ਅੰਮਿ੍ਤਸਰ, 28 ਮਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ (ਪੀ.ਓ.ਕੇ.) ਦੀ ਰਾਜਧਾਨੀ ਮੁਜ਼ੱਫਰਾਬਾਦ 'ਚ ਇਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ | ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰਨ 'ਤੇ ਜਾਰੀ ਕੀਤੇ ਗਏ 5,000 ਰੁਪਏ ਦੇ ਟ੍ਰੈਫਿਕ ਚਲਾਨ ਤੋਂ ਗੁੱਸੇ 'ਚ ਆਏ ਇਕ ਡਰਾਈਵਰ ਨੇ ਆਪਣੇ ਯਾਤਰੀ ਕੋਚ ਨੂੰ ਜਿਹਲਮ ਦਰਿਆ 'ਚ ਸੁੱਟ ਦਿੱਤਾ | ਪੁਲਿਸ ਦੇ ਅਨੁਸਾਰ ਚਲਾਨ ਕੱਟਣ ਤੋਂ ਬਾਅਦ ਇਕ ਪੁਲਿਸ ਅਧਿਕਾਰੀ ਬੱਸ 'ਚ ਚੜ੍ਹ ਗਿਆ, ਜਿਸ ਨੇ ਡਰਾਈਵਰ ਵਲੋਂ ਯਾਤਰੀਆਂ ਨੂੰ ਉਨ੍ਹਾਂ ਦੀ ਮੰਜ਼ਿਲ 'ਤੇ ਛੱਡਣ ਤੋਂ ਬਾਅਦ ਬੱਸ ਨੂੰ ਜ਼ਬਤ ਕਰਨਾ ਸੀ | ਵਾਪਸੀ ਵੇਲੇ ਜਦੋਂ ਅਧਿਕਾਰੀ ਗੱਡੀ ਨੂੰ ਜ਼ਬਤ ਵਾਲੀ ਥਾਂ ਵੱਲ ਲੈ ਜਾ ਰਿਹਾ ਸੀ ਤਾਂ ਡਰਾਈਵਰ ਨੇ ਅਚਾਨਕ ਬੱਸ ਨੂੰ ਦਰਿਆ 'ਚ ਸੁੱਟ ਦਿੱਤਾ | ਡਰਾਈਵਰ ਅਤੇ ਪੁਲਿਸ ਅਧਿਕਾਰੀ ਦੋਵੇਂ ਨਦੀ 'ਚ ਡਿੱਗਣ ਤੋਂ ਪਹਿਲਾਂ ਬੱਸ ਤੋਂ ਛਾਲ ਮਾਰਨ 'ਚ ਕਾਮਯਾਬ ਹੋ ਗਏ ਤੇ ਆਪਣੀ ਜਾਨ ਬਚਾ ਲਈ |
