ਬਰੇਟਾ, 19 ਜੂਨ (ਜੀਵਨ ਸ਼ਰਮਾ)-ਭਾਰਤੀ ਕਿਸਾਨ ਯੂਨੀਅਨ (ਉਗਰਾਹਾਂ) ਵਲੋਂ ਪਿੰਡ ਬਹਾਦਰਪੁਰ ਵਿਖੇ ਮਜ਼ਦੂਰ ਦਾ ਘਰ ਜਿਸ ਨੂੰ ਕਿ ਇਕ ਬੈਂਕ ਵਲੋਂ ਕਰਜ਼ਾ ਵਾਪਸ ਨਾ ਕਰਨ ਵਜੋਂ ਜਿੰਦਰਾ ਲਗਾ ਦਿੱਤਾ ਗਿਆ ਸੀ, ਨੂੰ ਤੋੜ ਕੇ ਦੁਬਾਰਾ ਮਜ਼ਦੂਰ ਦੇ ਪਰਿਵਾਰ ਹਵਾਲੇ ਕਰ ਦਿੱਤਾ ਗਿਆ | ਜਥੇਬੰਦੀ ਦੇ ਜ਼ਿਲ੍ਹਾ ਆਗੂ ਜਗਿੰਦਰ ਸਿੰਘ ਦਿਆਲਪੁਰਾ ਨੇ ਦੱਸਿਆ ਕਿ ਮਜ਼ਦੂਰ ਬਿੱਟੂ ਸਿੰਘ ਨੇ ਪਿਛਲੇ ਸਮੇਂ ਘਰ ਪਾਉਣ ਲਈ ਬੈਂਕ ਤੋਂ ਸਾਢੇ ਪੰਜ ਲੱਖ ਦਾ ਕਰਜ਼ਾ ਲਿਆ ਸੀ, ਜਿਸ ਵਿਚੋਂ ਕੁਝ ਕਰਜ਼ਾ ਉਸ ਵਲੋਂ ਵਾਪਸ ਵੀ ਕੀਤਾ ਗਿਆ ਪਰ ਬਿੱਟੂ ਸਿੰਘ ਦਾ ਕੰਮ ਕਾਰ ਠੀਕ ਨਾ ਚੱਲਣ ਕਰਕੇ ਉਹ ਬਾਕੀ ਕਰਜ਼ਾ ਵਾਪਸ ਨਹੀਂ ਕਰ ਸਕਿਆ | ਇਸ ਕਾਰਨ ਪਿਛਲੇ ਦਿਨੀਂ ਬੈਂਕ ਵਲੋਂ ਉਸ ਦੇ ਘਰ ਨੂੰ ਜਿੰਦਰਾ ਲਗਾ ਦਿੱਤਾ ਗਿਆ ਸੀ | ਜਥੇਬੰਦੀ ਨੂੰ ਘਟਨਾ ਦਾ ਪਤਾ ਲੱਗਣ 'ਤੇ ਅੱਜ ਘਰ ਦਾ ਜਿੰਦਰਾ ਤੋੜ ਕੇ ਦੁਬਾਰਾ ਮਜ਼ਦੂਰ ਨੂੰ ਘਰ ਵਿਚ ਬਿਠਾ ਦਿੱਤਾ ਗਿਆ ਹੈ | ਉਨ੍ਹਾਂ ਦੋਸ਼ ਲਗਾਇਆ ਕਿ ਇਕ ਪਾਸੇ ਤਾਂ ਸਰਕਾਰ ਮਜ਼ਦੂਰਾਂ ਦਾ ਕਰਜ਼ਾ ਮੁਆਫ਼ ਕਰਨ ਦੀ ਗੱਲ ਕਰ ਰਹੀ ਹੈ ਪਰ ਦੂਸਰੇ ਪਾਸੇ ਕਰਜ਼ੇ ਬਦਲੇ ਮਜ਼ਦੂਰਾਂ ਨੂੰ ਘਰ ਤੋਂ ਬੇਘਰ ਕੀਤਾ ਜਾ ਰਿਹਾ ਹੈ | ਉਨ੍ਹਾਂ ਕਿਹਾ ਕਿ ਉਹ ਕਿਸੇ ਵੀ ਕੀਮਤ 'ਤੇ ਘਰ ਨੂੰ ਜਿੰਦਰਾ ਨਹੀਂ ਲਗਾਉਣ ਦੇਣਗੇ | ਇਸ ਮੌਕੇ ਆਗੂ ਲੀਲ੍ਹਾ ਸਿੰਘ ਕਿਸ਼ਨਗੜ੍ਹ, ਅਮਰੀਕ ਸਿੰਘ ਕਿਸ਼ਨਗੜ੍ਹ, ਚਰਨਜੀਤ ਸਿੰਘ, ਬਲਵਿੰਦਰ ਸਿੰਘ, ਜਰਨੈਲ ਸਿੰਘ ਬਹਾਦਰਪੁਰ, ਨਿੱਕਾ ਸਿੰਘ ਦਿਆਲਪੁਰਾ, ਦਰਸ਼ਨ ਸਿੰਘ ਬਹਾਦਰਪੁਰ, ਜੱਸੀ ਸਿੰਘ ਆਦਿ ਹਾਜ਼ਰ ਸਨ |
