ਰੂਪਨਗਰ, 10 ਜੁਲਾਈ (ਸਤਨਾਮ ਸਿੰਘ ਸੱਤੀ)-ਇਨਰ ਵ੍ਹੀਲ ਕਲੱਬ ਰੂਪਨਗਰ ਵਲੋਂ ਰੋਟਰੀ ਭਵਨ ਵਿਖੇ ਸਾਲ 2026-27 ਲਈ ਅਹੁਦਾ ਸੰਭਾਲ ਸਮਾਗਮ ਕਰਵਾਇਆ ਗਿਆ। ਸਮਾਗਮ ਵਿਚ ਪਾਸਟ ਡਿਸਟ੍ਰਿਕਟ ਚੇਅਰਮੈਨ ਸ਼੍ਰੀਮਤੀ ਬ੍ਰਿਜ ਪਰਮਾਰ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਤੁਰੰਤ ਪਿਛਲੀ ਪ੍ਰਧਾਨ ਸ੍ਰੀਮਤੀ ਗੁਰਮੀਤ ਨੇ ਬੀਤੇ ਸਾਲ ਦੌਰਾਨ ਮਿਲੇ ਸਹਿਯੋਗ ਲਈ ਮੈਂਬਰਾਂ ਦਾ ਧੰਨਵਾਦ ਕੀਤਾ, ਜਦਕਿ ਬ੍ਰਿਜ ਪਰਮਾਰ ਨੇ ਕਲੱਬ ਦੀਆਂ ਸਮਾਜ ਸੇਵੀ ਗਤੀਵਿਧੀਆਂ ਦੀ ਸ਼ਲਾਘਾ ਕਰਦਿਆਂ ਨਵੀਂ ਟੀਮ ਨੂੰ ਸੇਵਾ ਅਤੇ ਦੋਸਤੀ ਦੇ ਆਦਰਸ਼ਾਂ ’ਤੇ ਚੱਲਣ ਲਈ ਪ੍ਰੇਰਿਤ ਕੀਤਾ। ਸਮਾਗਮ ਦੌਰਾਨ ਸ਼੍ਰੀਮਤੀ ਕੁਸੁਮ ਸ਼ਰਮਾ ਨੇ ਪ੍ਰਧਾਨ ਅਤੇ ਸ਼੍ਰੀਮਤੀ ਆਸ਼ਿਮਾ ਅਗਰਵਾਲ ਨੇ ਸਕੱਤਰ ਵਜੋਂ ਅਹੁਦਾ ਸੰਭਾਲਿਆ। ਇਸ ਤੋਂ ਇਲਾਵਾ ਕੁਲਵਿੰਦਰ ਕੌਰ ਉਪ-ਪ੍ਰਧਾਨ, ਬਲਵਿੰਦਰ ਕੌਰ ਜ਼ੈੱਡ.ਸੀ.ਸੀ., ਵਿਨੀਤਾ ਗੁਪਤਾ ਆਈ.ਐਸ.ਓ., ਮੀਨਲ ਵਾਸੂਦੇਵਾ ਖਜ਼ਾਨਚੀ ਅਤੇ ਸੁਪਿੰਦਰ ਕੌਰ ਸੰਪਾਦਕ ਨਿਯੁਕਤ ਕੀਤੇ ਗਏ। ਆਪਣੇ ਸੰਬੋਧਨ ਵਿਚ ਨਵੀਂ ਪ੍ਰਧਾਨ ਕੁਸੁਮ ਸ਼ਰਮਾ ਨੇ ਸਾਲ ਦਾ ਥੀਮ ਸਾਂਝਾ ਕਰਦਿਆਂ ਕਿਹਾ ਕਿ ਕਲੱਬ ਸਿਹਤ, ਸਿੱਖਿਆ ਅਤੇ ਮਹਿਲਾ ਸਸ਼ਕਤੀਕਰਨ ਨਾਲ ਜੁੜੇ ਪ੍ਰੋਜੈਕਟਾਂ ਨੂੰ ਤਰਜੀਹ ਦੇਵੇਗਾ। ਸਮਾਗਮ ਦੇ ਅੰਤ ਵਿਚ ਕੁਲਵਿੰਦਰ ਕੌਰ ਨੇ ਧੰਨਵਾਦ ਕੀਤਾ।
