ਪੁਰਖਾਲੀ, 19 ਜੂਨ (ਅੰਮਿ੍ਤਪਾਲ ਸਿੰਘ ਬੰਟੀ)-ਰੂਪਨਗਰ ਤੋਂ ਵਾਇਆ ਪੁਰਖਾਲੀ ਹੋ ਕੇ ਚੰਡੀਗੜ੍ਹ ਜਾਣ ਵਾਲੀ ਸੀ. ਟੀ. ਯੂ. ਦੀ ਬੱਸ ਵਿਭਾਗ ਵਲੋਂ ਬੰਦ ਕਰਨ ਕਾਰਨ ਇਲਾਕੇ ਦੇ ਲੋਕਾਂ ਅੰਦਰ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ | ਜਾਣਕਾਰੀ ਅਨੁਸਾਰ ਸੀ. ਟੀ. ਯੂ. ਦੀ ਬੱਸ 25/102 ਰੂਪਨਗਰ ਤੋਂ ਸਵੇਰੇ 6.15 ਵਜੇ ਚੰਡੀਗੜ੍ਹ ਲਈ ਚੱਲਦੀ ਸੀ | ਇਹ ਬੱਸ 6.50 ਵਜੇ ਪੁਰਖਾਲੀ ਤੋਂ ਚੰਡੀਗੜ੍ਹ ਲਈ ਚੱਲਦੀ ਸੀ | ਇਹ ਬੱਸ ਵਾਇਆ ਹਰੀਪੁਰ, ਮੀਆਂਪੁਰ ਚੰਗਰ, ਮਾਣਕਪੁਰ ਸ਼ਰੀਫ, ਬਲਾਕ ਮਾਜਰੀ, ਸੀਸਵਾਂ ਟੀ ਪੁਆਇੰਟ, ਮੁੱਲਾਂਪੁਰ ਗਰੀਬਦਾਸ, ਪੀ. ਜੀ. ਆਈ. ਚੰਡੀਗੜ੍ਹ ਹੋ ਕੇ ਬੱਸ ਅੱਡੇ ਚੰਡੀਗੜ੍ਹ ਪੁੱਜਦੀ ਸੀ | ਉਕਤ ਬੱਸ ਹੁਣ ਸੀ. ਟੀ. ਯੂ. ਵਲੋਂ ਕਰੀਬ ਡੇਢ ਮਹੀਨੇ ਬੰਦ ਕਰ ਦਿੱਤੀ ਹੈ | ਉਕਤ ਬੱਸ ਬੰਦ ਹੋਣ ਕਾਰਨ ਚੰਡੀਗੜ੍ਹ ਪੀ. ਜੀ. ਆਈ. ਵਿਖੇ ਇਲਾਜ ਲਈ ਜਾਣ ਵਾਲੇ ਮਰੀਜ਼ਾਂ ਨੂੰ ਬਹੁਤ ਜ਼ਿਆਦਾ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਪੀ. ਜੀ. ਆਈ. ਜਾਣ ਵਾਲੇ ਮਰੀਜ਼ਾਂ ਨੂੰ ਇਹ ਬੱਸ ਕਿਸੇ ਵਰਦਾਨ ਤੋਂ ਘੱਟ ਨਹੀਂ ਸੀ ਇਸ ਬੱਸ ਰਾਹੀਂ ਮਰੀਜ਼ ਸਵੇਰੇ 8 ਵਜੇ ਦੇ ਕਰੀਬ ਪੀ. ਜੀ. ਆਈ. ਪੁੱਜ ਕੇ ਆਪਣਾ ਇਲਾਜ ਕਰਵਾ ਲੈਂਦੇ ਸਨ ਪਰ ਹੁਣ ਮਰੀਜ਼ਾਂ ਨੂੰ ਵਾਇਆ ਖਰੜ ਹੋ ਕੇ ਜਾਣਾ ਪੈ ਰਿਹਾ ਹੈ ਤੇ ਮਰੀਜ਼ 11 ਵਜੇ ਤੋਂ ਪਹਿਲਾਂ ਪੀ. ਜੀ. ਆਈ. ਨਹੀਂ ਪੁੱਜਦੇ | ਇਸ ਸੰਬੰਧ 'ਚ ਸੁਰਿੰਦਰ ਸਿੰਘ ਹਰੀਪੁਰ ਸਾ. ਪ੍ਰਧਾਨ ਯੂਥ ਕਾਂਗਰਸ, ਨਿਰਮਲ ਸਿੰਘ ਸਰਪੰਚ ਪੁਰਖਾਲੀ, ਯੂਥ ਆਗੂ ਜਿੰਮੀ ਖੇੜੀ, ਦਿਲਬਰ ਸਿੰਘ ਸਲਾਮਤਪੁਰ, ਯੂਥ ਆਗੂ ਚੰਨੀ ਸੈਂਫਲਪੁਰ, ਮੇਵਾ ਸਿੰਘ ਸਾ. ਸਰਪੰਚ ਬਿੰਦਰਖ, ਮੋਹਨ ਸਿੰਘ ਸਰਪੰਚ ਬੜੀ, ਨੰਬਰਦਾਰ ਹਰਪ੍ਰੀਤ ਸਿੰਘ ਹਿਰਦਾਪੁਰ, ਮਹੰਤ ਰਾਮ ਪ੍ਰਤਾਪ ਗਿਰੀ, ਅਜੈਬ ਸਿੰਘ ਸਰਪੰਚ ਸਰਾੜੀ, ਗੁਰਜੀਤ ਸਿੰਘ ਸਰਪੰਚ ਖਾਨਪੁਰ, ਮਨਪ੍ਰੀਤ ਸਿੰਘ ਸਰਪੰਚ ਭੱਦਲ, ਬਲਵਿੰਦਰ ਸਿੰਘ ਸਰਪੰਚ ਹਿਰਦਾ ਪੁਰ, ਸੱਜਣ ਸਿੰਘ ਸਰਪੰਚ ਹਰੀਪੁਰ, ਰਣਜੋਧ ਸਿੰਘ ਸਰਪੰਚ ਰਾਮਪੁਰ, ਗੁਰਜੀਤ ਸਿੰਘ ਸਰਪੰਚ ਖਾਨਪੁਰ, ਸੁਰਜੀਤ ਸਿੰਘ ਸਾ. ਸਰਪੰਚ ਰਾਮਪੁਰ ਤੇ ਇਲਾਕੇ ਦੀਆਂ ਹੋਰ ਵੱਖ-ਵੱਖ ਸ਼ਖ਼ਸੀਅਤਾਂ ਨੇ ਸੀ. ਟੀ. ਯੂ. ਦੇ ਡਾਇਰੈਕਟਰ ਤੇ ਹੋਰ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਲੋਕਾਂ ਦੀ ਸਮੱਸਿਆ ਨੂੰ ਵੇਖਦੇ ਹੋਏ ਉਕਤ ਬੱਸ ਨੂੰ ਚਾਲੂ ਕੀਤਾ ਜਾਵੇ ਅਤੇ ਇਸ ਰੂਟ 'ਤੇ ਬੱਸ ਟਾਈਮ ਵਧਾਏ ਜਾਣ |
