ਗਲਾਸਗੋ, 28 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਭਾਰਤੀ ਅਥਲੀਟ ਸਰਵੇਸ਼ ਕੁਸ਼ਾਰੇ ਨੇ ਪੁਰਸ਼ਾਂ ਦੇ ਉੱਚੀ ਛਾਲ ਮੁਕਾਬਲੇ ’ਚ ਚਾਂਦੀ ਦਾ ਤਗਮਾ ਹਾਸਲ ਕੀਤਾ ਹੈ। ਇਸ ਪ੍ਰਾਪਤੀ ਦੇ ਨਾਲ, ਉਹ ਇਸ ਖੇਡ ’ਚ ਤਗਮਾ ਜਿੱਤਣ ਵਾਲਾ ਪਹਿਲਾ ਭਾਰਤੀ ਅਥਲੀਟ ਬਣ ਗਿਆ ਹੈ। ਸਰਵੇਸ਼ ਨੇ 2.25 ਮੀਟਰ ਦੀ ਉਚਾਈ ਪਾਰ ਕਰਕੇ ਦੂਜਾ ਸਥਾਨ ਪ੍ਰਾਪਤ ਕੀਤਾ, ਜਦੋਂ ਕਿ ਜਮੈਕਾ ਦੇ ਰੋਮੇਨ ਬੈਕਫੋਰਡ ਨੇ ਸੋਨ ਤਗਮਾ ਜਿੱਤਿਆ। ਹਾਲਾਂਕਿ ਦੋਵੇਂ ਐਥਲੀਟਾਂ ਨੇ 2.25 ਮੀਟਰ ਦੀ ਇੱਕੋ ਜਿਹੀ ਉਚਾਈ ਪਾਰ ਕੀਤੀ, ਪਰ ਕੋਈ ਵੀ 2.28 ਮੀਟਰ ਪਾਰ ਨਹੀਂ ਕਰ ਸਕਿਆ। ਬੈਕਫੋਰਡ ਨੂੰ ਕਾਊਂਟਬੈਕ ਨਿਯਮ ਦੇ ਆਧਾਰ ’ਤੇ ਜੇਤੂ ਘੋਸ਼ਿਤ ਕੀਤਾ ਗਿਆ ਤੇ ਸੋਨ ਤਗਮਾ ਦਿੱਤਾ ਗਿਆ, ਜਦੋਂ ਕਿ ਸਰਵੇਸ਼ ਕੁਸ਼ਾਰੇ ਨੂੰ ਚਾਂਦੀ ਨਾਲ ਸਬਰ ਕਰਨਾ ਪਿਆ। ਇੰਗਲੈਂਡ ਦੇ ਜੈਕ ਕਿਮਾਨੀ ਨੇ 2.20 ਮੀਟਰ ਦੀ ਉਚਾਈ ਪਾਰ ਕਰਕੇ ਕਾਂਸੀ ਦਾ ਤਗਮਾ ਜਿੱਤਿਆ।
