ਨਿਊਯਾਰਕ, 19 ਜੁਲਾਈ (ਰਾਜੂ ਸਾਹਿਬਾਜ਼ਪੁਰਾ)-ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਤਕਨਾਲੋਜੀ ਕੰਪਨੀਆਂ ਵਿੱਚ ਸ਼ਾਮਲ ਸੈਮਸੰਗ ਇਲੈਕਟ੍ਰਾਨਿਕਸ ਨੇ ਆਪਣੇ ਅਮਰੀਕੀ ਕਾਰੋਬਾਰ ਵਿੱਚ ਵੱਡਾ ਫੇਰਬਦਲ ਕਰਦਿਆਂ ਸੈਂਕੜੇ ਕਰਮਚਾਰੀਆਂ ਦੀਆਂ ਨੌਕਰੀਆਂ ਖ਼ਤਮ ਕਰ ਦਿੱਤੀਆਂ ਹਨ। ਕੰਪਨੀ ਵੱਲੋਂ ਅਮਰੀਕੀ ਮੁੱਖ ਦਫ਼ਤਰ ਨਿਊ ਜਰਸੀ ਤੋਂ ਟੈਕਸਸ ਤਬਦੀਲ ਕੀਤੇ ਜਾਣ ਕਾਰਨ ਐਂਗਲਵੁੱਡ ਕਲਿਫ਼ਸ ਵਿੱਚ 739 ਅਹੁਦੇ ਪ੍ਰਭਾਵਿਤ ਹੋਏ ਹਨ। ਇਸ ਤਬਦੀਲੀ ਦੀ ਮਾਰ ਸੈਮਸੰਗ ਦੇ ਮੋਬਾਈਲ ਫੋਨ, ਡਿਸਪਲੇਅ ਅਤੇ ਘਰੇਲੂ ਇਲੈਕਟ੍ਰਾਨਿਕ ਉਤਪਾਦਾਂ ਨਾਲ ਜੁੜੇ ਵਿਭਾਗਾਂ ’ਤੇ ਪਈ ਹੈ। ਸਾਰੇ 739 ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਨਹੀਂ ਹਟਾਇਆ ਗਿਆ। ਉਨ੍ਹਾਂ ਵਿੱਚੋਂ ਵੱਡੀ ਗਿਣਤੀ ਨੂੰ ਟੈਕਸਸ ਵਿੱਚ ਤਬਾਦਲਾ ਲੈ ਕੇ ਕੰਮ ਜਾਰੀ ਰੱਖਣ ਦਾ ਵਿਕਲਪ ਦਿੱਤਾ ਗਿਆ, ਜਦਕਿ ਤਬਾਦਲਾ ਨਾ ਲੈ ਸਕਣ ਵਾਲੇ ਜਾਂ ਖ਼ਤਮ ਕੀਤੇ ਗਏ ਅਹੁਦਿਆਂ ਨਾਲ ਜੁੜੇ ਕੁਝ ਮੁਲਾਜ਼ਮਾਂ ਨੂੰ ਨੌਕਰੀ ਗੁਆਉਣੀ ਪਈ।
