ਐਲਨ ਮਸਕ ਦੇ ਸਪੇਸਐਕਸ ਦਾ ਰਾਕੇਟ ਫਟਿਆ

ਆਸਟਿਨ (ਅਮਰੀਕਾ), 19 ਜੂਨ (ਏ.ਪੀ.)-ਇਥੇ ਟੈਕਸਸ ਸੂਬੇ 'ਚ ਐਲਨ ਮਸਕ ਦੇ ਸਪੇਸਐਕਸ ਦਾ ਇਕ ਰਾਕੇਟ (ਸਟਾਰਸ਼ਿਪ) ਪ੍ਰੀਖਣ ਦੌਰਾਨ ਬੁੱਧਵਾਰ ਰਾਤ ਨੂੰ ਫਟ ਗਿਆ। ਇਸ ਜ਼ੋਰਦਾਰ ਧਮਾਕੇ ਤੋਂ ਬਾਅਦ ਰਾਕੇਟ ਇਕ ਅੱਗ ਦੇ ਗੋਲੇ 'ਚ ਹੀ ਤਬਦੀਲ ਹੋ ਗਿਆ। ਇਹ ਧਮਾਕਾ ਯੋਜਨਾਬੱਧ ਇਗਨੀਸ਼ਨ ਕ੍ਰਮ ਤੋਂ ਕੁਝ ਪਲ ਪਹਿਲਾਂ ਹੋਇਆ ਤੇ ਇਸ ਕਾਰਨ ਪੁਲਾੜ ਯਾਨ ਨੂੰ ਬੁਰੀ ਤਰ੍ਹਾਂ ਨੁਕਸਾਨ ਪਹੁੰਚਿਆ। ਕੰਪਨੀ ਨੇ ਕਿਹਾ ਕਿ ਸਟਾਰਸ਼ਿਪ ਨੂੰ ਟੈਕਸਸ ਦੇ ਦੱਖਣੀ ਸਿਰੇ 'ਤੇ ਸਥਿਤ ਸਪੇਸਐਕਸ ਦੇ ਲਾਂਚ ਸਾਈਟ ਸਟਾਰਬੇਸ ਵਿਖੇ ਦਸਵੇਂ ਉਡਾਣ ਪ੍ਰੀਖਣ ਦੀ ਤਿਆਰੀ ਕਰਦੇ ਸਮੇਂ ਰਾਤ 11 ਵਜੇ ਦੇ ਕਰੀਬ ਇਕ ਵੱਡੀ ਅਸੰਗਤੀ ਦਾ ਅਨੁਭਵ ਹੋਇਆ। ਸਪੇਸਐਕਸ ਨੇ 'ਐਕਸ' 'ਤੇ ਇਕ ਬਿਆਨ 'ਚ ਕਿਹਾ ਕਿ ਪੂਰੇ ਆਪਰੇਸ਼ਨ ਦੌਰਾਨ ਸਾਈਟ ਦੇ ਆਲੇ ਦੁਆਲੇ ਇਕ ਸੁਰੱਖਿਅਤ ਖੇਤਰ ਬਣਾਇਆ ਗਿਆ ਸੀ ਤੇ ਸਾਰੇ ਕਰਮਚਾਰੀ ਸੁਰੱਖਿਅਤ ਹਨ।