ਮਾਮਲਾ ਪੋਤੇ ਵਲੋਂ ਨਸ਼ੇ ਦੀ ਹਾਲਤ 'ਚ ਦਾਦੀ ਦਾ ਗਲਾ ਰੇਤ ਕੇ ਕਤਲ ਕਰਨ ਦਾ ਪੋਸਟਮਾਰਟਮ ਦੌਰਾਨ ਹੱਡੀ 'ਚ ਫਸਿਆ ਚਾਕੂ ਕੱਢਿਆ ਗਿਆ ਬਾਹਰ <br/>
ਅਜੀਤ ਡੈਸਕ
17-10-2025
ਸ਼ਰਾਬ ਪੀਣ ਤੋਂ ਰੋਕਣ ਕਾਰਨ ਹੀ ਦਾਦੀ ਦਾ ਕੀਤਾ ਕਤਲ- ਬੁੱਧਵਾਰ ਦੁਪਹਿਰ ਸਮੇਂ ਘਰ 'ਚ ਕੇਵਲ ਗੁਰਬਚਨ ਕੌਰ ਅਤੇ ਅਰੀਸ਼ ਸੈਣੀ ਹੀ ਮੌਜੂਦ ਸਨ | ਜਦੋਂ ਅਰੀਸ਼ ਦੀ ਮਾਂ ਵੀਨਾ ਸੈਣੀ ਡਿਊਟੀ ਤੋਂ ਵਾਪਸ ਆਈ ਤਾਂ ਦਰਵਾਜ਼ਾ ਅੰਦਰੋਂ ਬੰਦ ਸੀ | ਦਰਵਾਜ਼ਾ ਖੜ੍ਹਕਾਉਣ 'ਤੇ ਅਰੀਸ਼ ਨੇ ਦਰਵਾਜ਼ਾ ਖੋਲ੍ਹਦਿਆਂ ਕਿਹਾ ਕਿ ਦਾਦੀ ਮੈਨੂੰ ਸ਼ਰਾਬ ਪੀਣ ਤੋਂ ਰੋਕਦੀ ਸੀ ਤੇ ਮੈਂ ਗੁੱਸੇ 'ਚ ਉਸ ਦਾ ਕਤਲ ਕਰ ਦਿੱਤਾ | ਇਸ ਤੋਂ ਬਾਅਦ ਜਦੋਂ ਵੀਨਾ ਸੈਣੀ ਨੇ ਅੰਦਰ ਜਾ ਕੇ ਦੇਖਿਆ ਤਾਂ ਗੁਰਬਚਨ ਕੌਰ ਦੀ ਖ਼ੂਨ ਨਾਲ ਲੱਥਪੱਥ ਲਾਸ਼ ਪਈ ਸੀ | ਘਟਨਾ ਦੀ ਸੂਚਨਾ ਮਿਲਣ 'ਤੇ ਡੇਰਾਬੱਸੀ ਦੇ ਡੀ. ਐੱਸ. ਪੀ. ਬਿਕਰਮਜੀਤ ਸਿੰਘ ਬਰਾੜ ਸਮੇਤ ਪੁਲਿਸ ਟੀਮ ਵਲੋਂ ਮੌਕੇ 'ਤੇ ਜਾਂਚ ਕਰਨ ਉਪਰੰਤ ਫੋਰੈਂਸਿਕ ਟੀਮ ਨੂੰ ਵੀ ਘਟਨਾ ਸਥਾਨ 'ਤੇ ਸੱਦਿਆ ਅਤੇ ਫ਼ਿਰ ਲਾਸ਼ ਨੂੰ ਡੇਰਾਬੱਸੀ ਦੇ ਸਿਵਲ ਹਸਪਤਾਲ ਵਿਖੇ ਪਹੁੰਚਾਇਆ ਗਿਆ | ਅੱਜ ਸਿਵਲ ਹਸਪਤਾਲ ਡੇਰਾਬੱਸੀ ਵਿਖੇ ਮਿ੍ਤਕ ਗੁਰਬਚਨ ਕੌਰ ਦਾ ਪੋਸਟਮਾਰਟਮ ਕਰਵਾਇਆ ਗਿਆ | ਡਾਕਟਰੀ ਰਿਪੋਰਟ ਅਨੁਸਾਰ ਪੋਤੇ ਵਲੋਂ ਕੀਤਾ ਗਿਆ ਚਾਕੂ ਦਾ ਵਾਰ ਇੰਨਾ ਗਹਿਰਾ ਸੀ ਕਿ ਚਾਕੂ ਗਲੇ ਦੀ ਹੱਡੀ 'ਚ ਫਸ ਗਿਆ ਸੀ, ਜਿਸ ਨੂੰ ਪੋਸਟਮਾਰਟਮ ਦੌਰਾਨ ਬਾਹਰ ਕੱਢਿਆ ਗਿਆ | ਉੱਧਰ ਥਾਣਾ ਮੁਖੀ ਇੰਸਪੈਕਟਰ ਸੁਮਿਤ ਮੋਰ ਨੇ ਦੱਸਿਆ ਕਿ ਪੁਲਿਸ ਨੇ ਮੁਲਜ਼ਮ ਦੀ ਮਾਂ ਵੀਨਾ ਸੈਣੀ ਦੇ ਬਿਆਨਾਂ ਦੇ ਆਧਾਰ 'ਤੇ ਧਾਰਾ 103 ਬੀ. ਐੱਨ. ਐੱਸ. ਤਹਿਤ ਮਾਮਲਾ ਦਰਜ ਕਰਕੇ ਮੁਲਜ਼ਮ ਦੀ ਗਿ੍ਫ਼ਤਾਰੀ ਲਈ ਟੀਮਾਂ ਤਾਇਨਾਤ ਕਰਕੇ ਭਾਲ ਤੇਜ਼ ਕਰ ਦਿੱਤੀ ਹੈ |
