ਚੰਡੀਗੜ੍ਹ, 18 ਜੂਨ (ਸੰਦੀਪ ਕੁਮਾਰ ਮਾਹਨਾ) ਚੰਡੀਗੜ੍ਹ ਨਗਰ ਨਿਗਮ ਟੀਮ ਵਲੋਂ ਸ਼ਹਿਰ 'ਚ ਕੀਤੀਆਂ ਨਾਜਾਇਜ਼ ਉਸਾਰੀਆਂ ਵਿਰੁੱਧ ਸ਼ੁਰੂ ਕੀਤੀ ਮੁਹਿੰਮ ਦੇ ਤਹਿਤ ਅੱਜ ਸੈਕਟਰ 46 'ਚ ਬਣੇ ਮੰਦਿਰ ਨੂੰ ਢਾਹੁਣ ਪੁੱਜੀ ਸੀ | ਮੰਦਿਰ ਢਾਹੁਣ ਦੀ ਸੂਚਨਾ ਮਿਲਦਿਆਂ ਹੀ ਇਲਾਕਾ ਵਾਸੀ ਸਵੇਰ ਤੋਂ ਹੀ ਸੈਕਟਰ 46ਏ ਸਥਿਤ ਮੰਦਿਰ ਦੇ ਬਾਹਰ ਵੱਡੀ ਗਿਣਤੀ ਵਿਚ ਇਕੱਤਰ ਹੋਣੇ ਸ਼ੁਰੂ ਹੋ ਗਏ ਸਨ | ਇਲਾਕਾ ਵਾਸੀਆਂ ਦੇ ਰੋਹ ਨੂੰ ਦੇਖਦਿਆਂ ਪੁਲਿਸ ਵਲੋਂ ਸੁਰੱਖਿਆ ਦੇ ਪੁਖ਼ਤਾ ਇੰਤਜ਼ਾਮ ਕੀਤੇ ਗਏ ਸਨ | ਇਸੇ ਵਿਚਕਾਰ ਇਲਾਕਾ ਕੌਂਸਲਰ ਗੁਰਪ੍ਰੀਤ ਸਿੰਘ ਗਾਬੀ ਸਮੇਤ ਕਈ ਕਾਂਗਰਸੀ ਅਤੇ ਭਾਜਪਾ ਆਗੂ ਦਵਿੰਦਰ ਬਬਲਾ ਵੀ ਮਦਦ ਲਈ ਮੌਕੇ 'ਤੇ ਪੁੱਜ ਗਏ ਅਤੇ ਨਿਗਮ ਅਧਿਕਾਰੀਆਂ ਨਾਲ ਗੱਲਬਾਤ ਕਰ ਉਕਤ ਕਾਰਵਾਈ ਨੂੰ ਅੰਜ਼ਾਮ ਦੇਣ ਤੋਂ ਰੋਕਿਆ | ਜਿਸ ਤੋਂ ਮਗਰੋਂ ਨਿਗਮ ਅਧਿਕਾਰੀ ਬਿਨ੍ਹਾਂ ਕਾਰਵਾਈ ਕੀਤੀਆਂ ਬੇਰੰਗ ਪਰਤ ਗਏ | ਨਿਗਮ ਅਧਿਕਾਰੀਆਂ ਦੇ ਜਾਣ ਤੋਂ ਬਾਅਦ ਮੌਕੇ 'ਤੇ ਮੌਜੂਦ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ, ਕਿਉਂ ਜੋ ਲੋਕਾਂ ਨੂੰ ਡਰ ਸੀ ਕਿ ਨਿਗਮ ਵਲੋਂ ਅੱਜ ਮੰਦਿਰ ਨੂੰ ਢਾਹ ਦਿੱਤਾ ਜਾਵੇਗਾ, ਇਸੇ ਦੇ ਚੱਲਦਿਆਂ ਉਹ ਆਖ਼ਰੀ ਸਮੇਂ ਤੱਕ ਮੰਦਿਰ ਦੀ ਸੁਰੱਖਿਆ ਵਿਚ ਡਟੇ ਰਹੇ |
