ਚੂਲ਼ੇ ਦੇ ਦਰਦ ਨੂੰ ਨਜ਼ਰਅੰਦਾਜ਼ ਨਾ ਕਰੋ

ਚੂਲ਼ੇ ਦਾ ਦਰਦ ਔਰਤਾਂ ਲਈ ਇੱਕ ਆਮ ਸਮੱਸਿਆ ਹੈ | ਜ਼ਿਆਦਾਤਰ ਔਰਤਾਂ ਡਾਕਟਰ ਨੂੰ  ਉਦੋਂ ਮਿਲਦੀਆਂ ਹਨ ਜਦੋਂ ਦਰਦ ਘਰੇਲੂ ਕੰਮ ਕਰਨ ਵਿਚ ਮੁਸ਼ਕਿਲ ਪੈਦਾ ਕਰਦਾ ਹੈ ਜਾਂ ਜਦੋਂ ਉਹ ਲੰਬੇ ਸਮੇਂ ਤੱਕ ਇਸ ਨਾਲ ਜੂਝਦੀਆਂ ਹਨ | ਸਰੀਰ ਦਾ ਇਹ ਹਿੱਸਾ ਮਜ਼ਬੂਤ ਹੁੰਦਾ ਹੈ, ਪਰ ਇਸ ਦੀ ਬਣਤਰ ਅਜਿਹੀ ਹੁੰਦੀ ਹੈ ਕਿ ਛੋਟੀਆਂ-ਛੋਟੀਆਂ ਚੀਜ਼ਾਂ ਵੀ ਇਸਦੇ ਕੰਮਕਾਜ ਵਿਚ ਵਿਘਨ ਪਾ ਸਕਦੀਆਂ ਹਨ, ਜਿਸ ਨਾਲ ਦਰਦ ਹੁੰਦਾ ਹੈ | ਸਰੀਰ ਦਾ ਇਹ ਹਿੱਸਾ ਅਸਲ ਵਿਚ ਕੀ ਹੈ, ਜੋ ਅਕਸਰ ਦਰਦ ਜਾਂ ਬੇਅਰਾਮੀ ਦਾ ਕਾਰਨ ਬਣਦਾ ਹੈ? ਇੱਥੇ ਸਾਨੂੰ ਸਮੱਸਿਆਵਾਂ ਦਾ ਅਨੁਭਵ ਕਿਉਂ ਹੁੰਦਾ ਹੈ ਅਤੇ ਸਾਨੂੰ ਉਨ੍ਹਾਂ ਬਾਰੇ ਕੀ ਕਰਨਾ ਚਾਹੀਦਾ ਹੈ?

ਲੋਕ ਅਕਸਰ ਲਾਪ੍ਰਵਾਹੀ ਕਾਰਨ ਚੂਲ਼ੇ ਦੇ ਦਰਦ ਨੂੰ  ਨਜ਼ਰਅੰਦਾਜ਼ ਕਰਦੇ ਹਨ ਅਤੇ ਉਦੋਂ ਹੀ ਡਾਕਟਰ ਦੀ ਸਲਾਹ ਲੈਂਦੇ ਹਨ, ਜਦੋਂ ਦਰਦ ਹੌਲੀ-ਹੌਲੀ ਅਸਹਿ ਹੋ ਜਾਂਦਾ ਹੈ | ਪਰ ਉਦੋਂ ਤੱਕ ਸਥਿਤੀ ਕਾਫ਼ੀ ਗੰਭੀਰ ਹੋ ਚੁੱਕੀ ਹੁੰਦੀ ਹੈ |
ਚੂਲ਼ੇ ਦੀ ਸਭ ਤੋਂ ਆਮ ਸਮੱਸਿਆ ਐਵਾਸਕੁਲਰ ਨਿਕਰੋਸਿਸ (ਏ.ਵੀ.ਐਨ.) ਹੈ | ਮਾਹਿਰ ਇਸ ਗੱਲ ਨਾਲ ਸਹਿਮਤ ਹਨ ਕਿ ਦੁਨੀਆ ਦੇ ਦੂਜੇ ਦੇਸ਼ਾਂ ਦੇ ਉਲਟ, ਏ.ਵੀ.ਐਨ. ਸਾਡੇ ਦੇਸ਼ ਵਿਚ ਚੂਲ਼ੇ ਦੇ ਜੋੜਾਂ ਦੇ ਦਰਦ ਦਾ ਸਭ ਤੋਂ ਆਮ ਕਾਰਨ ਹੈ | ਏ.ਵੀ.ਐਨ. ਵਿਚ, ਚੂਲ਼ੇ ਦੀਆਂ ਹੱਡੀਆਂ ਖੂਨ ਦੀ ਸਪਲਾਈ ਤੋਂ ਵਾਂਝੀਆਂ ਰਹਿ ਜਾਂਦੀਆਂ ਹਨ ਅਤੇ ਨਿਰੰਤਰ ਖੂਨ ਦੀ ਸਪਲਾਈ ਦੀ ਘਾਟ ਕਾਰਨ ਚੂਲ਼ੇ ਦੀਆਂ ਹੱਡੀਆਂ ਖ਼ਰਾਬ ਹੋ ਜਾਂਦੀਆਂ ਹਨ | ਭਾਰਤ ਵਿਚ ਨੌਜਵਾਨਾਂ ਵਿਚ ਏ.ਵੀ.ਐਨ. ਦੀਆਂ ਘਟਨਾਵਾਂ ਤੇਜ਼ੀ ਨਾਲ ਵੱਧ ਰਹੀਆਂ ਹਨ, ਜਿਸ ਕਾਰਨ ਚੂਲ਼ੇ ਬਦਲਣ ਦੀਆਂ ਸਰਜਰੀਆਂ ਵਿਚ ਵਾਧਾ ਹੋ ਰਿਹਾ ਹੈ | ਸੜਕ ਹਾਦਸੇ ਏ.ਵੀ.ਐਨ. ਦਾ ਇੱਕ ਵੱਡਾ ਕਾਰਨ ਹਨ | ਬਾਈਕਰ ਅਕਸਰ ਤੇਜ਼ ਰਫ਼ਤਾਰ ਕਾਰਨ ਹਾਦਸੇ ਦਾ ਸ਼ਿਕਾਰ ਹੁੰਦੇ ਹਨ | ਅਜਿਹੇ ਮਾਮਲਿਆਂ ਵਿਚ ਜੇਕਰ ਉਨ੍ਹਾਂ ਦੇ ਚੂਲ਼ੇ ਨੂੰ  ਸੱਟ ਲੱਗ ਜਾਂਦੀ ਹੈ ਅਤੇ ਤੁਰੰਤ ਇਲਾਜ ਨਾ ਕੀਤਾ ਜਾਵੇ, ਤਾਂ ਏ.ਵੀ.ਐਨ. ਵੀ ਹੋ ਸਕਦਾ ਹੈ |
ਚੂਲ਼ੇ ਦਾ ਸਮੇਂ ਸਿਰ ਅਤੇ ਸਹੀ ਢੰਗ ਨਾਲ ਇਲਾਜ ਕਰਾਉਣ ਨਾਲ ਜ਼ਖ਼ਮੀਆਂ ਲਈ ਜ਼ਿੰਦਗੀ ਆਸਾਨ ਹੋ ਸਕਦੀ ਹੈ | ਕਿਸੇ ਹਾਦਸੇ ਤੋਂ ਬਾਅਦ ਰਿਕਵਰੀ ਦੌਰਾਨ ਜੇਕਰ ਮਰੀਜ਼ ਦੇ ਸਾਰੇ ਅੰਗ ਸਹੀ ਢੰਗ ਨਾਲ ਕੰਮ ਕਰ ਰਹੇ ਹਨ, ਤਾਂ ਉਹ ਸਾਕਾਰਾਤਮਕ ਊਰਜਾ ਮਹਿਸੂਸ ਕਰਦੇ ਹਨ, ਜੋ ਉਨ੍ਹਾਂ ਦੀ ਰਿਕਵਰੀ ਨੂੰ  ਤੇਜ਼ ਕਰਦੀ ਹੈ | ਜੇਕਰ ਕਿਸੇ ਹਾਦਸੇ ਵਿਚ ਚੂਲ਼ੇ ਦਾ ਜੋੜ ਪੂਰੀ ਤਰ੍ਹਾਂ ਖ਼ਰਾਬ ਹੋ ਜਾਂਦਾ ਹੈ, ਤਾਂ ਬਦਲਣ ਦੀ ਸਿਫ਼ਾਰਸ਼ ਕੀਤੀ ਜਾਂਦੀ ਹੈ |
ਏ.ਵੀ.ਐਨ. ਤੋਂ ਇਲਾਵਾ ਗਠੀਆ ਵੀ ਚੂਲ਼ੇ ਨੂੰ  ਨੁਕਸਾਨ ਪਹੁੰਚਾ ਸਕਦਾ ਹੈ | ਰੂਮੇਟਾਇਡ ਗਠੀਆ (ਆਰ.ਏ.) ਦੇ ਮਾਮਲੇ ਵਧੇਰੇ ਗੰਭੀਰ ਹੋ ਸਕਦੇ ਹਨ | ਆਰ.ਏ. ਇੱਕ ਆਟੋਇਮਿਊਨ ਬਿਮਾਰੀ ਹੈ, ਜਿਸ ਵਿਚ ਇਮਿਊਨ ਸਿਸਟਮ, ਸਰੀਰ ਨੂੰ  ਵਾਇਰਸਾਂ ਅਤੇ ਬੈਕਟੀਰੀਆ ਤੋਂ ਬਚਾਉਣ ਦੀ ਬਜਾਏ ਜੋੜਾਂ 'ਤੇ ਹਮਲਾ ਕਰਨਾ ਸ਼ੁਰੂ ਕਰ ਦਿੰਦਾ ਹੈ | ਇਹ ਅਸਧਾਰਨ ਇਮਿਊਨ ਪ੍ਰਤੀਕਿਰਿਆ ਜੋੜਾਂ ਵਿਚ ਸੋਜਿਸ਼ ਦਾ ਕਾਰਨ ਬਣਦੀ ਹੈ, ਜਿਸ ਨਾਲ ਜੋੜਾਂ ਨੂੰ  ਨੁਕਸਾਨ ਹੁੰਦਾ ਹੈ | ਅਸਹਿ ਦਰਦ ਅਤੇ ਗੰਭੀਰ ਹੱਡੀਆਂ ਦੀਆਂ ਸਮੱਸਿਆਵਾਂ ਦੇ ਮਾਮਲਿਆਂ ਵਿਚ ਡਾਕਟਰ ਰਿਪਲੇਸਮੈਂਟ ਸਰਜਰੀ ਦੀ ਸਿਫਾਰਸ਼ ਕਰਦੇ ਹਨ |
ਨੌਜਵਾਨ ਮਰੀਜ਼ਾਂ ਲਈ ਇੱਕ ਸਰਗਰਮ ਜੀਵਨ ਜਿਊਣ ਲਈ ਸਥਿਰਤਾ ਅਤੇ ਟਿਕਾਊਪਨ ਬਹੁਤ ਜ਼ਰੂਰੀ ਹੈ | ਅਜਿਹੇ ਮਾਮਲਿਆਂ ਵਿਚ ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ ਕਰਕੇ ਹਿੱਪ ਰਿਪਲੇਸਮੈਂਟ ਸਭ ਤੋਂ ਪ੍ਰਭਾਵਸ਼ਾਲੀ ਇਲਾਜ ਵਜੋਂ ਸਾਹਮਣੇ ਆਉਂਦਾ ਹੈ |
ਉੱਨਤ ਤਕਨਾਲੋਜੀ ਨੇ ਰਿਪਲੇਸਮੈਂਟ ਸਰਜਰੀ ਨੂੰ  ਆਸਾਨ ਬਣਾ ਦਿੱਤਾ ਹੈ | ਹਾਲ ਹੀ ਵਿਚ ਭਾਰਤ ਵਿਚ ਹਿੱਪ ਰਿਪਲੇਸਮੈਂਟ ਪ੍ਰਕਿਰਿਆਵਾਂ ਵਿਚ ਡਿਊਲ ਮੋਬਿਲਿਟੀ ਹਿੱਪ ਜੁਆਇੰਟ ਸਿਸਟਮ ਬਹੁਤ ਪ੍ਰਭਾਵਸ਼ਾਲੀ ਸਾਬਤ ਹੋਇਆ ਹੈ |
ਇਹ ਭਾਰਤ ਵਿਚ ਆਪਣੀ ਕਿਸਮ ਦਾ ਪਹਿਲਾ ਹਿੱਪ ਸਿਸਟਮ ਹੈ, ਜੋ ਹਿੱਪ ਜੋੜਾਂ ਦੇ ਵਿਕਾਰ ਤੋਂ ਪੀੜਤ ਮਰੀਜ਼ਾਂ ਨੂੰ  ਦਰਦ ਤੋਂ ਰਾਹਤ ਬਿਹਤਰ ਸਥਿਰਤਾ ਅਤੇ ਗਤੀ ਦੀ ਰੇਂਜ ਪ੍ਰਦਾਨ ਕਰਦਾ ਹੈ | ਰਵਾਇਤੀ ਹਿੱਪ ਰਿਪਲੇਸਮੈਂਟ ਪ੍ਰਣਾਲੀਆਂ ਵਿਚ ਸੀਮਤ ਸਥਿਰਤਾ ਸੀ, ਪਰ ਨਵੀਆਂ ਹਿੱਪ ਰਿਪਲੇਸਮੈਂਟ ਪ੍ਰਣਾਲੀਆਂ ਵਿਚ ਇਹ ਸੀਮਾਵਾਂ ਨਹੀਂ ਹਨ |
ਇਹ ਪ੍ਰਣਾਲੀ ਨੌਜਵਾਨ ਮਰੀਜ਼ਾਂ ਲਈ ਬਹੁਤ ਪ੍ਰਭਾਵਸ਼ਾਲੀ ਹੈ, ਕਿਉਂਕਿ ਇਹ ਲੰਬੇ ਸਮੇਂ ਦੀ ਸਥਿਰਤਾ ਪ੍ਰਦਾਨ ਕਰਦੀ ਹੈ, ਜੋ 40-50 ਸਾਲਾਂ ਤੱਕ ਚੱਲਦੀ ਹੈ | ਹਿੱਪ ਰਿਪਲੇਸਮੈਂਟ ਨੂੰ  ਕੁਦਰਤੀ ਹਿੱਪ ਜੋੜ ਦੇ ਕੰਮ ਦੀ ਨਕਲ ਕਰਨ ਲਈ ਤਿਆਰ ਕੀਤਾ ਗਿਆ ਹੈ | ਨਤੀਜੇ ਵਜੋਂ ਮਰੀਜ਼ ਸਰਜਰੀ ਤੋਂ ਬਾਅਦ ਆਸਾਨੀ ਨਾਲ ਪੌੜੀਆਂ ਚੜ੍ਹ ਸਕਦੇ ਹਨ ਅਤੇ ਹੋਰ ਰੋਜ਼ਾਨਾ ਦੀਆਂ ਗਤੀਵਿਧੀਆਂ ਕਰ ਸਕਦੇ ਹਨ |