ਗੁਰਦਾਸਪੁਰ, 10 ਮਈ (ਅਸ਼ੋਕ ਸ਼ਰਮਾ)-ਪਾਵਰਕਾਮ ਤੇ ਟਰਾਂਸਕੋ ਪੈਨਸ਼ਨਰਜ਼ ਯੂਨੀਅਨ ਏਟਕ ਮੰਡਲ ਯੂਨਿਟ ਗੁਰਦਾਸਪੁਰ ਦਾ ਵਫ਼ਦ ਕਾਮਰੇਡ ਬਲਵਿੰਦਰ ਸਿੰਘ ਉਦੀਪੁਰ ਦੀ ਅਗਵਾਈ ਹੇਠ ਵਧੀਕ ਨਿਗਰਾਨ ਇੰਜੀਨੀਅਰ ਨੰੂ ਮਿਲਿਆ | ਇਸ ਮੌਕੇ ਮੰਡਲ ਪ੍ਰਧਾਨ ਨਿਰਮਲ ਸਿੰਘ ਬਸਰਾ, ਰੂਪ ਲਾਲ, ਜੋਗਿੰਦਰਪਾਲ, ਰਣਜੀਤ ਸਿੰਘ ਦੋਰਾਂਗਲਾ, ਗੁਲਜ਼ਾਰੀ ਲਾਲ ਨੰਦਾ, ਨਿਰਮਲ ਸਿੰਘ ਸੋਹਲ, ਪਰਮਜੀਤ ਆਦਿ ਸ਼ਾਮਿਲ ਹੋਏ | ਇਸ ਮੌਕੇ ਵਫ਼ਦ ਵਲੋਂ ਵਧੀਕ ਨਿਗਰਾਨ ਇੰਜੀਨੀਅਰ ਨੰੂ ਮੰਗਾਂ ਤੋਂ ਜਾਣੂ ਕਰਵਾਇਆ ਗਿਆ | ਉਨ੍ਹਾਂ ਦੱਸਿਆ ਕਿ ਮੱੁਖ ਦਫ਼ਤਰ ਪਟਿਆਲਾ ਦੀਆਂ ਹਦਾਇਤਾਂ ਤਹਿਤ 2016 ਤੋਂ ਤਨਖ਼ਾਹ ਸਕੇਲ ਦਾ ਬਕਾਇਆ ਤੇ ਏਰੀਅਰ ਦੀ ਪਹਿਲੀ ਕਿਸ਼ਤ ਅਪ੍ਰੈਲ ਮਹੀਨੇ ਦੀ ਪੈਨਸ਼ਨ ਨਾਲ ਮਿਲਣੀ ਚਾਹੀਦੀ ਸੀ | ਪਰ ਬਹੁਤ ਸਾਰੇ ਪੈਨਸ਼ਨਰਜ਼ ਇਸ ਤੋਂ ਵਾਂਝੇ ਰਹਿ ਗਏ ਹਨ | ਜਿਸ ਕਾਰਨ ਉਨ੍ਹਾਂ 'ਚ ਚੇਅਰਮੈਨ ਪਟਿਆਲਾ ਪ੍ਰਤੀ ਰੋਸ ਹੈ | ਜਿਸ 'ਤੇ ਵਧੀਕ ਨਿਗਰਾਨ ਇੰਜੀਨੀਅਰ ਤੇ ਮੰਡਲ ਅਕਾਉਂਟੈਂਟ ਨੇ ਦੱਸਿਆ ਕਿ ਮੰਡਲ ਅਧੀਨ ਪੈਨਸ਼ਨਰਾਂ ਦੀ ਗਿਣਤੀ ਜ਼ਿਆਦਾ ਹੈ | ਪਰ ਇਸ ਦੇ ਬਾਵਜੂਦ 2020 ਤੱਕ ਦੇ ਸੇਵਾ ਮੁਕਤ ਕਰਮਚਾਰੀਆਂ ਨੰੂ ਪਹਿਲੀ ਕਿਸ਼ਤ ਖਾਤਿਆਂ ਵਿਚ ਪਾ ਦਿੱਤੀ ਹੈ ਅਤੇ ਰਹਿੰਦੇ ਪੈਨਸ਼ਨਰਾਂ ਦੀਆਂ ਦੋ ਕਿਸ਼ਤਾਂ ਇਕੱਠੀਆਂ 21 ਮਈ ਤੱਕ ਪਾ ਦਿੱਤੀਆਂ ਜਾਣਗੀਆਂ |
