ਮੈਲਬੌਰਨ, 22 ਸਤੰਬਰ (ਪਰਮਵੀਰ ਸਿੰਘ ਆਹਲੂਵਾਲੀਆ)-ਮੈਲਬੌਰਨ ਵਿਖੇ ਇਕ ਪੰਜਾਬੀ ਨੌਜਵਾਨ ਦੀ ਹਾਦਸੇ 'ਚ ਮੌਤ ਹੋ ਗਈ | ਪ੍ਰਭਜੋਤ ਸਿੰਘ (27), ਜੋ ਤਿੰਨ ਸਾਲ ਪਹਿਲਾਂ ਅੰਤਰਰਾਸ਼ਟਰੀ ਵਿਦਿਆਰਥੀ ਵਜੋਂ ਆਸਟ੍ਰੇਲੀਆ ਆਇਆ ਸੀ, ਦੀ ਬੀਤੇ ਦਿਨ ਮੈਲਬੌਰਨ ਦੇ ਉੱਤਰੀ ਹਿੱਸੇ 'ਚ ਸਥਿਤ ਕਲੀਨਵੇ ਕੂਲਾਰੂ ਮਟੀਰੀਅਲ ਰਿਕਵਰੀ ਫੈਸੀਲਿਟੀ 'ਚ ਇਕ ਭਿਆਨਕ ਕੰਮਕਾਜੀ ਹਾਦਸੇ ਦਾ ਸ਼ਿਕਾਰ ਹੋ ਗਿਆ | ਰਿਪੋਰਟਾਂ ਅਨੁਸਾਰ, ਪ੍ਰਭਜੋਤ ਆਪਣਾ ਕੰਮ ਮੁਕਾਉਣ ਤੋਂ ਬਾਅਦ ਇਕ ਦਰਵਾਜ਼ਾ ਬੰਦ ਕਰ ਰਿਹਾ ਸੀ ਕਿ ਪਿੱਛੇ ਮੁੜਦੇ ਟਰੱਕ (ਲੋਡਰ) ਨੇ ਬਿਨਾਂ ਧਿਆਨ ਕੀਤੇ ਉਸਨੂੰ ਟੱਕਰ ਮਾਰ ਦਿੱਤੀ | ਇਸ ਦੌਰਾਨ ਉਹ ਟ੍ਰੇਲਰ ਤੇ ਲੋਡਰ ਦੇ ਵਿਚਕਾਰ ਫਸ ਗਿਆ ਤੇ ਮੌਕੇ 'ਤੇ ਹੀ ਝਟਕਿਆਂ ਕਾਰਨ ਉਸਦੀ ਮੌਤ ਹੋ ਗਈ | ਪ੍ਰਭਜੋਤ ਦਾ ਸਬੰਧ ਹਰਿਪੁਰਾ ਪਿੰਡ, ਸਿਰਸਾ (ਹਰਿਆਣਾ) ਨਾਲ ਸੀ | ਮਿ੍ਤਕ ਦੇ ਦੋਸਤਾਂ ਵਲੋਂ ਉਸਦੇ ਪਰਿਵਾਰ ਦੀ ਆਰਥਿਕ ਮਦਦ ਲਈ ਸਮਾਜਿਕ ਮੀਡੀਆ ਰਾਹੀਂ ਇਕ ਮੁਹਿੰਮ ਵੀ ਸ਼ੁਰੂ ਕੀਤੀ ਗਈ ਹੈ |
