ਅੰਮਿ੍ਤਸਰ, 9 ਜੂਨ (ਰੇਸ਼ਮ ਸਿੰਘ)-ਦਿਮਾਗੀ ਟਿਊਮਰ ਦੀ ਸਮੇਂ ਸਿਰ ਪਛਾਣ ਅਤੇ ਇਲਾਜ ਮਰੀਜ਼ ਦੀ ਜ਼ਿੰਦਗੀ ਬਚਾਉਣ ਤੇ ਇਲਾਜ ਦੇ ਨਤੀਜਿਆਂ ਨੂੰ ਬਿਹਤਰ ਬਣਾਉਣ ਵਿਚ ਅਹਿਮ ਭੂਮਿਕਾ ਨਿਭਾਅ ਸਕਦੇ ਹਨ | ਇਹ ਪ੍ਰਗਟਾਵਾ ਫੋਰਟਿਸ ਐਸਕੋਰਟਸ ਹਸਪਤਾਲ ਦੇ ਡਾਇਰੈਕਟਰ ਨਿਊਰੋਸਰਜਰੀ ਡਾ. ਰਾਜ ਕਮਲ ਨੇ ਕੀਤਾ | ਉਨ੍ਹਾਂ ਇਕ 42 ਸਾਲਾ ਮਰੀਜ਼ ਦਾ ਹਵਾਲਾ ਦਿੰਦਿਆਂ ਦੱਸਿਆ ਕਿ ਉਸ ਨੂੰ ਲਗਾਤਾਰ ਸਿਰ ਦਰਦ, ਸੁਸਤੀ ਅਤੇ ਸਰੀਰ ਦੇ ਖੱਬੇ ਪਾਸੇ ਕਮਜ਼ੋਰੀ ਦੀ ਸ਼ਿਕਾਇਤ ਸੀ | ਜਾਂਚ ਦੌਰਾਨ ਉਸ ਦੇ ਦਿਮਾਗ ਦੇ ਸੱਜੇ ਪਾਸੇ ਇਕ ਵੱਡਾ ਟਿਊਮਰ ਮਿਲਿਆ | ਐੱਮ. ਆਰ. ਆਈ. ਵਿਚ ਇਸ ਦੀ ਪੁਸ਼ਟੀ ਹੋਈ, ਜਿਸ ਕਾਰਨ ਦਿਮਾਗ 'ਤੇ ਕਾਫੀ ਦਬਾਅ ਪੈ ਰਿਹਾ ਸੀ | ਮਰੀਜ਼ ਦੀ ਐਮਰਜੈਂਸੀ ਸਰਜਰੀ ਕਰਕੇ ਟਿਊਮਰ ਨੂੰ ਮਾਈਕ੍ਰੋਸਕੋਪ ਅਤੇ ਨਿਊਰੋਨੇਵੀਗੇਸ਼ਨ ਤਕਨੀਕ ਦੀ ਮਦਦ ਨਾਲ ਸਫਲਤਾਪੂਰਵਕ ਹਟਾਇਆ ਗਿਆ | ਬਾਇਓਪਸੀ ਵਿਚ ਇਹ ਗ੍ਰੇਡ-3 ਐਸਟ੍ਰੋਸਾਈਟੋਮਾ ਨਿਕਲਿਆ | ਉਨ੍ਹਾਂ ਦੱਸਿਆ ਕਿ ਸਰਜਰੀ ਤੋਂ ਬਾਅਦ ਮਰੀਜ਼ ਨੂੰ ਕੀਮੋਥੈਰੇਪੀ ਅਤੇ ਰੇਡੀਓਥੈਰੇਪੀ ਦਿੱਤੀ ਗਈ, ਪਰ ਤਿੰਨ ਸਾਲ ਬਾਅਦ ਟਿਊਮਰ ਮੁੜ ਸਾਹਮਣੇ ਆ ਗਿਆ | ਡਾ. ਰਾਜ ਕਮਲ ਅਨੁਸਾਰ ਜੇਕਰ ਬਿਮਾਰੀ ਦੀ ਪਛਾਣ ਪਹਿਲਾਂ ਹੋ ਜਾਂਦੀ ਤਾਂ ਨਤੀਜੇ ਹੋਰ ਬਿਹਤਰ ਹੋ ਸਕਦੇ ਸਨ | ਉਨ੍ਹਾਂ ਕਿਹਾ ਕਿ ਲਗਾਤਾਰ ਸਿਰ ਦਰਦ, ਉਲਟੀਆਂ, ਤੁਰਨ ਵਿਚ ਦਿੱਕਤ, ਬਾਂਹਾਂ ਜਾਂ ਲੱਤਾਂ ਵਿਚ ਕਮਜ਼ੋਰੀ, ਨਜ਼ਰ ਦੀ ਸਮੱਸਿਆ ਜਾਂ ਹੋਰ ਨਿਊਰੋਲੋਜੀਕਲ ਲੱਛਣਾਂ ਨੂੰ ਨਜ਼ਰਅੰਦਾਜ਼ ਨਹੀਂ ਕਰਨਾ ਚਾਹੀਦਾ | ਭਾਰਤ ਵਿਚ ਹਰ ਸਾਲ ਕਰੀਬ 28 ਹਜ਼ਾਰ ਤੋਂ 40 ਹਜ਼ਾਰ ਨਵੇਂ ਦਿਮਾਗੀ ਟਿਊਮਰ ਦੇ ਮਾਮਲੇ ਸਾਹਮਣੇ ਆਉਂਦੇ ਹਨ |
