ਤਰਨ ਤਾਰਨ, 18 ਮਈ (ਇਕਬਾਲ ਸਿੰਘ ਸੋਢੀ)-ਆਲ ਇੰਡੀਆ ਆਰਗਨਾਈਜੇਸ਼ਨ ਆਫ਼ ਕੈਮਿਸਟ ਐਂਡ ਡਰੱਗਿਸਟ ਐਸੋਸੀਏਸ਼ਨ ਅਤੇ ਪੰਜਾਬ ਕੈਮਿਸਟ ਐਸੋਸੀਏਸ਼ਨ ਵਲੋਂ 20 ਮਈ ਨੂੰ ਆਨਲਾਈਨ ਦਵਾਈਆਂ 'ਤੇ ਰੋਕ ਅਤੇ ਹੋਰ ਮੰਗਾਂ ਨੂੰ ਲੈ ਕੇ 20 ਮਈ ਨੂੰ ਹੜਤਾਲ ਕੀਤੀ ਜਾ ਰਹੀ ਹੈ, ਜਿਸ ਨੂੰ ਜ਼ਿਲ੍ਹੇ ਭਰ ਦੇ ਸਮੂਹ ਕੈਮਿਸਟ ਆਪਣੀਆਂ ਦੁਕਾਨਾਂ ਬੰਦ ਕਰਕੇ ਹੜਤਾਲ ਦਾ ਪੂਰਨਤੌਰ ਤੇ ਸਮਰਥਨ ਕਰਨ | ਇਹ ਜਾਣਕਾਰੀ ਪੰਜਾਬ ਕੈਮਿਸਟ ਐਸੋਸੀਏਸ਼ਨ ਜ਼ਿਲ੍ਹਾ ਤਰਨ ਤਾਰਨ ਦੇ ਪ੍ਰਧਾਨ ਬਿਮਲ ਅਗਰਵਾਲ, ਨਰਿੰਦਰ ਪੁਰੀ ਅਤੇ ਪਿ੍ਤਪਾਲ ਸਿੰਘ ਨੇ ਗੱਲਬਾਤ ਦੌਰਾਨ ਦਿੱਤੀ | ਉਨ੍ਹਾਂ ਕਿਹਾ ਕਿ ਆਨਲਾਈਨ ਫਾਰਮੇਸੀ 'ਤੇ ਰੋਕ ਲਗਾਉਣ, ਨਕਲੀ ਅਤੇ ਆਨਲਾਈਨ ਦਵਾਈਆਂ ਦੀ ਵਿਕਰੀ 'ਤੇ ਪੂਰਨ ਪਾਬੰਦੀ ਲਗਾਉਣ, ਜਨ ਔਸਧੀ ਕੇਂਦਰਾਂ ਵਿਚ ਬਿਨਾਂ ਲਾਇਸੰਸ ਤੋਂ ਸਾਰੀਆਂ ਦਵਾਈਆਂ ਰੱਖਣ 'ਤੇ ਰੋਕ ਲਗਾਉਣ, ਸਰਕਾਰ ਵਲੋਂ ਡਰੱਗ ਲਾਇਸੰਸ ਪੋਰਟਲ ਓ.ਐੱਨ.ਡੀ.ਐੱਲ.ਐੱਸ. ਦੀ ਗਲਤੀਆਂ ਠੀਕ ਕਰਨ, ਡਰੱਗ ਵਿਭਾਗ ਤੋਂ ਬਿਨਾਂ ਪੰਜਾਬ ਪੁਲਿਸ ਵਲੋਂ ਦਵਾਈਆਂ ਦੀਆਂ ਦੁਕਾਨਾਂ ਤੇ ਬਿਨਾਂ ਵਜ੍ਹਾ ਦਖਲ ਅੰਦਾਜੀ ਬੰਦ ਕਰਨ, ਕੈਮਿਸਟਾਂ ਉਪਰ ਥੋਪਿਆ ਗਿਆ ਐੱਚ.-1 ਰਜਿਸਟਰ ਰੱਦ ਕਰਨ, ਫਾਰਮੇਸੀ ਰਜਿਸਟ੍ਰੇਸ਼ਨ ਰਿਨਿਊਵਲ ਸੰਬੰਧੀ ਆਉਣ ਵਾਲੀਆਂ ਮੁਸ਼ਕਿਲਾਂ ਨੂੰ ਦੂਰ ਕਰਨ ਆਦਿ ਸਮੱਸਿਆਵਾਂ ਨੂੰ ਲੈ ਕੇ ਹੜਤਾਲ ਕੀਤੀ ਜਾ ਰਹੀ ਹੈ | ਉਨ੍ਹਾਂ ਸਰਕਾਰ ਪਾਸੋਂ ਮੰਗ ਕੀਤੀ ਕਿ ਕੈਮਿਸਟਾਂ ਦੀਆਂ ਮੰਗਾਂ ਨੂੰ ਤੁਰੰਤ ਮੰਨ ਕੇ ਲਾਗੂ ਕੀਤਾ ਜਾਵੇ |
