰੱਖੇ ਗਏ ਪ੍ਰੋਗਰਾਮ ਦਾ ਸੀ | ਪ੍ਰੋਗਰਾਮ 'ਚ ਅੰਜੂ ਬਾਲਾ ਦੇ ਪਤੀ ਨਰੇਸ਼ ਕੁਮਾਰ ਵੀ ਮੌਜੂਦ ਸਨ | ਪੁਲਿਸ ਨੇ ਸੂਚਨਾ ਅਤੇ ਵੀਡੀਓ ਦੇ ਆਧਾਰ 'ਤੇ ਪਹਿਲਾਂ ਨਾਬਾਲਗ ਲੜਕੇ ਦੀ ਪਛਾਣ ਕੀਤੀ ਉਪਰੰਤ ਆਈ. ਪੀ. ਸੀ. ਦੀ ਧਾਰਾ 288 ਅਤੇ ਅਸਲ੍ਹਾ ਐਕਟ 1959 ਦੀ ਧਾਰਾ 25 (9) ਦੇ ਤਹਿਤ ਅਪਰਾਧ ਸਾਬਤ ਹੋਣ 'ਤੇ ਪੁਲਿਸ ਵਲੋਂ ਮਾਮਲਾ ਦਰਜ ਕਰ ਲਿਆ ਗਿਆ |
