ਯਮੁਨਾਨਗਰ ਨੇ ਅੰਬਾਲਾ ਲੋਕ ਸਭਾ ਪੱਧਰੀ ਐਮ. ਪੀ. ਸਪੋਰਟਸ ਫੈਸਟੀਵਲ ਵਿਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ

ਯਮੁਨਾਨਗਰ, 23 ਦਸੰਬਰ (ਗੁਰਦਿਆਲ ਸਿੰਘ ਨਿਮਰ)-ਭਾਜਪਾ ਰਾਜ ਸਭਾ ਮੈਂਬਰ ਰੇਖਾ ਸ਼ਰਮਾ ਨੇ ਯਮੁਨਾਨਗਰ ਜ਼ਿਲ੍ਹੇ ਨੂੰ ਅੰਬਾਲਾ ਲੋਕ ਸਭਾ ਪੱਧਰੀ ਐਮ. ਪੀ. ਸਪੋਰਟਸ ਫੈਸਟੀਵਲ ਵਿਚ ਪਹਿਲਾ ਸਥਾਨ ਪ੍ਰਾਪਤ ਕਰਨ 'ਤੇ ਸਾਬਕਾ ਕੈਬਨਿਟ ਮੰਤਰੀ ਕੰਵਰਪਾਲ ਗੁਰਜਰ, ਭਾਜਪਾ ਜ਼ਿਲ੍ਹਾ ਪ੍ਰਧਾਨ ਰਾਜੇਸ਼ ਸਪਰਾ, ਬੀ. ਜੇ. ਵਾਈ. ਐਮ. ਜ਼ਿਲ੍ਹਾ ਪ੍ਰਧਾਨ ਨਿਸ਼ਚਲ ਚੌਧਰੀ, ਜ਼ਿਲ੍ਹਾ ਕੋਆਰਡੀਨੇਟਰ ਨਰਿੰਦਰ ਸਿੰਘ ਰਾਣਾ ਸਮੇਤ ਪੂਰੀ ਟੀਮ ਅਤੇ ਖਿਡਾਰੀਆਂ ਨੂੰ ਵਧਾਈ ਦਿੱਤੀ ਹੈ | ਇਸ ਸੰਬੰਧੀ ਕਰਵਾਏ ਸਮਾਪਤੀ ਸਮਾਰੋਹ ਵਿਚ ਖਿਡਾਰੀਆਂ ਨੂੰ ਉਤਸ਼ਾਹਿਤ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਐਮ. ਪੀ. ਖੇਡਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਦੇ 'ਤੇ ਕਰਵਾਈਆਂ ਗਈਆਂ ਸਨ | ਉਨ੍ਹਾਂ ਕਿਹਾ ਕਿ ਇਹ ਸਮਾਗਮ ਸਿਰਫ਼ ਇਕ ਖੇਡ ਮੁਕਾਬਲਾ ਨਹੀਂ ਹੈ, ਸਗੋਂ ਊਰਜਾ, ਅਨੁਸ਼ਾਸਨ, ਟੀਮ ਵਰਕ ਅਤੇ ਇਕ ਨਵੇਂ ਭਾਰਤ ਦੀ ਭਾਵਨਾ ਦਾ ਜਸ਼ਨ ਹੈ | ਉਨ੍ਹਾਂ ਕਿਹਾ ਕਿ ਐਮ. ਪੀ. ਖੇਡ ਮੁਕਾਬਲਿਆਂ ਰਾਹੀਂ ਪੇਂਡੂ ਖੇਤਰਾਂ ਵਿਚ ਛੁਪੀਆਂ ਪ੍ਰਤਿਭਾਵਾਂ ਨੂੰ ਸਾਹਮਣੇ ਆਉਣ ਦਾ ਮੌਕਾ ਮਿਲਦਾ ਹੈ | ਇਸ ਮੌਕੇ ਬੀ. ਜੇ. ਵਾਈ. ਐਮ. ਦੇ ਜ਼ਿਲ੍ਹਾ ਪ੍ਰਧਾਨ ਨਿਸ਼ਚਲ ਚੌਧਰੀ ਨੇ ਦੱਸਿਆ ਕਿ ਅੰਬਾਲਾ ਲੋਕ ਸਭਾ ਪੱਧਰੀ ਐਮ. ਪੀ. ਸਪੋਰਟਸ ਫੈਸਟੀਵਲ ਦਾ ਸਮਾਪਤੀ ਸਮਾਰੋਹ ਰਾਜ ਸਭਾ ਮੈਂਬਰ ਰੇਖਾ ਸ਼ਰਮਾ ਦੀ ਅਗਵਾਈ ਹੇਠ ਪੰਚਕੂਲਾ ਵਿਚ ਹੋਇਆ, ਜਿਸ ਵਿਚ ਯਮੁਨਾਨਗਰ ਜ਼ਿਲ੍ਹੇ ਨੇ ਅੰਬਾਲਾ ਲੋਕ ਸਭਾ ਪੱਧਰੀ ਐਮ. ਪੀ. ਖੇਡਾਂ ਵਿਚ ਕੁੱਲ ਮਿਲਾ ਕੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ | ਇਸ ਸੰਬੰਧੀ ਪੰਚਕੂਲਾ ਵਿਚ ਕਰਵਾਏ ਸਮਾਪਤੀ ਸਮਾਰੋਹ ਵਿਚ ਮੁੱਖ ਮਹਿਮਾਨ ਵਜੋਂ ਸ਼ਾਮਿਲ ਹੋਏ ਕੈਬਨਿਟ ਮੰਤਰੀ ਕਿ੍ਸ਼ਨਾ ਬੇਦੀ, ਸਾਬਕਾ ਕੈਬਨਿਟ ਮੰਤਰੀ ਕੰਵਰਪਾਲ ਗੁਰਜਰ, ਸੀਨੀਅਰ ਭਾਜਪਾ ਨੇਤਾ ਬੰਤੋ ਕਟਾਰੀਆ, ਸਾਬਕਾ ਵਿਧਾਨ ਸਭਾ ਸਪੀਕਰ ਗਿਆਨ ਚੰਦ ਗੁਪਤਾ, ਜ਼ਿਲ੍ਹਾ ਜਨਰਲ ਸਕੱਤਰ ਨਰਿੰਦਰ ਸਿੰਘ ਰਾਣਾ, ਅੰਬਾਲਾ ਜ਼ਿਲ੍ਹਾ ਪ੍ਰਧਾਨ ਮਨਦੀਪ ਰਾਣਾ, ਪੰਚਕੂਲਾ ਜ਼ਿਲ੍ਹਾ ਪ੍ਰਧਾਨ ਅਜੈ ਮਿੱਤਲ, ਭਾਜਪਾ ਨੇਤਾ ਰੰਜੀਤਾ ਮਹਿਤਾ ਅਤੇ ਭਾਜਪਾ ਜ਼ਿਲ੍ਹਾ ਯਮੁਨਾਨਗਰ ਮੀਡੀਆ ਇੰਚਾਰਜ ਕਪਿਲ ਮਨੀਸ਼ ਗਰਗ ਨੇ ਖਿਡਾਰੀਆਂ ਨੂੰ ਸਨਮਾਨਿਤ ਕੀਤਾ | ਇਸ ਦੌਰਾਨ ਕੈਬਨਿਟ ਮੰਤਰੀ ਕਿ੍ਸ਼ਨਾ ਬੇਦੀ ਨੇ ਕਿਹਾ ਕਿ ਉਹ ਮੌਜੂਦ ਖਿਡਾਰੀਆਂ ਦੇ ਉਤਸ਼ਾਹ ਅਤੇ ਜਨੂੰਨ ਨੂੰ ਦੇਖ ਕੇ ਬਹੁਤ ਖੁਸ਼ ਹਨ | ਉਨ੍ਹਾਂ ਕਿਹਾ ਕਿ ਉਹ ਸੰਸਦ ਖੇਡ ਮਹਾਉਤਸਵ ਦੀ ਸਫਲਤਾ ਲਈ ਰਾਜ ਸਭਾ ਮੈਂਬਰ ਰੇਖਾ ਸ਼ਰਮਾ ਅਤੇ ਉਨ੍ਹਾਂ ਦੀ ਪੂਰੀ ਟੀਮ ਨੂੰ ਵਧਾਈ ਦਿੰਦੇ ਹਨ | ਇਸ ਦੌਰਾਨ ਕਰਵਾਏ ਮੁਕਾਬਲਿਆਂ ਸੰਬੰਧੀ ਜਾਣਕਾਰੀ ਦਿੰਦਿਆਂ ਨਿਸ਼ਚਲ ਚੌਧਰੀ ਨੇ ਕਿਹਾ ਕਿ ਯਮੁਨਾਨਗਰ ਨੇ ਖੋ-ਖੋ ਵਿਚ 12 ਵਿਚੋਂ ਅੱਠ ਤਗਮੇ ਜਿੱਤੇ, ਜਦਕਿ ਅੰਬਾਲਾ ਅਤੇ ਪੰਚਕੂਲਾ ਨੇ ਬਾਕੀ ਚਾਰ ਜਿੱਤੇ | ਕਬੱਡੀ ਵਿਚ ਯਮੁਨਾਨਗਰ ਨੇ ਸਾਰੇ ਉਮਰ ਸਮੂਹਾਂ ਵਿਚ ਸਾਰੇ 12 ਤਗਮੇ ਜਿੱਤੇ, ਜਦਕਿ ਅੰਬਾਲਾ ਅਤੇ ਪੰਚਕੂਲਾ ਜ਼ੀਰੋ ਨਾਲ ਖਤਮ ਹੋਏ | ਇਸੇ ਤਰ੍ਹਾਂ ਕਿ੍ਕਟ ਵਿਚ ਯਮੁਨਾਨਗਰ ਨੇ 12 ਵਿਚੋਂ 11 ਤਗਮੇ ਜਿੱਤੇ ਅਤੇ ਅੰਬਾਲਾ ਨੇ ਇਕ ਤਗਮਾ ਪ੍ਰਾਪਤ ਕੀਤਾ ਹੈ, ਜਦਕਿ ਪੰਚਕੂਲਾ ਜ਼ੀਰੋ ਨਾਲ ਖਤਮ ਹੋਇਆ | ਇਸੇ ਤਰ੍ਹਾਂ ਖੇਡ ਮੁਕਾਬਲਿਆਂ ਵਿਚ ਯਮੁਨਾਨਗਰ 24 ਵਿਚੋਂ 22 ਤਗਮੇ ਜਿੱਤ ਕੇ ਤਗਮੇ ਦੀ ਸੂਚੀ ਵਿਚ ਸਿਖਰ 'ਤੇ ਰਿਹਾ ਅਤੇ ਅੰਬਾਲਾ ਨੂੰ ਸਿਰਫ਼ ਦੋ ਨਾਲ ਹੀ ਸਬਰ ਕਰਨਾ ਪਿਆ, ਜਿਸ ਨਾਲ ਪੰਚਕੂਲਾ ਜ਼ੀਰੋ ਨਾਲ ਰਹਿ ਗਿਆ | ਬੈਡਮਿੰਟਨ ਵਿਚ ਅੰਬਾਲਾ ਨੇ 12 ਵਿਚੋਂ ਛੇ ਤਗਮੇ ਜਿੱਤੇ, ਜਦਕਿ ਯਮੁਨਾਨਗਰ ਅਤੇ ਪੰਚਕੂਲਾ ਨੇ ਤਿੰਨ-ਤਿੰਨ ਜਿੱਤੇ |