ਸੁਰੱਖਿਆ ਦੇ ਪੁਖ਼ਤਾ ਇੰਤਜ਼ਾਮ 7000 ਜਵਾਨ ਤੇ 4800 ਟ੍ਰੈਫ਼ਿਕ ਮੁਲਾਜ਼ਮ ਤਾਇਨਾਤ

ਭਾਰਤ ਮੰਡਪਮ ਦੇ 5 ਕਿੱਲੋਮੀਟਰ ਦੇ ਘੇਰੇ ’ਚ ਬਹੁ ਪੱਧਰੀ ਸੁਰੱਖਿਆ
ਭਾਰਤ ਮੰਡਪਮ ਜਿਥੇ ਬ੍ਰਿਕਸ ਸੰਮੇਲਨ ਹੋਣਾ ਹੈ, ਦੇ ਆਸਪਾਸ ਤਕਰੀਬਨ 5 ਕਿੱਲੋਮੀਟਰ ਦੇ ਘੇਰੇ ’ਚ ਸੁਰੱਖਿਆ ਵਿਵਸਥਾ ਬਹੁ ਪੱਧਰੀ ਕੀਤੀ ਗਈ ਹੈ। ਸੁਰੱਖਿਆ ਦੇ ਬਾਹਰੀ ਘੇਰੇ ’ਚ ਦਿੱਲੀ ਪੁਲਿਸ ਅਤੇ ਨੀਮ ਫ਼ੌਜੀ ਦਲਾਂ ਦੇ ਜਵਾਨ ਤਾਇਨਾਤ ਰਹਿਣਗੇ। ਉਸ ਤੋਂ ਬਾਅਦ ਭਾਰਤ ਮੰਡਪਮ ਦੇ ਆਸਪਾਸ ਅਤੇ ਅੰਦਰ ਦੇ ਹਿੱਸਿਆਂ ’ਚ ਐਨ.ਐਸ.ਜੀ. ਕਮਾਂਡੋ ਅਤੇ ਹੋਰ ਸੁਰੱਖਿਆ ਏਜੰਸੀਆਂ ਦੇ ਜਵਾਨ ਸੁਰੱਖਿਆ ਸੰਭਾਲਣਗੇ। ਜਦਕਿ ਭਾਰਤ ਮੰਡਪਮ ਦੀ ਅੰਦਰਲੀ ਸੁਰੱਖਿਆ ਵਿਵਸਥਾ ’ਚ ਦਿੱਲੀ ਪੁਲਿਸ ਦੇ ਨਾਲ ਆਈ.ਬੀ., ਐਸ.ਪੀ.ਜੀ. ਅਤੇ ਐਨ.ਐਸ.ਜੀ. ਸਮੇਤ ਹੋਰ ਏਜੰਸੀਆਂ ਵੀ ਸ਼ਾਮਿਲ ਹੋਣਗੀਆਂ। ਬ੍ਰਿਕਸ ਸੰਮੇਲਨ ਲਈ ਦਿੱਲੀ ’ਚ ਤਕਰੀਬਨ 7 ਹਜ਼ਾਰ ਸੁਰੱਖਿਆ ਮੁਲਾਜ਼ਮਾਂ ਦੀ ਤਾਇਨਾਤੀ ਕੀਤੀ ਗਈ ਹੈ ਜੋ ਭਾਰਤ ਮੰਡਪਮ, ਹੋਟਲਾਂ, ਵੀ.ਵੀ.ਆਈ.ਪੀ. ਰੂਟਾਂ, ਸੰਵੇਦਨਸ਼ੀਲ ਥਾਵਾਂ ਅਤੇ ਹੋਰ ਅਹਿਮ ਪੁਆਇੰਟਾਂ ’ਤੇ ਹੋਣਗੇ।