ਅਮਰੀਕਾ ਨੇ ਭਾਰਤੀ ਕਾਰੋਬਾਰ ਨਾਲ ਜੁੜੇ 13 ਲੋਕਾਂ 'ਤੇ ਵੀਜ਼ਾ ਪਾਬੰਦੀ ਲਗਾਈ
ਅਜੀਤ ਡੈਸਕ
15-05-2026
ਸਾਨ ਫਰਾਂਸਿਸਕੋ, 14 ਮਈ (ਐਸ. ਅਸ਼ੋਕ ਭੌਰਾ)-ਭਾਰਤ ਨਾਲ ਸਾਂਝੇ ਸਮਝੌਤੇ ਦੀ ਵਚਨਬੱਧਤਾ ਤਹਿਤ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਵਿਰੁੱਧ ਜਾਰੀ ਸਖਤੀ ਤੇ ਅਮਰੀਕਾ ਨੇ ਇਕ ਭਾਰਤੀ ਕਾਰੋਬਾਰ ਨਾਲ ਜੁੜੇ 13 ਲੋਕਾਂ ਲਈ ਵੀਜ਼ਾ ਪਾਬੰਦੀ ਲਗਾ ਦਿੱਤੀ ਹੈ | ਕੇ.ਐਸ. ਇੰਟਰਨੈਸ਼ਨਲ ਟਰੇਡਰਜ਼ ਦੇ ਮਾਲਕ ਤੇ ਇਸ ਦੇ ਨਜ਼ਦੀਕੀ ਵਪਾਰਕ ਸਹਿਯੋਗੀਆਂ ਨੇ ਗੈਰ-ਕਾਨੂੰਨੀ ਫੈਂਟਾਨਿਲ ਦੀ ਤਸਕਰੀ ਰਾਹੀਂ ਮਾਲੀਆ ਪੈਦਾ ਕੀਤਾ ਸੀ | ਇਹ ਕਾਰਵਾਈ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥਾਂ ਦੀਆਂ ਸੰਸਥਾਵਾਂ ਨੂੰ ਖਤਮ ਕਰਨ ਤੇ ਅਮਰੀਕੀਆਂ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਤਸਕਰੀ ਨੈੱਟਵਰਕਾਂ ਨੂੰ ਤੋੜਨ ਤੇ ਅਮਰੀਕਾ ਅਤੇ ਭਾਰਤ ਦੀ ਸਥਾਈ ਅਤੇ ਸਾਂਝੀ ਵਚਨਬੱਧਤਾ ਨੂੰ ਉਜਾਗਰ ਕਰਦੀ ਹੈ | ਹਾਲਾਂਕਿ ਉਸ ਨੇ ਵੀਜ਼ਾ ਪਾਬੰਦੀ ਦੇ ਅਧੀਨ ਆਉਣ ਵਾਲੇ ਲੋਕਾਂ ਦਾ ਨਾਮ ਨਹੀਂ ਲਿਆ ਪਰ ਸਾਫ ਕੀਤਾ ਕਿ ਵੀਜ਼ਾ ਪਾਬੰਦੀ ਉਨ੍ਹਾਂ 'ਤੇ ਇਮੀਗ੍ਰੇਸ਼ਨ ਤੇ ਰਾਸ਼ਟਰੀਅਤਾ ਐਕਟ ਤਹਿਤ ਲਗਾਈ ਗਈ ਸੀ ਜੋ ਨਸ਼ੀਲੇ ਪਦਾਰਥਾਂ ਦੇ ਤਸਕਰਾਂ ਨੂੰ ਅਮਰੀਕਾ 'ਚ ਦਾਖਲ ਹੋਣ ਤੋਂ ਰੋਕਦਾ ਹੈ | ਪਿਛਲੇ ਸਾਲ ਸਤੰਬਰ ਮਹੀਨੇ ਕੇ.ਐਸ. ਇੰਟਰਨੈਸ਼ਨਲ ਟਰੇਡਰਜ਼, ਇਸਦੇ ਮਾਲਕ, ਜਿਸਦੀ ਪਛਾਣ ਖਿਜ਼ਰ ਮੁਹੰਮਦ ਇਕਬਾਲ ਸ਼ੇਖ ਅਤੇ ਸਾਦਿਕ ਅੱਬਾਸ ਹਬੀਬ ਸਈਦ ਵਜੋਂ ਹੋਈ ਹੈ ਤੇ ਦੋਵੇਂ ਭਾਰਤੀ ਨਾਗਰਿਕਾਂ ਹਨ, ਨੂੰ ਅਮਰੀਕਾ ਦੇ ਖਜ਼ਾਨਾ ਵਿਭਾਗ ਦੀਆਂ ਪਾਬੰਦੀਆਂ ਲਗਾ ਕੇ ਉਨ੍ਹਾਂ ਦੀਆਂ ਜਾਇਦਾਦਾਂ ਨੂੰ ਵੀ ਜਬਤ ਕਰ ਲਿਆ ਗਿਆ ਸੀ ਜੋ ਅਮਰੀਕਾ 'ਚ ਪੀੜਤਾਂ ਨੂੰ ਫੈਂਟਾਨਿਲ ਤੇ ਮੇਥਾਮਫੇਟਾਮਾਈਨ ਸਮੇਤ ਹੋਰ ਕਈ ਗੈਰ-ਕਾਨੂੰਨੀ ਦਵਾਈਆਂ ਨਾਲ ਭਰੀਆਂ ਲੱਖਾਂ ਨਕਲੀ ਨੁਸਖ਼ੇ ਵਾਲੀਆਂ ਗੋਲੀਆਂ ਦੀ ਸਪਲਾਈ ਕਰਨ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਸਨ | ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਅਜਿਹੇ ਨਸ਼ੀਲੇ ਪਦਾਰਥਾਂ ਦੀ ਓਵਰਡੋਜ਼ ਕਾਰਨ 70 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਸੀ |
