ਹਲਕਾ ਬਾਘਾ ਪੁਰਾਣਾ ’ਚ ਕਾਂਗਰਸ ਪਾਰਟੀ ’ਚ ਉਮੀਦਵਾਰੀ ਦੇ ਕਈ ਦਾਅਵੇਦਾਰ
ਅਜੀਤ ਡੈਸਕ
06-07-2026
ਜਗਸੀਰ ਸਿੰਘ ਕਾਲੇਕੇ-ਹਲਕਾ ਧੜੇਬੰਦੀ ਦੌਰਾਨ ਦਰਸ਼ਨ ਸਿੰਘ ਬਰਾੜ ਨਾਲ ਸੱਜੀ ਬਾਂਹ ਬਣ ਕੇ ਖੜੇ ਨੌਜਵਾਨ ਆਗੂ ਜਗਸੀਰ ਸਿੰਘ ਕਾਲੇਕੇ ਨੂੰ ਬਰਾੜ ਧੜੇ ਵਲੋਂ ਚੇਅਰਮੈਨ ਦਾ ਅਹੁਦਾ ਦੇ ਕੇ ਨਿਵਾਜਿਆ ਪਰ ਆਪਸੀ ਤਲਖ-ਕਲਾਮੀਆਂ ਕਰਕੇ ਧੜੇ ਤੋਂ ਵੱਖ ਹੋਏ ਜਗਸੀਰ ਸਿੰਘ ਕਾਲੇਕੇ ਨੇ ਸੂਬੇ ਦੀ ਹਾਈਕਮਾਨ ਨਾਲ ਸਿੱਧੇ ਸੰਪਰਕ ਬਣਾ ਕੇ ਆਪਣਾ ਜੋਰ ਜ਼ਰੂਰ ਦਿਖਾਇਆ ਪਰ ਹਲਕੇ ਅੰਦਰ ਢਿੱਲੀਆਂ ਢਿੱਲੀਆਂ ਕਾਰਵਾਈਆਂ ਦੇ ਬਾਵਜੂਦ ਹਲਕੇ ਤੋਂ ਕਾਂਗਰਸ ਲਈ ਆਪਣੇ ਆਪ ਨੂੰ ਪਰਪੱਕ ਉਮੀਦਵਾਰ ਸਮਝ ਰਹੇ ਹਨ। ਕੁਲਵੰਤ ਸਿੰਘ ਮਲੂਕਾ-ਟਕਸਾਲੀ ਕਾਂਗਰਸੀ ਪਰਿਵਾਰ ਦੇ ਆਗੂ ਅਤੇ ਸਿੱਖਿਆ ਖੇਤਰ ‘ਚੋਂ ਸਿਆਸਤ ਵਿਚ ਪੈਰ ਧਰਨ ਵਾਲੇ ਕੁਲਵੰਤ ਸਿੰਘ ਮਲੂਕਾ ਵੀ ਹਲਕੇ ਅੰਦਰ ਆਪਣੀ ਪਛਾਣ ਬਣਾਉਣ ਲਈ ਯਤਨ ਕਰਦੇ ਨਜ਼ਰ ਆ ਰਹੇ ਹਨ। ਸ. ਮਲੂਕਾ ਨੇ ਹਾਈਕਮਾਨ ਦੇ ਵੱਖ-ਵੱਖ ਵੱਡੇ ਆਗੂਆਂ ਨਾਲ ਮੀਟਿੰਗਾਂ ਕਰਕੇ ਹਲਕੇ ਅੰਦਰ ਆਪਣੀ ਆਮਦ ਦਾ ਅਹਿਸਾਸ ਕਰਾਇਆ ਹੈ ਅਤੇ ਲੱਗ ਰਿਹਾ ਕਿ ਆਪਸੀ ਧੜੇਬੰਦੀ ਕਾਰਨ ਨਵੇਂ ਚਿਹਰੇ ਵਜੋਂ ਉਨ੍ਹਾਂ ਨੂੰ ਅੱਗੇ ਲਿਆਂਦਾ ਜਾ ਸਕਦਾ ਹੈ। ਧਰਮਪਾਲ ਡੀ.ਪੀ. ਨਿਹਾਲ ਸਿੰਘ ਵਾਲਾ-ਅਕਾਲੀ ਦਲ ਵਲੋਂ ਬਣੇ ਸਾਬਕਾ ਵਿਧਾਇਕ ਮਹੇਸ਼ਇੰਦਰ ਸਿੰਘ ਨਿਹਾਲ ਸਿੰਘ ਵਾਲਾ ਦਾ ਪੁੱਤਰ ਐਡਵੋਕੇਟ ਧਰਮਪਾਲ ਸਿੰਘ ਡੀ.ਪੀ. ਵੀ ਆਪਣੇ ਦਾਦੇ ਗੁਰਚਰਨ ਸਿੰਘ ਨਿਹਾਲ ਸਿੰਘ ਵਾਲਾ ਅਤੇ ਪਿਤਾ ਮਹੇਸ਼ਇੰਦਰ ਸਿੰਘ ਦੀਆਂ ਸਿਆਸੀ ਪਿੜਾਂ ਨੂੰ ਕਾਇਮ ਕਰਨ ਦੇ ਤਹੱਈਏ ਕਰਨ ਵਾਲੇ ਨੌਜਵਾਨ ਆਗੂ ਵਜੋਂ ਲੋਕਾਂ ਵਿਚ ਵਿਚਰ ਕੇ ਆਪਣਾ ਵਜੂਦ ਦਿਖਾਉਂਦਾ ਹੋਇਆ ਆਪਣੇ ਪ੍ਰੋੜ ਸਿਆਸੀ ਪਿਛੋਕੜ ਲਈ ਹਲਕੇ ਦੀ ਉਮੀਦਵਾਰੀ ਲਈ ਆਸਵੰਦ ਹਨ। ਹੁਣ ਦੇਖਣਾ ਇਹ ਹੈ ਕਿ ਸੂਬੇ ਪੱਧਰ ਤੋਂ ਲੈ ਕੇ ਹਲਕਾ ਪੱਧਰ ਤੱਕ ਧੜੇਬੰਦੀ ਦਾ ਸ਼ਿਕਾਰ ਕਾਂਗਰਸ ਪਾਰਟੀ ਦੇ ਆਗੂ ਧੜੇਬੰਦੀ ਦੀ ਸਚਾਈ ਨੂੰ ਕਬੂਲ ਕਰਦੇ ਹਨ ਜਾਂ ਨਹੀਂ, ਪਰ ਆਮ ਜਨਤਾ ਦੀ ਨਜ਼ਰੇ ਆਗੂਆਂ ਦੇ ਵੱਖਰੇ-ਵੱਖਰੇ ਬੋਲ ਅਤੇ ਅਲੱਗ-ਅਲੱਗ ਰਾਹਾਂ ਨੂੰ ਜਾਂਦੇ ਕਦਮ ਕਾਂਗਰਸ ਦੀ ਸਰਕਾਰ ਬਣਾਉਣ ਲਈ ਨਾਸਾਜ਼ ਮਾਹੌਲ ਦੀ ਸਿਰਜਣਾ ਕਰਦੇ ਜਾਪ ਰਹੇ ਹਨ। ਆਉਣ ਵਾਲਾ ਸਮਾਂ ਪ੍ਰਮਾਣ ਪੇਸ਼ ਕਰੇਗਾ ਕਿ ਹਲਕੇ ਦੇ ਆਗੂ ਪਾਰਟੀ ਗੁੱਟਬੰਦੀ ਨੂੰ ਖ਼ਤਮ ਕਰਕੇ ਲੋਕ ਮੱਦਾਂ ਵਿਚ ਪਾਰਟੀ ਨੂੰ ਅੱਗੇ ਲਿਆ ਕੇ ਸਰਕਾਰ ਬਣਾਉਣ ਲਈ ਸੁਹਿਰਦ ਹਨ ਜਾਂ ਨਹੀਂ।
