ਲੰਡਨ, 3 ਜੁਲਾਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ) ਯੂ ਕੇ ਦੀ ਸੱਭਿਆਚਾਰਕ ਮੰਤਰੀ ਲੀਜ਼ਾ ਨੰਦੀ ਨੇ ਐਲਨ ਮਸਕ ਦੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ (ਪਹਿਲਾਂ ਟਵਿੱਟਰ) ਤੋਂ ਆਪਣਾ ਨਿੱਜੀ ਖਾਤਾ ਅਤੇ ਆਪਣੇ ਪੂਰੇ ਵਿਭਾਗ (ਸੱਭਿਆਚਾਰ, ਮੀਡੀਆ ਅਤੇ ਖੇਡ ਵਿਭਾਗ) ਨੂੰ ਹਟਾਉਣ ਦਾ ਇੱਕ ਵੱਡਾ ਫੈਸਲਾ ਲਿਆ ਹੈ। ਬਰਤਾਨਵੀ ਸਰਕਾਰ ਅਤੇ ਵੱਡੀਆਂ ਟੈਕਨਾਲੋਜੀ ਕੰਪਨੀਆਂ ਦੇ ਸਬੰਧਾਂ ਦੇ ਲਿਹਾਜ਼ ਨਾਲ ਇਸ ਨੂੰ ਇੱਕ ਬਹੁਤ ਹੀ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ। ਪਲੇਟਫਾਰਮ ਛੱਡਣ ਵੇਲੇ ਨੰਦੀ ਨੇ ‘ਐਕਸ’ ਦੀ ਮੌਜੂਦਾ ਸਥਿਤੀ ‘ਤੇ ਤਿੱਖੀ ਆਲੋਚਨਾ ਕਰਦਿਆਂ ਕਿਹਾ ਕਿ ‘’ਇਹ ਪਲੇਟਫਾਰਮ ਅਸਲ ਵਿੱਚ ਪ੍ਰਗਟਾਵੇ ਦੀ ਆਜ਼ਾਦੀ ਲਈ ਬਣਾਇਆ ਗਿਆ ਸੀ, ਪਰ ਹੁਣ ਇਹ ਸਾਰਥਕ ਬਹਿਸ ਦੀ ਬਜਾਏ ਦੁਰਵਿਵਹਾਰ ਅਤੇ ਗਲਤ ਜਾਣਕਾਰੀ ਨੂੰ ਬੜ੍ਹਾਵਾ ਦੇ ਰਿਹਾ ਹੈ। ਇਹ ਸਾਡੇ ਲੋਕਤੰਤਰ ਜਾਂ ਸਾਡੇ ਸਮਾਜ ਲਈ ਸਿਹਤਮੰਦ ਨਹੀਂ ਹੈ, ਅਤੇ ਮੈਂ ਇਸ ਦਾ ਸਮਰਥਨ ਨਹੀਂ ਕਰਨਾ ਚਾਹੁੰਦੀ।’’ ਲੀਜ਼ਾ ਨੰਦੀ ਨੇ ਐਲਾਨ ਕੀਤਾ ਹੈ ਕਿ ਭਵਿੱਖ ਵਿੱਚ ਉਨ੍ਹਾਂ ਦੇ ਵਿਭਾਗ ਦੀਆਂ ਸਰਕਾਰੀ ਖ਼ਬਰਾਂ ਅਤੇ ਉਨ੍ਹਾਂ ਦੇ ਨਿੱਜੀ ਸਿਆਸੀ ਅਪਡੇਟ ਹੁਣ ‘ਐਕਸ’ ਦੀ ਬਜਾਏ ਹੋਰ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਜਿਵੇਂ ਕਿ ਇੰਸਟਾਗ੍ਰਾਮ, ਫੇਸਬੁੱਕ ਅਤੇ ਲਿੰਕਡਇਨ ‘ਤੇ ਸਾਂਝੇ ਕੀਤੇ ਜਾਣਗੇ। ਲੀਜ਼ਾ ਨੰਦੀ ਦਾ ਵਿਭਾਗ ‘ਐਕਸ’ ਨੂੰ ਅਧਿਕਾਰਤ ਤੌਰ ‘ਤੇ ਛੱਡਣ ਵਾਲਾ ਯੂ ਕੇ ਸਰਕਾਰ ਦਾ ਦੂਜਾ ਵੱਡਾ ਅਦਾਰਾ ਬਣ ਗਿਆ ਹੈ। ਇਸ ਤੋਂ ਪਹਿਲਾਂ ਅਟਾਰਨੀ ਜਨਰਲ ਦੇ ਦਫ਼ਤਰ ਨੇ ਵੀ ਨਸਲਵਾਦ, ਮਹਿਲਾ ਵਿਰੋਧੀ ਟਿੱਪਣੀਆਂ ਅਤੇ ਗੁੰਮਰਾਹਕੁੰਨ ਪ੍ਰਚਾਰ ਦਾ ਹਵਾਲਾ ਦਿੰਦੇ ਹੋਏ ਇਸ ਪਲੇਟਫਾਰਮ ਨੂੰ ਅਲਵਿਦਾ ਕਹਿ ਦਿੱਤਾ ਸੀ। ਬਰਤਾਨੀਆਂ ਦੇ ਕਈ ਸ਼ਹਿਰਾਂ (ਜਿਵੇਂ ਕਿ ਸਾਊਥਹੈਂਪਟਨ ਅਤੇ ਬਿਲਫਾਸਟ) ਵਿੱਚ ਹੋਈ ਹਿੰਸਾ ਅਤੇ ਨਸਲੀ ਤਣਾਅ ਤੋਂ ਬਾਅਦ ਯੂ ਕੇ ਸਰਕਾਰ ਅਤੇ ‘ਐਕਸ’ ਵਿਚਾਲੇ ਦੂਰੀਆਂ ਕਾਫ਼ੀ ਵਧ ਗਈਆਂ ਸਨ। ਸਰਕਾਰ ਦਾ ਦੋਸ਼ ਹੈ ਕਿ ਐਲਨ ਮਸਕ ਦੀ ਅਗਵਾਈ ਵਿੱਚ ਇਹ ਪਲੇਟਫਾਰਮ ਕੱਟੜਪੰਥੀ ਅਤੇ ਨਫ਼ਰਤ ਫੈਲਾਉਣ ਵਾਲੀ ਸਮੱਗਰੀ ਨੂੰ ਜ਼ਿਆਦਾ ਹਵਾ ਦੇ ਰਿਹਾ ਹੈ। ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਵੀ ਪਹਿਲਾਂ ਮਸਕ ‘ਤੇ ਦੇਸ਼ ਵਿੱਚ ਵੰਡੀਆਂ ਪਾਉਣ ਦਾ ਦੋਸ਼ ਲਗਾਇਆ ਸੀ। ਇਸ ਤੋਂ ਪਹਿਲਾਂ ਕਈ ਬ੍ਰਿਟਿਸ਼ ਸੰਸਦ ਮੈਂਬਰਾਂ ਨੇ ਵੀ ‘ਐਕਸ’ ਦਾ ਬਾਈਕਾਟ ਕੀਤਾ ਸੀ। ਇਸ ਦਾ ਕਾਰਨ ਇਹ ਸੀ ਕਿ ਪਲੇਟਫਾਰਮ ਦੇ ਏ ਆਈ ਟੂਲ ‘ਗਰੋਕ’ ਦੀ ਵਰਤੋਂ ਕਰਕੇ ਨਾਬਾਲਗਾਂ ਦੀਆਂ ਇਤਰਾਜ਼ਯੋਗ ਅਤੇ ਅਸ਼ਲੀਲ ਤਸਵੀਰਾਂ ਬਣਾਉਣ ਦੀਆਂ ਰਿਪੋਰਟਾਂ ਸਾਹਮਣੇ ਆਈਆਂ ਸਨ।
