ਧਾਰੀਵਾਲ, 15 ਮਈ (ਸਵਰਨ ਸਿੰਘ, ਜੇਮਸ ਨਾਹਰ)-ਥਾਣਾ ਧਾਰੀਵਾਲ ਦੇ ਏ.ਐੱਸ.ਆਈ. ਗੁਰਮੇਜ ਸਿੰਘ ਸਮੇਤ ਪੁਲਿਸ ਪਾਰਟੀ ਗਸ਼ਤ ਦੌਰਾਨ ਜੀ.ਟੀ. ਰੋਡ ਪਿੰਡ ਰਣੀਆਂ, ਧਾਰੀਵਾਲ ਵਿਖੇ ਇਤਲਾਹ ਮਿਲੀ ਕਿ ਨੀਰਜ ਕੁਮਾਰ ਪੁੱਤਰ ਬਲਵਿੰਦਰ ਕੁਮਾਰ ਵਾਸੀ ਨਿਊ ਮਾਡਲ ਟਾਊਨ, ਸਿਵਲ ਲਾਇਨ ਬਟਾਲਾ ਤੇ ਜਸਪਾਲ ਸਿੰਘ ਪੁੱਤਰ ਬੱਗਾ ਕੁਮਾਰ ਵਾਸੀ ਸੰਤ ਨਗਰ ਸੇਖਵਾਂ ਮਿਲ ਕੇ ਆਪਣੀ ਦੁਕਾਨ 'ਅਮਰਨਾਥ ਰੇਹੜੀ ਹਾਊਸ' ਨੇੜੇ ਬਿਧੀਪੁਰ ਫਾਟਕ ਵਿਖੇ ਪਾਬੰਦੀਸ਼ੁਦਾ ਜੁਗਾੜੂ ਰੇਹੜੀਆਂ ਤਿਆਰ ਕਰਦੇ ਤੇ ਉਨ੍ਹਾਂ ਨੂੰ ਮੋਟਰਸਾਈਕਲਾਂ ਨਾਲ ਫਿੱਟ ਕਰਕੇ ਵੇਚਣ ਦਾ ਕੰਮ ਕਰ ਰਹੇ ਹਨ | ਇਤਲਾਹ ਕਰਤਾ ਨੇ ਉਲੀਕੇ ਨੂੰ ਦੱਸਿਆ ਕਿ ਇਹ ਜੁਗਾੜੂ ਵਾਹਨ ਨਾ ਤਾਂ ਕਿਸੇ ਪ੍ਰਮਾਣਿਤ ਕੰਪਨੀ ਵਲੋਂ ਮਨਜ਼ੂਰਸ਼ੁਦਾ ਹਨ ਤੇ ਨਾ ਹੀ ਇਨ੍ਹਾਂ ਵਿਚ ਸੁਰੱਖਿਆ ਲਈ ਲੋੜੀਂਦੇ ਬਰੇਕ ਆਦਿ ਢੰਗ ਨਾਲ ਲੱਗੇ ਹੋਏ ਹਨ | ਇਨ੍ਹਾਂ ਵਾਹਨਾਂ ਦੇ ਸੜਕਾਂ 'ਤੇ ਚੱਲਣ ਨਾਲ ਚਾਲਕਾਂ ਤੇ ਆਮ ਰਾਹਗੀਰਾਂ ਦੀ ਜਾਨ ਨੂੰ ਖਤਰਾ ਬਣਿਆਂ ਰਹਿੰਦਾ ਹੈ | ਪੁਲਿਸ ਅਨੁਸਾਰ ਮਾਣਯੋਗ ਡਿਪਟੀ ਕਮਿਸ਼ਨਰ ਗੁਰਦਾਸਪੁਰ ਵਲੋਂ ਜਾਰੀ ਹੁਕਮਾਂ ਤਹਿਤ ਅਜਿਹੀਆਂ ਜੁਗਾੜੂ ਰੇਹੜੀਆਂ ਬਣਾਉਣ ਅਤੇ ਵੇਚਣ 'ਤੇ ਪਾਬੰਦੀ ਲਗਾਈ ਹੋਈ ਹੈ | ਇਸ ਤੋਂ ਇਲਾਵਾ ਪੰਜਾਬ ਸਰਕਾਰ ਵਲੋਂ ਵੀ 3 ਦਸੰਬਰ 2025 ਨੂੰ ਜਾਰੀ ਪੱਤਰ ਰਾਹੀਂ ਅਜਿਹੇ ਵਾਹਨਾਂ ਖ਼ਿਲਾਫ਼ ਕਾਰਵਾਈ ਕਰਨ ਦੇ ਨਿਰਦੇਸ਼ ਜਾਰੀ ਕੀਤੇ ਗਏ ਹਨ | ਪੁਲਿਸ ਨੇ ਦੱਸਿਆ ਕਿ ਦੋਵੇਂ ਵਿਅਕਤੀ ਇਹ ਜੁਗਾੜੂ ਵਾਹਨ ਵੇਚਣ ਲਈ ਗੁਰਦਾਸਪੁਰ ਸਾਈਡ ਲੈ ਕੇ ਜਾ ਰਹੇ ਸਨ, ਜਿਸ 'ਤੇ ਕਾਰਵਾਈ ਕਰਦਿਆਂ ਉਨ੍ਹਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਕੇ ਦੋਨਾਂ ਨੂੰ ਕਾਬੂ ਕੀਤਾ |
