ਫ਼ਾਜ਼ਿਲਕਾ, 13 ਅਪ੍ਰੈਲ (ਦਵਿੰਦਰ ਪਾਲ ਸਿੰਘ)-ਪੰਜਾਬ ਅੰਦਰ ਪਿਛਲੇ ਦਿਨਾਂ ਵਿਚ ਬੇਮੌਸਮੀ ਵਰਖਾ ਤੇ ਗੜੇਮਾਰੀ ਨਾਲ ਜੋ ਹਾੜੀ ਦੀ ਮੁੱਖ ਫ਼ਸਲ ਕਣਕ ਦਾ ਭਾਰੀ ਨੁਕਸਾਨ ਹੋਇਆ ਹੈ, ਪੱਕਣ ਦੇ ਨੇੜੇ ਪੁੱਜੀਆਂ ਕਣਕਾਂ ਧਰਤੀ 'ਤੇ ਵਿਛ ਗਈਆਂ | ਜਿਸ ਨਾਲ ਪੱਕੀਆਂ ਪਕਾਈਆਂ ਕਣਕਾਂ ਭਾਰੀ ਨੁਕਸਾਨ ਹੋਇਆ ਹੈ | ਜਿੱਥੇ ਕੁਦਰਤ ਦੇ ਇਸ ਕਹਿਰ ਨਾਲ ਕਣਕ ਦਾ ਦਾਣਾ ਬਰੀਕ ਹੋਇਆ ਉੱਥੇ ਹੀ ਮੀਂਹ ਨਾਲ ਭਿੱਜੀ ਕਣਕ ਦਾ ਦਾਣਾ ਵੀ ਬਦਰੰਗਾ ਹੋ ਗਿਆ | ਮੰਡੀਆਂ ਵਿਚ ਕਣਕ ਦੀ ਆਮਦ ਜ਼ੋਰਾਂ ਨਾਲ ਸ਼ੁਰੂ ਹੋ ਗਈ ਹੈ ਪਰ ਹਾਲੇ ਤੱਕ ਸਰਕਾਰੀ ਏਜੰਸੀਆਂ ਇਸ ਦੀ ਖ਼ਰੀਦ ਨਹੀਂ ਕਰ ਰਹੀਆਂ ਹਨ | ਜਿਸ ਦਾ ਵੱਡਾ ਕਾਰਨ ਖ਼ਰਾਬ ਹੋਏ ਦਾਣੇ ਸਬੰਧੀ ਕੇਂਦਰ ਸਰਕਾਰ ਵਲੋਂ ਕੋਈ ਫ਼ੈਸਲਾ ਨਹੀਂ ਆਇਆ ਕਿ ਕਿੰਨੇ ਫੀਸਦੀ ਖ਼ਰਾਬ ਕਣਕ ਖ਼ਰੀਦੀ ਜਾਣੀ ਹੈ | ਪੰਜਾਬ ਦੇ ਕਿਸਾਨਾਂ ਅਤੇ ਪੰਜਾਬ ਸਰਕਾਰ ਨੇ ਇਸ ਅਹਿਮ ਮੁੱਦੇ 'ਤੇ ਕੇਂਦਰ ਨੂੰ ਪੱਤਰ ਭੇਜ ਕੇ ਤੁਰੰਤ ਕਣਕ ਦਾ ਨਿਰੀਖਣ ਕਰਵਾ ਕੇ ਕਣਕ ਦੀ ਸ਼ੁਰੂਆਤ ਕਰਵਾਉਣ ਸਬੰਧੀ ਲਿਖਿਆ ਸੀ | ਜਿਸਦੇ ਮੱਦੇਨਜ਼ਰ ਕੇਂਦਰੀ ਟੀਮ ਨੇ ਪੰਜਾਬ ਦੇ ਵੱਖ-ਵੱਖ ਖੇਤਰਾਂ ਦਾ ਦੌਰਾ ਕੀਤਾ ਤੇ ਕੇਂਦਰੀ ਟੀਮ ਨੇ ਸ਼ਾਮ ਨੂੰ ਫ਼ਾਜ਼ਿਲਕਾ ਜ਼ਿਲ੍ਹੇ ਅੰਦਰ ਪੁੱਜ ਕੇ ਚਾਰ ਮੰਡੀਆਂ ਵਿਚੋਂ ਕਣਕ ਦੇ ਸੈਂਪਲ ਇਕੱਠੇ ਕੀਤੇ | ਕੇਂਦਰੀ ਟੀਮ ਦੀ ਅਗਵਾਈ ਕਰ ਰਹੇ ਅਭਿਸ਼ੇਕ ਪਾਂਡੇ ਨੇ ਦੱਸਿਆ ਕਿ ਟੀਮ ਵਲੋਂ ਹੁਣ ਤੱਕ ਕੀਤੇ ਸਰਵੇਖਣ ਅਨੁਸਾਰ ਸਾਰੇ ਪੰਜਾਬ ਵਿਚ ਹੀ ਕਣਕ ਦਾ ਨੁਕਸਾਨ ਹੋਇਆ ਹੈ | ਜਿਸ ਵਿਚ ਸਰਹੱਦੀ ਖੇਤਰ ਅੰਦਰ ਮੀਂਹ ਦਾ ਜ਼ਿਆਦਾ ਪ੍ਰਭਾਵ ਦੇਖਿਆ ਜਾ ਰਿਹਾ ਹੈ | ਉਨ੍ਹਾਂ ਦੱਸਿਆ ਕਿ ਇਹ ਸੈਂਪਲ ਇਕੱਠੇ ਕਰਕੇ ਇਸ ਦੀ ਬਰੀਕੀ ਨਾਲ ਜਾਂਚ ਕੀਤੀ ਜਾਵੇਗੀ ਫਿਰ ਇਸ ਦੀ ਸਾਰੀ ਰਿਪੋਰਟ ਬਣਾ ਕੇ ਕੇਂਦਰ ਸਰਕਾਰ ਨੂੰ ਸੌਂਪੀ ਜਾਵੇਗੀ | ਕੇਂਦਰ ਦੇ ਫ਼ੈਸਲੇ ਅਨੁਸਾਰ ਹੀ ਖ਼ਰੀਦ ਸ਼ੁਰੂ ਹੋ ਸਕੇਗੀ | ਕੇਂਦਰੀ ਟੀਮ ਨੇ ਫ਼ਾਜ਼ਿਲਕਾ ਦੀ ਮੁੱਖ ਮੰਡੀ, ਜਲਾਲਾਬਾਦ ਮੰਡੀ, ਘੁਬਾਇਆ ਮੰਡੀ ਅਤੇ ਮੰਡੀ ਲਾਧੂਕਾ ਅੰਦਰੋਂ ਵੱਖ-ਵੱਖ ਢੇਰੀਆਂ ਤੋਂ ਸੈਂਪਲ ਭਰੇ | ਇਸ ਮੌਕੇ ਫੂਡ ਸਪਲਾਈ ਦੀ ਡਿਪਟੀ ਡਾਇਰੈਕਟਰ ਮੈਡਮ ਅਤਿੰਦਰ ਕੌਰ ਤੋਂ ਇਲਾਵਾ ਐਫ.ਸੀ.ਆਈ. ਦੇ ਏਜ਼ੀਅਮ ਕੁਆਲਿਟੀ ਵੀ ਨਾਲ ਸਨ |
