ਅਬੋਹਰ, 31 ਜੁਲਾਈ (ਵਿਵੇਕ ਹੂੜੀਆ)-ਨਸ਼ਾ ਇਨਸਾਨ ਤੋਂ ਉਸ ਦਾ ਪਰਿਵਾਰ ਅਤੇ ਆਤਮਸਨਮਾਨ ਤੱਕ ਖੋਹ ਲੈਂਦਾ ਹੈ, ਪਰ ਜੇਕਰ ਸਹੀ ਸਮੇਂ ’ਤੇ ਮਦਦ ਅਤੇ ਹੌਸਲਾ ਮਿਲ ਜਾਵੇ ਤਾਂ ਇਸ ਤੋਂ ਨਿਜਾਤ ਪਾਈ ਜਾ ਸਕਦੀ ਹੈ। ਅਜਿਹੀ ਹੀ ਇਕ ਪ੍ਰੇਰਨਾਦਾਇਕ ਕਹਾਣੀ ਅਬੋਹਰ ਤੋਂ ਸਾਹਮਣੇ ਆਈ ਹੈ, ਜਿੱਥੇ ਗਗਨ ਚੁੱਘ ਅਤੇ ਇੰਦਰਾ ਨਗਰੀ ਸੁਧਾਰ ਸਭਾ ਦੇ ਸਹਿਯੋਗ ਨਾਲ ਕਪੂਰਥਲਾ ਨਸ਼ਾ ਮੁਕਤੀ ਕੇਂਦਰ ’ਚ ਇਲਾਜ ਕਰਵਾ ਕੇ ਰੇਖਾ ਨਾਮਕ ਔਰਤ ਨੇ ਨਸ਼ੇ ਨੂੰ ਮਾਤ ਦਿੱਤੀ ਹੈ। ਆਪਣੀ ਹੱਡ-ਬੀਤੀ ਸੁਣਾਉਂਦਿਆਂ ਰੇਖਾ ਨੇ ਦੱਸਿਆ ਕਿ ਨਸ਼ੇ ਕਾਰਨ ਉਸ ਦੀ ਜ਼ਿੰਦਗੀ ਬਰਬਾਦ ਹੋ ਚੁੱਕੀ ਸੀ ਅਤੇ ਉਸ ਦਾ ਪੁੱਤਰ ਵੀ ਉਸ ਤੋਂ ਦੂਰ ਹੋ ਗਿਆ ਸੀ। 22 ਜੂਨ ਨੂੰ ਉਸ ਨੂੰ ਕਪੂਰਥਲਾ ਨਸ਼ਾ ਮੁਕਤੀ ਕੇਂਦਰ ਭੇਜਿਆ ਗਿਆ ਸੀ, ਜਿੱਥੇ ਮਹੀਨੇ ਦੇ ਇਲਾਜ ਤੋਂ ਬਾਅਦ ਉਹ ਪੂਰੀ ਤਰ੍ਹਾਂ ਠੀਕ ਹੋ ਕੇ ਪਰਤੀ ਹੈ। ਇਲਾਜ ਤੋਂ ਬਾਅਦ ਵਾਪਸ ਪਰਤਣ ’ਤੇ ਉਸ ਦਾ ਵਿੱਛੜਿਆ ਪੁੱਤਰ ਵੀ ਉਸ ਨੂੰ ਮਿਲ ਗਿਆ। ਰੇਖਾ ਨੇ ਬੰਬੇ ਇੰਸਟੀਚਿਊਟ ਪਹੁੰਚ ਕੇ ਗਗਨ ਚੁੱਘ ਅਤੇ ਉਨ੍ਹਾਂ ਦੀ ਟੀਮ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਗਗਨ ਚੁੱਘ ਨੇ ਕਿਹਾ ਕਿ ਨਸ਼ਾ ਛੱਡਣ ਦੇ ਚਾਹਵਾਨ ਹਰੇਕ ਵਿਅਕਤੀ ਦੀ ਹਰ ਸੰਭਵ ਮਦਦ ਕੀਤੀ ਜਾਵੇਗੀ।
