ਬਰਗਾੜੀ, 7 ਜੁਲਾਈ (ਸੁਖਰਾਜ ਸਿੰਘ ਗੋਂਦਾਰਾ)-ਪਿੰਡ ਬਰਗਾੜੀ ਸਮੇਤ ਨੇੜਲੇ ਪਿੰਡਾਂ ਸਾਹੋਕੇ, ਮੱਲਕੇ, ਸੇਖਾ ਖੁਰਦ ਆਦਿ ਪਿੰਡਾਂ ਨੂੰ ਜੋੜਨ ਵਾਲੀ ਮੁੱਖ ਸੜਕ _ਤੇ ਪਿੰਡ ਦੀ ਵੱਡੀ ਧਰਮਸ਼ਾਲਾ ਦੇ ਨਜ਼ਦੀਕ ਵੱਡੀ ਨਿਕਾਸੀ ਨਾਲੀ ’ਤੇ ਬਣੀ ਪੁਲੀ ਦਾ ਕੁਝ ਹਿੱਸਾ ਟੁੱਟ ਚੁੱਕਾ ਹੈ। ਇਸ ਟੁੱਟੀ ਪੁਲੀ ਕਾਰਨ ਕਿਸੇ ਵੀ ਸਮੇਂ ਕੋਈ ਹਾਦਸਾ ਵਾਪਰ ਸਕਦਾ ਹੈ। ਚਾਰ ਪਹੀਆਂ ਵਾਹਨਾਂ ਵਾਲਿਆਂ ਨੂੰ ਇਸ ਤੋਂ ਕੋਈ ਬਹੁਤ ਖਤਰਾ ਨਹੀਂ ਕਿਉਂਕਿ ਇਹ ਟੁੱਟੀ ਹੋਈ ਪੁਲੀ ਵਾਲੀ ਥਾਂ ਚਾਰਾਂ ਪਹੀਆਂ ਦੇ ਵਿਚਕਾਰ ਰਹਿ ਜਾਂਦੀ ਪ੍ਰੰਤੂ ਦੋ ਪਹੀਆਂ ਵਾਹਨਾਂ ਜਿਵੇਂ ਸਕੂਟਰ, ਮੋਟਰ ਸਾਈਕਲ, ਇਲੈਕਟ੍ਰਿਕ ਸਕੂਟਰ ਤੇ ਸਾਈਕਲ ਸਵਾਰਾਂ ਲਈ ਇਹ ਜ਼ਿਆਦਾ ਖਤਰਨਾਕ ਸਾਬਤ ਹੋ ਸਕਦੀ ਹੈ ਕਿਉਂਕਿ ਇਹ ਟੁੱਟੀ ਹੋਈ ਪੁਲੀ ਦਾ ਦੂਰ ਤੋਂ ਪਤਾ ਨਹੀਂ ਲੱਗਦਾ ਇਸ ਕਰਕੇ ਦੋ ਪਹੀਆਂ ਵਾਹਨਾਂ ਵਾਲਿਆਂ ਦੇ ਹਾਦਸਿਆਂ ਦੇ ਜ਼ਿਆਦਾ ਸ਼ਿਕਾਰ ਹੋਣ ਦੀ ਸੰਭਾਵਨਾ ਹੈ। ਪਿੰਡ ਨਿਵਾਸੀਆਂ ਅਤੇ ਰਾਹਗੀਰਾਂ ਨੇ ਸਬੰਧਿਤ ਵਿਭਾਗ ਤੋਂ ਮੰਗ ਕੀਤੀ ਹੈ ਟੁੱਟੀ ਹੋਈ ਪੁਲੀ ਨੂੰ ਜਲਦੀ ਠੀਕ ਕੀਤਾ ਜਾਵੇ ਤਾਂ ਕਿ ਹਾਦਸਿਆਂ ਤੋਂ ਬਚਾਅ ਹੋ ਸਕੇ।
