ਅੰਮ੍ਰਿਤਸਰ, 18 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਪਹਿਲੀ ਵਾਰ ਅਧਿਕਾਰਤ ਤੌਰ ’ਤੇ ਮਿਸ ਵਰਲਡ ਮੁਕਾਬਲੇ ’ਚ ਹਿੱਸਾ ਲਵੇਗਾ। 24 ਸਾਲਾ ਅਨੀਕਾ ਜਮਾਲ ਇਕਬਾਲ ਇਸ ਸਮੇਂ ਲੇਖਾਕਾਰੀ ਅਤੇ ਆਡਿਟਿੰਗ ’ਚ ਮਾਸਟਰਜ਼ ਕਰ ਰਹੀ ਹੈ। ਉਹ ਪਹਿਲਾਂ ਮਿਸ ਅਰਥ, ਮਿਸ ਗਲੋਬਲ, ਮਿਸ ਕੋਸਮੋ, ਮਿਸ ਈਕੋ ਇੰਟਰਨੈਸ਼ਨਲ ਅਤੇ ਮਿਸ ਔਰਾ ਇੰਟਰਨੈਸ਼ਨਲ ਵਰਗੇ ਕੌਮਾਂਤਰੀ ਸੁੰਦਰਤਾ ਮੁਕਾਬਲਿਆਂ ’ਚ ਪਾਕਿਸਤਾਨ ਦੀ ਨੁਮਾਇੰਦਗੀ ਕਰ ਚੁੱਕੀ ਹੈ। ਮਿਸ ਪਾਕਿਸਤਾਨ ਵਰਲਡ ਆਰਗੇਨਾਈਜ਼ੇਸ਼ਨ ਦੀ ਪ੍ਰਧਾਨ ਸੋਨੀਆ ਅਹਿਮਦ ਨੇ ਇਸ ਨੂੰ ਪਾਕਿ ਲਈ ਇਕ ਇਤਿਹਾਸਕ ਪ੍ਰਾਪਤੀ ਦੱਸਿਆ। ਸਾਲ 2002 ‘ਚ ਬਣੀ ਇਹ ਸੰਸਥਾ ਪਿਛਲੇ 2 ਦਹਾਕਿਆਂ ਤੋਂ ਕੌਮਾਂਤਰੀ ਸੁੰਦਰਤਾ ਮੁਕਾਬਲਿਆਂ ਲਈ ਪਾਕਿਸਤਾਨੀ ਪ੍ਰਤੀਯੋਗੀਆਂ ਨੂੰ ਤਿਆਰ ਕਰ ਰਹੀ ਹੈ। ਹਾਲਾਂਕਿ, ਇਹ ਮਿਸ ਵਰਲਡ ’ਚ ਪਾਕਿਸਤਾਨ ਦੀ ਪਹਿਲੀ ਅਧਿਕਾਰਤ ਐਂਟਰੀ ਹੋਵੇਗੀ।
