ਜਦੋਂ ਭਾਜਪਾ ਦੀ ‘ਨਸ਼ਾ ਛੱਡੋ ਸੰਕਲਪ’ ਯਾਤਰਾ ’ਚ ਮਾਤਮ ਛਾ ਗਿਆ ਭਾਜਪਾ ਕਾਰਕੁਨ ਦੀ ਹਾਦਸੇ ’ਚ ਮੌਤ ਮਗਰੋਂ ਪੁੱਜੇ ਲੋਕਾਂ ਨੇ ਧਾਰਿਆ ਮੌਨ

ਬੋਹਾ, 23 ਸਤੰਬਰ (ਰਮੇਸ਼ ਤਾਂਗੜੀ)- ਅੱਜ ਉਸ ਵੇਲੇ ਇੱਥੇ ਅਨਾਜ ਮੰਡੀ ਵਿਖੇ ਭਾਜਪਾ ਦੀ ‘ਨਸ਼ਾ ਛੱਡੋ ਸੰਕਲਪ’ ਯਾਤਰਾ ’ਚ ਪੁੱਜੇ ਸੈਂਕੜੇ ਲੋਕਾਂ ਨਾਲ ਖਚਾਖਚ ਭਰੇ ਪੰਡਾਲ ਵਿਚ ਯਾਤਰਾ ਰੈਲੀ ਸ਼ੁਰੂ ਹੋਣ ਤੋਂ ਪਹਿਲਾਂ ਭਾਰੀ ਮਾਤਮ ਛਾ ਗਿਆ ਜਦੋਂ ਪੁੱਜੇ ਆਗੂਆਂ ਨੇ ਮੰਚ ਤੋਂ ਐਲਾਨ ਕੀਤਾ ਕਿ ਬੋਹਾ ਰੈਲੀ ’ਚ ਝੁਨੀਰ ਵਲੋਂ ਭਾਗ ਲੈਣ ਲਈ ਪੁੱਜ ਰਹੇ ਭਾਜਪਾ ਯੂਥ ਕਾਰਕੁਨਾਂ ਦੀ ਗੱਡੀ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਗਈ ਅਤੇ ਮੌਕੇ ’ਤੇ ਇਕ ਯੂਥ ਕਾਰਕੁਨ ਦੀ ਮੌਤ ਹੋ ਗਈ ਹੈ, ਜਿਸ ’ਤੇ ਸਾਰਾ ਕਾਫ਼ਲਾ ਪਿੰਡ ਮਲਕੋਂ ਕੋਲ ਰੁਕ ਗਿਆ ਅਤੇ ਪੁੱਜ ਰਹੇ ਆਗੂਆਂ ਨੇ ਇਹ ਦੁਖਦਾਇਕ ਖ਼ਬਰ ਬੋਹਾ ਤੋਂ ਰਸੀਵ ਕਰਨ ਗਏ ਭਾਜਪਾ ਕਾਰਕੁਨਾਂ ਨੂੰ ਦੱਸੀ । ਮੰਚ ਤੋਂ ਰੈਲੀ ਇੰਚਾਰਜ ਬਲਵਿੰਦਰ ਸਿੰਘ ਹਾਕਮਵਾਲਾ, ਗਗਨਦੀਪ ਸ਼ਰਮਾ ਜ਼ਿਲ੍ਹਾ ਜਨਰਲ ਸਕੱਤਰ ਅਤੇ ਮੰਗਤ ਰਾਏ ਬਾਂਸਲ ਸਾਬਕਾ ਵਿਧਾਇਕ ਨੇ ਦੱਸਿਆ ਕਿ ਇਸ ਘਟਨਾ ਕਾਰਨ ਪਾਰਟੀ ਵਲੋਂ ਅੱਜ ਸਾਰੇ ਰੁਝੇਵੇਂ ਰੱਦ ਦਿੱਤੇ ਗਏ ਹਨ, ਜਿਸ ਮੌਕੇ ਹਾਜ਼ਰੀਨ ਵਲੋਂ 2 ਮਿੰਟ ਦਾ ਮੌਨ ਧਾਰ ਕੇ ਵਿੱਛੜੀ ਰੂਹ ਨੂੰ ਸ਼ਰਧਾਂਜਲੀ ਦਿੱਤੀ ਗਈ।