ਨਵੀਂ ਦਿੱਲੀ, 28 ਫਰਵਰੀ (ਉਪਮਾ ਡਾਗਾ ਪਾਰਥ)-ਤਿ੍ਣਮੂਲ ਕਾਂਗਰਸ ਨੇ ਪੱਛਮੀ ਬੰਗਾਲ ਤੋਂ ਰਾਜ ਸਭ ਚੋਣਾਂ ਲਈ 4 ਉਮੀਦਵਾਰ ਐਲਾਨ ਦਿੱਤੇ ਹਨ | ਇਸ 'ਚ ਸਾਬਕਾ ਕੇਂਦਰੀ ਮੰਤਰੀ ਬਾਬੁਲ ਸੁਪਰੀਓ, ਸਾਬਕਾ ਬੰਗਾਲ ਡੀ. ਜੀ. ਪੀ. ਰਾਜੀਵ ਕੁਮਾਰ, ਸੀਨੀਅਰ ਵਕੀਲ ਮੇਨਕਾ ਗੁਰੂਸਵਾਮੀ ਅਤੇ ਬੰਗਾਲੀ ਅਦਾਕਾਰਾ ਕੋਇਲ ਮਲਿਕ ਸ਼ਾਮਿਲ ਹਨ | ਟੀ. ਐਮ. ਸੀ. ਨੇ 'ਐਕਸ' 'ਤੇ ਐਲਾਨ ਕਰਦਿਆਂ ਕਿਹਾ ਕਿ ਇਹ ਉਮੀਦਵਾਰ ਪਾਰਟੀ ਦੀ ਵਿਰਾਸਤ ਬਣਾਈ ਰੱਖਣਗੇ ਅਤੇ ਹਰ ਭਾਰਤੀ ਦੀ ਹੱਕਾਂ ਦੀ ਰਾਖੀ ਕਰਨਗੇ | ਪੱਛਮੀ ਬੰਗਾਲ ਸਮੇਤ 10 ਰਾਜਾਂ ਦੀਆਂ ਕੁੱਲ 37 ਸੀਟਾਂ 'ਤੇ ਚੋਣ ਕਮਿਸ਼ਨ ਨੇ ਚੋਣਾਂ ਦਾ ਐਲਾਨ ਕੀਤਾ ਹੈ | ਇਨ੍ਹਾਂ ਸੀਟਾਂ 'ਤੇ 16 ਮਾਰਚ ਨੂੰ ਵੋਟਿੰਗ ਹੋਵੇਗੀ | ਪੱਛਮੀ ਬੰਗਾਲ ਤੋਂ 2026 'ਚ ਰਾਜ ਸਭਾ ਦੀਆਂ 5 ਸੀਟਾਂ ਖ਼ਾਲੀ ਹੋ ਰਹੀਆਂ ਹਨ | ਇਨ੍ਹਾਂ 'ਚੋਂ 4 ਸੀਟਾਂ ਤਿ੍ਣਮੂਲ ਕੋਲ ਸਨ | ਤਿ੍ਣਮੂਲ ਕਾਂਗਰਸ ਦੇ ਉਮੀਦਵਾਰਾਂ 'ਚੋਂ ਬਾਬੁਲ ਸੁਪਰੀਓ ਮੋਦੀ ਸਰਕਾਰ 'ਚ ਸਾਬਕਾ ਕੇਂਦਰੀ ਮੰਤਰੀ ਰਹਿ ਚੁੱਕੇ ਹਨ ਅਤੇ ਸਤੰਬਰ 2021 'ਚ ਟੀ. ਐਮ. ਸੀ. 'ਚ ਸ਼ਾਮਿਲ ਹੋ ਗਏ ਹਨ | ਹੁਣ ਉਹ ਮਮਤਾ ਸਰਕਾਰ 'ਚ ਮੰਤਰੀ ਹਨ | ਰਾਜੀਵ ਕੁਮਾਰ ਸੂਬੇ ਦੇ ਡੀ. ਜੀ. ਪੀ. ਰਹੇ ਹਨ | ਮੇਨਕਾ ਗੁਰੂਸਵਾਮੀ ਸੁਪਰੀਮ ਕੋਰਟ ਦੀ ਸੀਨੀਅਰ ਐਡਵੋਕੇਟ ਹਨ | ਜਦਕਿ ਕੋਇਲ ਮਲਿਕ ਇਕ ਮਸ਼ਹੂਰ ਅਦਾਕਾਰਾ ਹਨ |