ਲੈਸਟਰ (ਇੰਗਲੈਂਡ), 15 ਜੁਲਾਈ (ਸੁਖਜਿੰਦਰ ਸਿੰਘ ਢੱਡੇ)-ਬਰਤਾਨੀਆ ਸਰਕਾਰ ਨੇ 16 ਤੇ 17 ਸਾਲ ਦੇ ਨੌਜਵਾਨਾਂ ਲਈ ਅੱਧੀ ਰਾਤ ਤੋਂ ਸਵੇਰੇ 6 ਵਜੇ ਤੱਕ ਸਮਾਜਿਕ ਮਾਧਿਅਮਾਂ ਦੀ ਵਰਤੋਂ ਆਪਣੇ ਆਪ ਬੰਦ ਕਰਨ ਦਾ ਪ੍ਰਸਤਾਵ ਪੇਸ਼ ਕੀਤਾ ਹੈ। ਇਸ ਯੋਜਨਾ ਤਹਿਤ ਇੰਸਟਾਗ੍ਰਾਮ, ਟਿਕਟਾਕ ਅਤੇ ਯੂਟਿਊਬ ਵਰਗੇ ਮੰਚਾਂ ਉੱਤੇ ਰਾਤ 12 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਪਹੁੰਚ ਮੂਲ ਰੂਪ ਵਿੱਚ ਬੰਦ ਰਹੇਗੀ। ਹਾਲਾਂਕਿ ਜੇ ਕੋਈ ਨੌਜਵਾਨ ਚਾਹੇ ਤਾਂ ਆਪਣੇ ਖਾਤੇ ਦੀਆਂ ਵਿਵਸਥਾਵਾਂ ਬਦਲ ਕੇ ਇਸ ਪਾਬੰਦੀ ਨੂੰ ਹਟਾ ਸਕੇਗਾ। ਇਸ ਦੇ ਨਾਲ ਹੀ ਲਗਾਤਾਰ ਵੀਡੀਓ ਦਿਖਾਉਣ ਅਤੇ ਆਪਣੇ ਆਪ ਅਗਲੀ ਵੀਡੀਓ ਚਲਾਉਣ ਵਰਗੀਆਂ ਆਦਤ ਪੈਦਾ ਕਰਨ ਵਾਲੀਆਂ ਸਹੂਲਤਾਂ ਵੀ ਮੂਲ ਰੂਪ ਵਿੱਚ ਬੰਦ ਰੱਖਣ ਦਾ ਪ੍ਰਸਤਾਵ ਹੈ। ਸਰਕਾਰ ਦਾ ਮੰਨਣਾ ਹੈ ਕਿ ਇਸ ਨਾਲ ਨੌਜਵਾਨਾਂ ਦੀ ਨੀਂਦ ਵਿਚ ਸੁਧਾਰ ਹੋਵੇਗਾ, ਪੜ੍ਹਾਈ ਵਿੱਚ ਧਿਆਨ ਵਧੇਗਾ ਅਤੇ ਪਰਿਵਾਰ ਨਾਲ ਵਧੇਰੇ ਸਮਾਂ ਬਿਤਾਉਣ ਦਾ ਮੌਕਾ ਮਿਲੇਗਾ।
