ਭਾਰਤੋਲਕ ਰਾਜਾ ਮੁੱਥੂਪਾਂਡੀ ਤੇ ਗਿਆਨੇਸ਼ਵਰੀ ਨੇ ਚਾਂਦੀ ਦਾ ਤਗਮਾ ਜਿੱਤਿਆ

ਗਲਾਸਗੋ, 27 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ, ਏਜੰਸੀ)-ਇਥੇ ਹੋ ਰਹੀਆਂ ਰਾਸ਼ਟਰਮੰਡਲ ਖੇਡਾਂ 2026 ’ਚ ਭਾਰਤੀ ਵੇਟਲਿਫਟਰਾਂ ਨੇ ਆਪਣਾ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਜਾਰੀ ਰੱਖਿਆ। ਰਿਸ਼ੀਕਾਂਤ ਸਿੰਘ ਦੇ ਚਾਂਦੀ ਤੇ ਮੀਰਾਬਾਈ ਚਾਨੂ ਦੇ ਸੋਨੇ ਤੋਂ ਬਾਅਦ, ਰਾਜਾ ਮੁਥੂੱਪਾਂਡੀ ਤੇ ਗਿਆਨੇਸ਼ਵਰੀ ਯਾਦਵ ਨੇ ਸੋਮਵਾਰ ਨੂੰ ਚਾਂਦੀ ਦਾ ਤਗਮਾ ਜਿੱਤਿਆ। ਮੁਥੂੱਪਾਂਡੀ ਨੇ ਪੁਰਸ਼ਾਂ ਦੇ 65 ਕਿਲੋਗ੍ਰਾਮ ਮੁਕਾਬਲੇ ’ਚ ਚਾਂਦੀ ਦਾ ਤਗਮਾ ਜਿੱਤਿਆ। ਰਾਜਾ ਮੁਥੂੱਪਾਂਡੀ ਨੇ ਮੁਕਾਬਲੇ ’ਚ ਕੁੱਲ 286 ਕਿਲੋਗ੍ਰਾਮ ਭਾਰ ਚੁੱਕ ਕੇ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਤਾਮਿਲਨਾਡੂ ਦੇ ਲਿਫਟਰ ਨੇ ਸਨੈਚ ’ਚ 126 ਕਿਲੋਗ੍ਰਾਮ ਤੇ ਕਲੀਨ ਐਂਡ ਜਰਕ ’ਚ 160 ਕਿਲੋਗ੍ਰਾਮ ਭਾਰ ਚੁੱਕਿਆ। ਮਲੇਸ਼ੀਆ ਦੇ ਅਜ਼ਨਿਲ ਬਿਦਿਨ ਨੇ ਸੋਨ ਤਗਮਾ ਜਿੱਤਿਆ। ਬਿਦਿਨ ਨੇ 299 ਕਿਲੋਗ੍ਰਾਮ ਦੇ ਰਿਕਾਰਡ ਨਾਲ ਸੋਨ ਤਗਮਾ ਜਿੱਤਿਆ। ਰਾਜਾ ਦੇ ਪੋਡੀਅਮ ਫਿਨਿਸ਼ ਨੇ ਐਤਵਾਰ ਨੂੰ ਭਾਰਤ ਦੀ ਵੇਟਲਿਫਟਿੰਗ ਟੀਮ ਲਈ ਇਕ ਯਾਦਗਾਰ ਪ੍ਰਦਰਸ਼ਨ ਨੂੰ ਸਮਾਪਤ ਕੀਤਾ, ਜੋ ਖੇਡਾਂ ਦੇ ਚੌਥੇ ਦਿਨ ਦੇ ਮੁੱਖ ਆਕਰਸ਼ਣਾਂ ਵਿਚੋਂ ਇਕ ਬਣ ਕੇ ਉਭਰਿਆ। ਭਾਰਤੀ ਮਹਿਲਾ ਭਾਰਤੋਲਕ ਗਿਆਨੇਸ਼ਵਰੀ ਯਾਦਵ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ 53 ਕਿਲੋਗ੍ਰਾਮ ਭਾਰ ਵਰਗ ’ਚ ਚਾਂਦੀ ਦਾ ਤਗਮਾ ਜਿੱਤਿਆ। ਗਿਆਨੇਸ਼ਵਰੀ ਨੇ ਸਨੈਚ ’ਚ 88 ਕਿਲੋਗ੍ਰਾਮ ਤੇ ਕਲੀਨ ਐਂਡ ਜਰਕ ’ਚ 111 ਕਿਲੋਗ੍ਰਾਮ ਨਾਲ ਕੁੱਲ 199 ਕਿਲੋਗ੍ਰਾਮ ਭਾਰ ਚੁੱਕਦੇ ਹੋਏ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਨਾਈਜੀਰੀਆ ਦੀ ਓਨੋਮ ਓਮੋਲੋਲਾ ਡਿਡੀਹ ਨੇ ਕੁੱਲ 206 ਕਿਲੋਗ੍ਰਾਮ (93 + 113) ਭਾਰ ਚੁੱਕ ਕੇ ਸੋਨ ਤਗਮਾ ਜਿੱਤਿਆ, ਤੇ ਕੈਨੇਡਾ ਦੀ ਰੇਬੇਕਾ ਗਰੋਲਕਸ ਨੇ ਕੁੱਲ 178 ਕਿਲੋਗ੍ਰਾਮ (83 + 95) ਭਾਰ ਚੁੱਕ ਕੇ ਕਾਂਸੀ ਦਾ ਤਗਮਾ ਜਿੱਤਿਆ। ਭਾਰਤ ਨੇ ਹੁਣ ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ’ਚ ਪੰਜ ਤਗਮੇ ਜਿੱਤੇ ਹਨ, ਜਿਨ੍ਹਾਂ ’ਚੋਂ ਚਾਰ ਵੇਟਲਿਫਟਿੰਗ ’ਚ ਆਏ ਹਨ। ਭਾਰਤ ਨੇ ਇਕ ਸੋਨ, ਤਿੰਨ ਚਾਂਦੀ ਤੇ ਇਕ ਕਾਂਸੀ ਦਾ ਤਗਮਾ ਜਿੱਤਿਆ ਹੈ।
ਰਾਸ਼ਟਰਪਤੀ ਤੇ ਪ੍ਰਧਾਨ ਮੰਤਰੀ ਨੇ ਦਿੱਤੀ ਵਧਾਈ
ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੁੱਥੂਪਾਂਡੀ ਤੇ ਗਿਆਨੇਸ਼ਵਰੀ ਯਾਦਵ ਨੂੰ ਉਸਦੀ ਯਾਦਗਾਰ ਸਫਲਤਾ ’ਤੇ ਵਧਾਈ ਦਿੱਤੀ ਹੈ। ਆਪਣੇ ਅਧਿਕਾਰਤ ‘ਐਕਸ’ ਖਾਤੇ ’ਤੇ, ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਨੇ ਲਿਖਿਆ ਕਿ ਰਾਜਾ ਮੁੱਥੂਪਾਂਡੀ ਤੇ ਗਿਆਨੇਸ਼ਵਰੀ ਯਾਦਵ ਨੂੰ ਹਾਰਦਿਕ ਵਧਾਈਆਂ। ਦੇਸ਼ ਤੁਹਾਡੀ ਪ੍ਰਾਪਤੀ ’ਤੇ ਮਾਣ ਕਰਦਾ ਹੈ। ਤੁਹਾਡੇ ਭਵਿੱਖ ਦੇ ਯਤਨਾਂ ਲਈ ਮੇਰੀਆਂ ਸ਼ੁਭਕਾਮਨਾਵਾਂ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਉਨ੍ਹਾਂ ਨੂੰ ਵਧਾਈ ਦਿੱਤੀ ਤੇ ਭਾਰਤ ਦੀ ਵਧਦੀ ਗਿਣਤੀ ’ਚ ਇਕ ਹੋਰ ਤਗਮਾ ਜੋੜਨ ਲਈ ਲਿਫਟਰ ਦੀ ਪ੍ਰਸ਼ੰਸਾ ਕੀਤੀ। ਮੋਦੀ ਨੇ ਆਪਣੇ ਐਕਸ ਅਕਾਊਂਟ ’ਤੇ ਲਿਖਿਆ ਕਿ ਰਾਜਾ ਮੁੱਥੂਪਾਂਡੀ ਤੇ ਗਿਆਨੇਸ਼ਵਰੀ ਯਾਦਵ ਨੂੰ ਵਧਾਈਆਂ। ਹਰ ਭਾਰਤੀ ਉਨ੍ਹਾਂ ਦੀ ਸਫਲਤਾ ’ਤੇ ਖੁਸ਼ ਤੇ ਮਾਣ ਮਹਿਸੂਸ ਕਰਦਾ ਹੈ। ਉਨ੍ਹਾਂ ਦੇ ਭਵਿੱਖ ਦੇ ਯਤਨਾਂ ਲਈ ਮੇਰੀਆਂ ਸ਼ੁਭਕਾਮਨਾਵਾਂ।