ਬਾਘਾ ਪੁਰਾਣਾ, 9 ਮਈ (ਗੁਰਮੀਤ ਸਿੰਘ ਮਾਣੂੰਕੇ)-ਹਾੜੀ ਰੁੱਤ ਦੀ ਫਸਲ ਕਣਕ ਦੀ ਕਟਾਈ ਉਪਰੰਤ ਜਿੱਥੇ ਕਈ ਵਾਰ ਅਜਿਹਾ ਦੇਖਣ ਨੂੰ ਮਿਲਦਾ ਹੈ ਕਿ ਕਿਸਾਨ ਖੁਦ ਹੀ ਰਹਿੰਦ ਖੂੰਹਦ ਨੂੰ ਖਤਮ ਕਰਨ ਲਈ ਅੱਗ ਲਾ ਕੇ ਸਾੜ ਦਿੰਦੇ ਹਨ ਪਰ ਕੁੱਝ ਮਾਮਲੇ ਅਜਿਹੇ ਵੀ ਦੇਖਣ ਨੂੰ ਮਿਲਦੇ ਹਨ ਕਿ ਫਸਲ ਜਾਂ ਟਾਂਗਰ ਕੁਦਰਤੀ ਕਾਰਨਾਂ ਕਰਕੇ ਅੱਗ ਦੀ ਭੇਟ ਚੜ੍ਹ ਜਾਂਦਾ ਹੈ | ਇਸੇ ਤਰ੍ਹਾਂ ਹੀ ਪਿੰਡ ਚੰਨੂਵਾਲਾ ਵਿਖੇ ਨਹਿਰ ਨੇੜਲੇ ਵੱਖ-ਵੱਖ ਖੇਤਾਂ ਨੂੰ ਇਕ ਟਰਾਂਸਫਾਰਮ ਤੋਂ ਕੁਦਰਤੀ ਰੂਪ ਵਿੱਚ ਚੰਗਿਆੜੀ ਪੈਣ ਨਾਲ ਅੱਗ ਲੱਗ ਗਈ | ਜਿਸ ਨਾਲ ਕਣਕ ਦੀ ਫਸਲ ਕੱਟਣ ਤੋਂ ਬਾਅਦ ਬਚਿਆ ਹੋਇਆ ਟਾਂਗਰ ਅੱਗ ਦੀ ਲਪੇਟ ਵਿਚ ਆ ਗਿਆ | ਇਸ ਅੱਗ ਦੀ ਲਪੇਟ ਵਿਚ 30-35 ਏਕੜ ਦੇ ਕਰੀਬ ਟਾਂਗਰ ਸੜ ਕੇ ਸੁਆਹ ਹੋ ਗਿਆ ਅਤੇ ਇਸ ਨਾਲ ਵੱਖ-ਵੱਖ ਕਿਸਾਨ ਭਰਾਵਾਂ ਦਾ ਵਿੱਤੀ ਨੁਕਸਾਨ ਹੋਇਆ ਕਿਉਂਕਿ ਕਈ ਕਿਸਾਨਾਂ ਨੇ ਅਜੇ ਟਾਂਗਰ ਤੋਂ ਤੂੜੀ ਬਨਾਉਣੀ ਸੀ |
