ਵੈਨਕੂਵਰ, 24 ਜੂਨ (ਮਲਕੀਤ ਸਿੰਘ) – ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੇ ਚਿਲੀਵੈਕ ਸਥਿਤ ਮੱਛੀ ਫੜਨ ਵਾਲੀ ਗਾਈਡ ਕੰਪਨੀ ਸਟਰਜਨ ਸਲੇਅਰਜ਼ ਨੇ ਫਰੇਜ਼ਰ ਦਰਿਆ ਵਿੱਚ 11 ਫੁੱਟ ਤੋਂ ਵੱਧ ਲੰਬੀ ਵ੍ਹਾਈਟ ਸਟਰਜਨ ਮੱਛੀ ਫੜ ਕੇ, ਉਸ ਨੂੰ ਨਿਸ਼ਾਨਬੱਧ ਕਰਨ ਅਤੇ ਸੁਰੱਖਿਅਤ ਢੰਗ ਨਾਲ ਮੁੜ ਦਰਿਆ ਵਿਚ ਛੱਡਣ ਦਾ ਨਵਾਂ ਰਿਕਾਰਡ ਬਣਾਇਆ ਹੈ। ਜਾਣਕਾਰੀ ਅਨੁਸਾਰ ਕੰਪਨੀ ਵੱਲੋਂ ਕਰਵਾਈ ਗਈ ਮੱਛੀ ਫੜਨ ਦੀ ਮੁਹਿੰਮ ਦੌਰਾਨ ਇਹ ਵਿਸ਼ਾਲ ਵ੍ਹਾਈਟ ਸਟਰਜਨ ਮੱਛੀ ਫਰੇਜ਼ਰ ਦਰਿਆ ਵਿਚੋਂ ਫੜੀ ਗਈ। ਇਸ ਨਾਲ ਪੰਜ ਸਾਲ ਪਹਿਲਾਂ ਕੰਪਨੀ ਵੱਲੋਂ ਹੀ ਬਣਾਇਆ ਗਿਆ ਰਿਕਾਰਡ ਵੀ ਟੁੱਟ ਗਿਆ। ਕੰਪਨੀ ਦੇ ਨੁਮਾਇੰਦਿਆਂ ਨੇ ਦੱਸਿਆ ਕਿ ਮੱਛੀ ਨੂੰ ਵਿਗਿਆਨਕ ਅਧਿਐਨ ਲਈ ਟੈਗ ਲਗਾਉਣ ਤੋਂ ਬਾਅਦ ਬਿਨਾਂ ਕਿਸੇ ਨੁਕਸਾਨ ਦੇ ਮੁੜ ਦਰਿਆ ਵਿੱਚ ਛੱਡ ਦਿੱਤਾ ਗਿਆ। ਉਨ੍ਹਾਂ ਕਿਹਾ ਕਿ ਵ੍ਹਾਈਟ ਸਟਰਜਨ ਇੱਕ ਸੁਰੱਖਿਅਤ ਪ੍ਰਜਾਤੀ ਹੈ ਅਤੇ ਇਸ ਦੀ ਸੰਭਾਲ ਲਈ ‘ਫੜੋ ਅਤੇ ਛੱਡੋ’ ਨੀਤੀ ਦੀ ਪਾਲਣਾ ਕੀਤੀ ਜਾਂਦੀ ਹੈ।
