ਨਵੀਂ ਦਿੱਲੀ, 14 ਜੁਲਾਈ (ਇੰਟ.)-ਪਿਛਲੇ ਹਫ਼ਤੇ ਦਿੱਲੀ-ਐਨ.ਸੀ.ਆਰ. ’ਚ ਮੌਨਸੂਨ ਦੀ ਜ਼ੋਰਦਾਰ ਆਮਦ ਹੋਈ ਸੀ, ਪਰ ਇਹ ਖੁਸ਼ੀ ਥੋੜ੍ਹੇ ਸਮੇਂ ਲਈ ਰਹੀ। ਹਫ਼ਤੇ ਭਰ ਮੀਂਹ ਨਾ ਪੈਣ ਕਾਰਨ ਨਮੀ ਵਧ ਗਈ। ਮੌਸਮ ਵਿਭਾਗ ਅਨੁਸਾਰ, ਉੱਤਰ-ਪੱਛਮੀ ਭਾਰਤ ਦੇ ਕਈ ਹਿੱਸਿਆਂ ’ਚ ਮੌਨਸੂਨ ਅਚਾਨਕ ਰੁਕ ਗਿਆ ਹੈ। ਮੌਸਮ ਵਿਗਿਆਨੀ ਇਸ ਸੁੱਕੇ ਸਮੇਂ ਨੂੰ “ਬ੍ਰੇਕ ਮੌਨਸੂਨ” ਕਹਿ ਰਹੇ ਹਨ, ਭਾਵ ਮੌਨਸੂਨ ’ਚ ਵਿਘਨ। ਇਹ ਮੌਨਸੂਨ ਟ੍ਰਫ ਵਿੱਚ ਵੱਡੀ ਤਬਦੀਲੀ ਕਾਰਨ ਹੈ। ਮੌਨਸੂਨ ਟ੍ਰਫ ਇਕ ਘੱਟ ਦਬਾਅ ਵਾਲਾ ਖੇਤਰ ਹੈ ਜੋ ਭਾਰੀ ਬੱਦਲ, ਨਮੀ ਅਤੇ ਮੀਂਹ ਲਿਆਉਂਦਾ ਹੈ। ਮਾਹਿਰਾਂ ਅਨੁਸਾਰ, ਮੌਨਸੂਨ ਪੱਟੀ ਉੱਤਰ ਪ੍ਰਦੇਸ਼ ਦੇ ਉੱਤਰੀ ਤਰਾਈ ਖੇਤਰ ਵੱਲ ਵਧ ਗਈ ਹੈ। ਇਸ ਲਈ, ਸਿਰਫ਼ ਉੱਤਰੀ ਹਿੱਸਿਆਂ ’ਚ ਹੀ ਮੀਂਹ ਪੈ ਰਿਹਾ ਹੈ, ਜਦੋਂ ਕਿ ਮੈਦਾਨੀ ਇਲਾਕਿਆਂ ’ਚ ਸੋਕਾ ਪੈ ਰਿਹਾ ਹੈ।
