ਮੰਡੀ ਘੁਬਾਇਆ, 19 ਮਈ (ਅਮਨ ਬਵੇਜਾ)-ਜਿੱਥੇ ਇਕ ਪਾਸੇ ਸ਼ਹਿਰਾਂ ਦੇ ਬੱਚੇ ਮੋਬਾਈਲ ਤੇ ਵੀਡੀਓ ਗੇਮਾਂ ਵਿਚ ਉਲਝ ਕੇ ਖੇਡ ਮੈਦਾਨਾਂ ਤੋਂ ਦੂਰ ਹੋ ਰਹੇ ਹਨ, ਉੱਥੇ ਪੰਜਾਬ ਦੇ ਪਿੰਡਾਂ ਦੇ ਬੱਚੇ ਅੱਜ ਵੀ ਗੁੱਲੀ-ਡੰਡਾ, ਕਬੱਡੀ 'ਤੇ ਖੁੱਦੋ-ਖੂੰਡੀ, ਪਿੱਠੂ ਗੇਮ ਵਰਗੀਆਂ ਸਦੀਆਂ ਪੁਰਾਣੀਆਂ ਪੇਂਡੂ ਖੇਡਾਂ ਨੂੰ ਖੇਡ ਕੇ ਆਪਣੀ ਵਿਰਾਸਤ ਨੂੰ ਸੰਭਾਲ ਰਹੇ ਹਨ | ਇਹ ਬੱਚੇ ਨਾ ਸਿਰਫ਼ ਆਪਣੇ ਵਿਰਸੇ ਨੂੰ ਸਾਂਭ ਰਹੇ ਹਨ, ਸਗੋਂ ਸਿਹਤਮੰਦ ਜੀਵਨ ਦੀ ਮਿਸਾਲ ਵੀ ਬਣ ਰਹੇ ਹਨ | ਬੇਸ਼ੱਕ ਗਰਮੀ ਦੇ ਇਹ ਦਿਨ ਤਪਦੀ ਲੋਅ ਵਾਲੇ ਹਨ ਪਰ ਫਿਰ ਵੀ ਕਈ ਪਿੰਡਾਂ ਦੇ ਗਰਾੳਾੂਡ ਸ਼ਾਮ ਹੁੰਦਿਆਂ ਹੀ ਬੱਚਿਆਂ ਅਤੇ ਨੌਜਵਾਨਾਂ ਨਾਲ ਭਰ ਜਾਂਦੇ ਹਨ | ਇਹ ਬੱਚੇ ਕਦੇ ਕਬੱਡੀ, ਕਦੇ ਵਾਲੀਬਾਲ ਤੇ ਕਦੇ ਹੋਰ ਖੇਡਾਂ ਖੇਡਦੇ ਹਨ | ਬੱਚੇ ਦੱਸਦੇ ਹਨ ਕਿ ਮੋਬਾਈਲ ਨਾਲੋਂ ਇੱਥੇ ਜ਼ਿਆਦਾ ਮਜ਼ਾ ਆਉਂਦਾ ਪਰ ਵੱਡੇ ਸ਼ਹਿਰਾਂ ਵਿਚ ਹਾਲਾਤ ਚਿੰਤਾਜਨਕ ਹਨ | ਫਲੈਟ ਸਭਿਆਚਾਰ ਕਾਰਨ ਬੱਚਿਆਂ ਕੋਲ ਖੇਡਣ ਲਈ ਥਾਂ ਹੀ ਨਹੀਂ ਬਚੀ | ਮਾਪੇ ਵੀ ਬੱਚਿਆਂ ਦੇ ਸੁਰੱਖਿਅਤ ਰਹਿਣ ਲਈ ਉਨ੍ਹਾਂ ਨੂੰ ਘਰੋਂ ਬਾਹਰ ਨਹੀਂ ਨਿਕਲਣ ਦਿੰਦੇ | ਨਤੀਜਾ ਇਹ ਕਿ 6 ਸਾਲ ਦਾ ਬੱਚਾ ਵੀ ਮੋਟਾਪੇ, ਚਸ਼ਮੇ ਤੇ ਹੋਰ ਬਿਮਾਰੀਆਂ ਤੋਂ ਪੀੜਤ ਹੈ | ਬੱਚਿਆਂ ਵਿਚ ਵਿਟਾਮਿਨ-ਡੀ ਦੀ ਕਮੀ, ਮੋਟਾਪਾ ਤੇ ਚਿੰਤਾ ਦੀ ਬਿਮਾਰੀ ਹੈ | ਇਸ ਦਾ ਸੱਭ ਤੋਂ ਵੱਡਾ ਕਾਰਨ ਹੈ ਸਰੀਰਕ ਗਤੀਵਿਧੀ ਦੀ ਘਾਟ ਹੈ | ਪੇਂਡੂ ਖੇਡਾਂ ਸਿਰਫ਼ ਮਨੋਰੰਜਨ ਨਹੀਂ ਸਗੋਂ ਸਾਡੇ ਸਭਿਆਚਾਰ ਦਾ ਹਿੱਸਾ ਹਨ | ਕਬੱਡੀ ਟੀਮ ਵਰਕ ਸਿਖਾਉਂਦੀ ਹੈ, ਗੁੱਲੀ-ਡੰਡਾ ਨਿਸ਼ਾਨਾ ਪੱਕਾ ਕਰਦਾ ਹੈ ਤੇ ਖਿੱਦੋ ਖੰੂਡੀ ਇੱਕ-ਦੂਜੇ ਦੀ ਮਦਦ ਕਰਨਾ ਸਿਖਾਉਂਦੀ ਹੈ | ਇਹ ਖੇਡਾਂ ਬਿਨਾਂ ਕਿਸੇ ਖ਼ਰਚੇ ਤੋਂ ਖੇਡੀਆਂ ਜਾ ਸਕਦੀਆਂ ਹਨ | ਪਿੰਡਾਂ ਦੇ ਬੱਚਿਆਂ ਦਾ ਇੱਕ ਡੰਡਾ ਤੇ ਗੁੱਲੀ ਜਾਂ ਪੁਰਾਣੇ ਕੱਪੜੇ ਦੀ ਗੇਂਦ ਨਾਲ ਹੀ ਸਾਰਾ ਦਿਨ ਲੰਘ ਜਾਂਦਾ ਹੈ | ਸਮੇਂ ਦੇ ਨਾਲ ਬੇਸ਼ੱਕ ਬਹੁਤ ਕੁੱਝ ਬਦਲ ਰਿਹਾ ਹੈ ਅਤੇ ਪਰ ਸ਼ਹਿਰੀ ਬੱਚਿਆਂ ਦੀ ਸਿਹਤਮੰਦ ਜੀਵਨ ਸ਼ੈਲੀ ਵੱਲ ਧਿਆਨ ਨਹੀਂ ਦਿੱਤਾ ਜਾ ਰਿਹਾ |
