ਧੂਰੀ, 10 ਜੂਨ (ਸੰਜੇ ਲਹਿਰੀ) - ਪੈਨਸ਼ਨਰਜ਼ ਐਸੋਸੀਏਸ਼ਨ ਪਾਵਰਕਾਮ ਮੰਡਲ ਧੂਰੀ ਦੀ ਮੀਟਿੰਗ ਦੀ ਪ੍ਰਧਾਨਗੀ ਸੁਖਦੇਵ ਸਿੰਘ ਨੇ ਕੀਤੀ | ਜਿਸ ਵਿੱਚ ਵਿੱਛੜੇ ਸਾਥੀਆਂ ਦੀ ਆਤਮਿਕ ਸ਼ਾਂਤੀ ਲਈ ਮੌਨ ਧਾਰਕ ਕਰਕੇ ਸ਼ਰਧਾ ਦੇ ਫੁੱਲ ਭੇਟ ਕਰਦੇ ਹੋਏ ਦੁਖੀ ਪਰਿਵਾਰਾਂ ਨਾਲ ਹਮਦਰਦੀ ਪ੍ਰਗਟ ਕੀਤੀ ਗਈ | ਉਪਰੰਤ 5 ਜੂਨ ਨੂੰ ਪਾਵਰਕਾਮ ਮੁੱਖ ਦਫ਼ਤਰ ਪਟਿਆਲਾ ਦੇ ਗੇਟ ਅੱਗੇ ਆਈ.ਟੀ.ਆਈ ਸਾਥੀਆਂ 'ਤੇ ਹੋਏ ਲਾਠੀਚਾਰਜ ਦੀ ਸਖਤ ਸ਼ਬਦਾਂ 'ਚ ਨਿਖੇਧੀ ਕੀਤੀ ਗਈ | ਸੂਬਾ ਕਮੇਟੀ ਦੇ ਫ਼ੈਸਲੇ ਅਨੁਸਾਰ 17 ਜੂਨ ਨੂੰ ਜਲੰਧਰ ਵਿਖੇ ਹੋ ਰਹੀ ਸੂਬਾ ਪੱਧਰੀ ਕਨਵੈੱਨਸ਼ਨ ਵਿੱਚ ਸੂਬਾ ਵਰਕਿੰਗ ਕਮੇਟੀ ਮੈਂਬਰਾਂ, ਡਵੀਜ਼ਨਾਂ ਵਿਚੋਂ ਪੰਜ-ਪੰਜ ਸਾਥੀ ਆਪਣੇ ਝੰਡੇ, ਬੈਨਰ ਲੈ ਕੇ ਪੁੱਜਣ ਦੀ ਗੱਲ ਬਾਰੇ ਵਿਚਾਰ ਵਟਾਂਦਰਾ ਕੀਤਾ ਗਿਆ | ਮੀਟਿੰਗ 'ਚ ਸੂਬਾ ਕਮੇਟੀ ਵੱਲੋਂ ਕੈਸ਼ ਲੈਸ਼ ਸਕੀਮ ਬਾਰੇ ਸਹਿਮਤੀ ਅਤੇ ਨੋਮੀਨੇਸ਼ਨ ਦੇ ਫਾਰਮ ਭਰਵਾਉਣ ਬਾਰੇ ਵੀ ਸਹਿਮਤੀ ਪ੍ਰਗਟਾਈ ਗਈ, ਜਿਸ ਵਿੱਚ ਪੈਨਸ਼ਨਰ/ ਫੈਮਿਲੀ ਪੈਨਸ਼ਨਰਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਲਾਭ ਹੋਵੇਗਾ | ਜਥੇਬੰਦੀ ਦੀ ਏਕਤਾ ਹੋਰ ਮਜ਼ਬੂਤ ਕਰਨ ਲਈ ਵਿਚਾਰ ਕਰਦਿਆਂ ਰਹਿ ਗਈਆਂ ਮੰਗਾਂ ਜਿਵੇਂ ਕਿ 2.59 ਦੇ ਫੈਕਟਰ ਦਾ ਲਾਭ ਲੈਣਾ, 23 ਸਾਲਾਂ ਇੰਕਰੀਮੈਂਟ ਦਾ ਲਾਭ ਦੇਣ, ਵੱਧ ਰਹੀ ਮਹਿੰਗਾਈ ਨੂੰ ਮੁੱਖ ਰੱਖਦੇ ਹੋਏ ਮੈਡੀਕਲ ਵਿੱਚ 1000 ਰੁਪੈ ਤੋਂ ਵਧਾ ਕੇ 2000 ਰੁਪੈ ਕਰਨ, 16 ਫ਼ੀਸਦੀ ਡੀ.ਏ ਬਕਾਇਆ 30 ਜੂਨ ਤੱਕ ਜਾਰੀ ਕਰਨਾ ਆਦਿ ਮੰਗਾਂ ਬਾਰੇ ਪੰਜਾਬ ਸਰਕਾਰ ਦੇ ਹਾਂ ਪੱਖੀ ਰਵੱਈਏ ਦੀ ਮੰਗ ਕੀਤੀ ਗਈ | ਇਸ ਮੌਕੇ ਭੂਪ ਸਿੰਘ ਜੇ.ਈ., ਹਰਦੇਵ ਸਿੰਘ ਫੋਰਮੈਨ, ਜਸਪਾਲ ਸਿੰਘ ਖੁਰਮੀ, ਦਲਜੀਤ ਸਿੰਘ, ਇੰਦਰਜੀਤ ਸਿੰਘ, ਦਲਵੀਰ ਸਿੰਘ, ਸੰਤੋਖ ਸਿੰਘ ਅਮਰਜੀਤ ਸਿੰਘ ਅਮਨ ਅਤੇ ਸੰਤੋਖ ਸਿੰਘ ਵੀ ਹਾਜ਼ਰ ਸਨ |
