ਨਿਊਯਾਰਕ, 17 ਜੂਨ (ਰਾਜੂ ਸਹਿਬਾਜ਼ਪੁਰਾ )-ਨਿਊਯਾਰਕ ਦੇ ਸਾਰਾਟੋਗਾ ਕੈਸੀਨੋ ਹੋਟਲ ਹਾਰਨੈੱਸ ਰੇਸ ਟਰੈਕ ਦੇ ਇੱਕ ਅਸਤਬਲ ਵਿੱਚ ਮੰਗਲਵਾਰ ਤੜਕੇ ਲੱਗੀ ਭਿਆਨਕ ਅੱਗ ਕਾਰਨ 17 ਘੋੜਿਆਂ ਦੀ ਮੌਤ ਹੋ ਗਈ, ਜਦਕਿ ਇੱਕ ਹੋਰ ਘੋੜਾ ਮਾਮੂਲੀ ਸੱਟਾਂ ਨਾਲ ਬਚ ਗਿਆ। ਅਧਿਕਾਰੀਆਂ ਅਨੁਸਾਰ ਅੱਗ ਸਵੇਰੇ ਕਰੀਬ 2:30 ਵਜੇ ਟਰੈਕ ਦੇ ਬੈਕਸਟ੍ਰੈਚ ਖੇਤਰ ਵਿੱਚ ਸਥਿਤ ਅਸਤਬਲ ਵਿੱਚ ਲੱਗੀ। ਇਸ ਅਸਤਬਲ ਵਿੱਚ ਕੁੱਲ 18 ਘੋੜੇ ਮੌਜੂਦ ਸਨ। ਸਾਰਾਟੋਗਾ ਕੈਸੀਨੋ ਹੋਟਲ ਵੱਲੋਂ ਪੁਸ਼ਟੀ ਕੀਤੀ ਗਈ ਹੈ ਕਿ 17 ਘੋੜੇ ਅੱਗ ਦੀ ਲਪੇਟ ਵਿੱਚ ਆ ਕੇ ਮਰ ਗਏ, ਜਦਕਿ ਇੱਕ ਘੋੜਾ ਬਾਹਰ ਨਿਕਲਣ ਵਿੱਚ ਕਾਮਯਾਬ ਰਿਹਾ। ਮ੍ਰਿਤਕ ਘੋੜੇ ਦੋ ਟ੍ਰੇਨਰਾਂ ਦੀ ਮਲਕੀਅਤ ਸਨ। ਰੋਬਿਨ ਮੈਨਜਿਆਰਡੀ ਦੇ 11 ਘੋੜੇ ਅਤੇ ਟਿਮੋਥੀ ਬੈਨਸਨ ਦੇ 6 ਘੋੜੇ ਇਸ ਹਾਦਸੇ ਵਿੱਚ ਮਾਰੇ ਗਏ। ਅੱਗ ਦੀ ਸੂਚਨਾ ਮਿਲਣ ਤੋਂ ਬਾਅਦ ਫਾਇਰਫਾਈਟਰਾਂ ਨੇ ਮੌਕੇ ‘ਤੇ ਪਹੁੰਚ ਕੇ ਅੱਗ ‘ਤੇ ਕਾਬੂ ਪਾਉਣ ਲਈ ਵੱਡਾ ਅਭਿਆਨ ਚਲਾਇਆ। ਨੇੜਲੇ ਅਸਤਬਲਾਂ ਵਿੱਚ ਮੌਜੂਦ ਕਰੀਬ 350 ਘੋੜਿਆਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ, ਜਿਸ ਨਾਲ ਵੱਡਾ ਨੁਕਸਾਨ ਹੋਣ ਤੋਂ ਬਚ ਗਿਆ। ਘਟਨਾ ਤੋਂ ਬਾਅਦ ਟ੍ਰੇਨਰਾਂ, ਘੋੜਿਆਂ ਦੇ ਦੇਖਭਾਲ ਕਰਤਿਆਂ, ਮਾਲਕਾਂ ਅਤੇ ਰੇਸਿੰਗ ਭਾਈਚਾਰੇ ਨਾਲ ਜੁੜੇ ਲੋਕਾਂ ਲਈ ਸਾਰਾਟੋਗਾ ਹਸਪਤਾਲ ਵੱਲੋਂ ਮਨੋਵਿਗਿਆਨਕ ਸਲਾਹ ਦੀ ਵਿਵਸਥਾ ਕੀਤੀ ਜਾ ਰਹੀ ਹੈ। ਮਾਰੇ ਗਏ ਘੋੜਿਆਂ ਦੀ ਯਾਦ ਵਿੱਚ ਇੱਕ ਸ਼ਰਧਾਂਜਲੀ ਸਮਾਗਮ ਵੀ ਆਉਣ ਵਾਲੇ ਦਿਨਾਂ ਵਿੱਚ ਕਰਵਾਇਆ ਜਾਵੇਗਾ।ਅੱਗ ਲੱਗਣ ਦੇ ਅਸਲ ਕਾਰਨਾਂ ਦੀ ਜਾਂਚ ਅਜੇ ਜਾਰੀ ਹੈ। ਇਸ ਦੁਖਦਾਈ ਘਟਨਾ ਨੇ ਸਾਰਾਟੋਗਾ ਦੇ ਰੇਸਿੰਗ ਭਾਈਚਾਰੇ ਨੂੰ ਗਹਿਰਾ ਸਦਮਾ ਪਹੁੰਚਾਇਆ ਹੈ ਅਤੇ ਘੋੜਿਆਂ ਨਾਲ ਜੁੜੇ ਲੋਕਾਂ ਵਿੱਚ ਸੋਗ ਦੀ ਲਹਿਰ ਫੈਲ ਗਈ ਹੈ।
