ਧਾਰਕਲਾਂ, 17 ਜੂਨ (ਨਰੇਸ਼ ਪਠਾਨੀਆ)-ਪੰਜਾਬ ਸਰਕਾਰ ਦੇ ਮਾਲ ਵਿਭਾਗ ਵਲੋਂ ਹਾਲ ਵਿਚ ਕੀਤੀਆਂ ਬਦਲੀਆਂ ਦੇ ਦੌਰਾਨ ਨਾਇਬ ਤਹਿਸੀਲਦਾਰ ਧਾਰਕਲਾਂ ਵਿਖੇ ਬਲਵੰਤ ਸਿੰਘ ਨੂੰ ਨਿਯੁਕਤ ਕੀਤਾ ਗਿਆ ਹੈ। ਜਿਨ੍ਹਾਂ ਅੱਜ ਧਾਰਕਲਾਂ ਤਹਿਸੀਲ ਵਿਖੇ ਪਹੁੰਚ ਕੇ ਆਪਣਾ ਕਾਰਜਕਾਲ ਸੰਭਾਲਿਆ। ਉਹ ਹੁਸ਼ਿਆਰਪੁਰ ਤੋਂ ਬਦਲ ਕੇ ਆਏ ਹਨ। ਇੱਥੇ ਪਹਿਲਾਂ ਤੋਂ ਤਾਇਨਾਤ ਨਾਇਬ ਤਹਿਸੀਲਦਾਰ ਸੰਜੀਵ ਪਠਾਨੀਆ ਦਾ ਅੰਮ੍ਰਿਤਸਰ ਵਿਖੇ ਤਬਦਲਾ ਹੋ ਗਿਆ ਹੈ। ਨਵ ਨਿਯੁਕਤ ਨਾਇਬ ਤਹਿਸੀਲਦਾਰ ਧਾਰਕਲਾਂ ਬਲਵੰਤ ਸਿੰਘ ਦੇ ਧਾਰਕਲਾਂ ਤਹਿਸੀਲ ਪਹੁੰਚਣ ’ਤੇ ਤਹਿਸੀਲ ਧਾਰਕਲਾਂ ਸਟਾਫ ਨੇ ਉਨ੍ਹਾਂ ਦਾ ਮਾਣ ਸਤਿਕਾਰ ਕੀਤਾ। ਇਸ ਮੌਕੇ ਸਮਾਜ ਸੇਵਕ ਰਾਕੇਸ਼ ਕੁਮਾਰ ਨੇ ਫੁੱਲਾਂ ਦਾ ਗੁਲਦਸਤਾ ਭੇਟ ਕਰਕੇ ਉਨ੍ਹਾਂ ਦਾ ਸਵਾਗਤ ਕੀਤਾ ਅਤੇ ਇਸ ਮੌਕੇ ਰੀਡਰ ਐਸ.ਡੀ.ਐਮ. ਧਾਰਕਲਾਂ ਅੰਗਦ ਸਿੰਘ, ਰਾਜ ਕੁਮਾਰ, ਨਿਰਦੋਸ਼ ਸ਼ਰਮਾ, ਅਮਰੀਕ ਸਿੰਘ, ਖੁਸ਼ਵਿੰਦਰ ਸਿੰਘ ਅਤੇ ਨਰੇਸ਼ ਕੁਮਾਰ ਆਦਿ ਮੌਜੂਦ ਸਨ।
