16-11-2026
ਅੱਖਰ:
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 17-06-2025

ਆਵਾਜਾਈ ਸਮੱਸਿਆ ਸੁਰਖ਼ੀਆਂ 'ਚ ਆਉਣ ਤੋਂ ਬਾਅਦ ਨਗਰ ਪੰਚਾਇਤ ਨੇ ਮੁੱਖ ਮਾਰਗ ਤੋਂ ਰੇਹੜੀਆਂ ਪਿੱਛੇ ਹਟਵਾਈਆਂ

ਅਜੀਤ ਡੈਸਕ 17-06-2025
ਭੀਖੀ, 16 ਜੂਨ (ਬਲਕਾਰ ਸਿੰਘ ਸਹੋਤਾ)- ਪਿਛਲੇ ਕਈ ਦਿਨਾਂ ਤੋਂ ਭੀਖੀ 'ਚੋਂ ਗੁਜ਼ਰਦੇ ਸਟੇਟ ਹਾਈਵੇ 'ਤੇ ਦੁਕਾਨਦਾਰਾਂ ਵਲੋਂ ਕੀਤੇ ਨਜਾਇਜ਼ ਕਬਜ਼ਿਆਂ ਕਾਰਨ ਆਵਾਜਾਈ 'ਚ ਹੋ ਰਹੀ ਦਿੱਕਤ ਨੂੰ ਮੀਡੀਆ ਨੇ ਪ੍ਰਮੁੱਖਤਾ ਨਾਲ ਉਭਾਰਿਆ ਸੀ, ਜਿਸ ਦੇ ਮੱਦੇਨਜ਼ਰ ਨਗਰ ਪੰਚਾਇਤ ਦਫ਼ਤਰ ਵਲੋਂ ਕੁੰਭਕਰਨੀ ਨੀਂਦ ਤੋਂ ਅੰਗੜਾਈ ਲੈਂਦਿਆਂ ਪੁਲਿਸ ਵਿਭਾਗ ਦੀ ਮਦਦ ਨਾਲ ਅੱਜ ਸੜਕ ਦੇ ਦੋਵੇਂ ਪਾਸੇ ਲੱਗੀਆਂ ਫਰੂਟ, ਸਬਜ਼ੀ, ਗੋਲ ਗੱਪੇ, ਫਾਸਟ ਫੂਡ ਅਤੇ ਆਈਸਕ੍ਰੀਮ ਵਾਲੀਆਂ ਰੇਹੜੀਆਂ ਨੂੰ ਪਿੱਛੇ ਹਟਾਉਂਦਿਆਂ ਹਦਾਇਤ ਕੀਤੀ ਕਿ ਲੁੱਕ ਵਾਲੀ ਸੜਕ ਦੇ ਕਿਨਾਰੇ ਤੋਂ 10 ਫੁੱਟ ਪਿੱਛੇ ਕਰਕੇ ਹੀ ਰੇਹੜੀਆਂ 'ਤੇ ਵਿੱਕਰੀ ਕੀਤੀ ਜਾਵੇ | ਜੇਕਰ ਕੋਈ ਰੇਹੜੀ ਵਾਲਾ ਇਸ ਤੋਂ ਅੱਗੇ ਵਧਿਆ ਤਾਂ ਉਸ 'ਤੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ | ਇਸ ਦੌਰਾਨ ਨਗਰ ਪੰਚਾਇਤ ਦੇ ਕਰਮਚਾਰੀਆਂ ਵਲੋਂ ਸਫ਼ਾਈ ਸੇਵਕਾਂ ਦੀ ਮਦਦ ਨਾਲ ਕਈ ਰੇਹੜੀਆਂ 'ਤੇ ਪਈਆਂ ਟੋਕਰੀਆਂ ਅਤੇ ਕਰੇਟ ਵੀ ਚੁੱਕੇ ਗਏ | ਉੱਧਰ ਕਿਸਾਨ ਆਗੂ ਗੁਰਨਾਮ ਸਿੰਘ ਭੀਖੀ ਨੇ ਕਿਹਾ ਕਿ ਇਸ ਸੜਕ 'ਤੇ ਆਵਾਜਾਈ ਦੀ ਸਮੱਸਿਆ ਲੰਮੇ ਸਮੇਂ ਤੋਂ ਹੈ | ਇਸ ਦਾ ਨਗਰ ਪੰਚਾਇਤ ਅਤੇ ਲੋਕ ਨਿਰਮਾਣ ਵਿਭਾਗ ਵਲੋਂ ਤਾਲਮੇਲ ਕਰਕੇ ਪੁਖ਼ਤਾ ਕਾਰਵਾਈ ਕੀਤੀ ਜਾਵੇ | ਨਾਲ ਹੀ ਉਨ੍ਹਾਂ ਕਿਹਾ ਕਿ ਸਮੂਹ ਰੇਹੜੀਆਂ ਵਾਲੇ ਨਿਮਨ ਆਮਦਨੀ ਵਾਲੇ ਲੋਕ ਹਨ ਅਤੇ ਇਨ੍ਹਾਂ ਨੂੰ ਸਬਜ਼ੀ ਮੰਡੀ ਜਾਂ ਬੱਸ ਸਟੈਂਡ ਵਿਚ ਪੱਕੇ ਅੱਡੇ ਮੁਹੱਈਆ ਕਰਵਾਏ ਜਾਣ |
ਥਾਣਾ ਤੇ ਬਰਨਾਲਾ ਰੋਡ ਤੋਂ ਸਮਾਨ ਚੁਕਵਾਉਣ ਦੀ ਹਿੰਮਤ ਨਹੀਂ ਜੁਟਾਈ
ਭਾਵੇਂ ਨਗਰ ਪੰਚਾਇਤ ਵਿਭਾਗ ਵਲੋਂ ਮੁੱਖ ਸੜਕ 'ਤੇ ਤਾਂ ਰੇਹੜੀਆਂ ਵਾਲਿਆਂ ਨੂੰ ਹਦਾਇਤ ਕੀਤੀ ਪਰ ਥਾਣਾ ਰੋਡ ਅਤੇ ਬਰਨਾਲਾ ਰੋਡ 'ਤੇ ਦੁਕਾਨਦਾਰਾਂ ਦੇ ਪਏ ਇਸ਼ਤਿਹਾਰੀ ਬੋਰਡ ਅਤੇ ਸਮਾਨ ਚੁਕਵਾਉਣ ਦੀ ਹਿੰਮਤ ਨਹੀਂ ਕੀਤੀ | ਦੱਸਣਯੋਗ ਹੈ ਕਿ ਹਰਿਆਣਾ ਅਤੇ ਫ਼ਤਿਹਾਬਾਦ ਤੋਂ ਲੁਧਿਆਣਾ ਤੱਕ ਦੀ ਮੁੱਖ ਆਵਾਜਾਈ ਬਰਸਤਾ ਭੀਖੀ ਹੀ ਹੁੰਦੀ ਹੈ ਅਤੇ ਸਾਰੀ ਦੀ ਸਾਰੀ ਆਵਾਜਾਈ ਬਰਨਾਲਾ ਰੋਡ ਰਾਹੀਂ ਹੀ ਜਾਂਦੀ ਹੈ | ਜਦੋਂ ਕੋਈ ਵੱਡੇ ਵਹੀਕਲ ਜਾਂ ਬੱਸਾਂ ਇੱਥੋਂ ਦੀ ਗੁਜ਼ਰਦੀਆਂ ਤਾਂ 300 ਮੀਟਰ ਤੱਕ ਜਾਮ ਆਮ ਹੀ ਲੱਗ ਜਾਂਦਾ ਹੈ, ਜਿਸ ਕਰਕੇ ਜਿੱਥੇ ਰਾਹਗੀਰਾਂ ਨੂੰ ਮੁਸ਼ਕਿਲ ਆਉਂਦੀ ਹੈ ਉੱਥੇ ਅਕਸਰ ਲੁਧਿਆਣਾ ਨੂੰ ਜਾਂਦੀਆਂ ਐਂਬੂਲੈਂਸਾਂ ਵੀ ਇੱਥੇ ਫਸ ਜਾਂਦੀਆਂ ਹਨ | ਨਗਰ ਪੰਚਾਇਤ ਪਹਿਲ ਦੇ ਆਧਾਰ 'ਤੇ ਬਰਨਾਲਾ ਰੋਡ 'ਤੇ ਦੁਕਾਨਦਾਰਾਂ ਦੇ ਨਜਾਇਜ਼ ਕਬਜ਼ੇ ਵੀ ਹਟਵਾਏ ਤਾਂ ਜੋ ਰਾਹਗੀਰ ਆਸਾਨੀ ਨਾਲ ਇੱਥੋਂ ਲੰਘ ਸਕਣ |
ਪਿਛਲੀ ਖ਼ਬਰ ਬਰੇਟਾ ਦੀਆਂ ਸ਼ਹਿਰੀ ਤੇ ਪੇਂਡੂ ਸੜਕਾਂ ਦੀ ਹਾਲਤ ਮਾੜੀ, ਲੋਕ ਪ੍ਰੇਸ਼ਾਨ ਅਗਲੀ ਖ਼ਬਰ ਸੀ.ਪੀ.ਆਈ. ਦੀ ਬਲਾਕ ਕਮੇਟੀ ਦੀ ਮੀਟਿੰਗ

Subscribers Only Story

ਇਸ ਖ਼ਬਰ ਨੂੰ ਪੂਰਾ ਪੜ੍ਹਨ ਲਈ ਸਬਸਕ੍ਰਾਈਬਰ ਲਾਗਇਨ ਕਰੋ।