ਨਵੀਂ ਦਿੱਲੀ, 29 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਅਤੇ ਨੋਇਡਾ ਦੇ ਵਿਚ ਹਲਕੀ ਬਾਰਿਸ਼ ਹੋਣ 'ਤੇ ਲੋਕਾਂ ਨੂੰ ਗਰਮੀ ਤੋਂ ਥੋੜ੍ਹੀ ਰਾਹਤ ਮਿਲੀ ਹੈ ਕਿਉਂਕਿ ਪਿਛਲੇ ਦਿਨਾਂ ਤੋਂ ਲੋਕ ਗਰਮੀ ਨਾਲ ਜੂਝ ਰਹੇ ਸਨ | ਮੌਸਮ ਵਿਭਾਗ ਨੇ ਤਾਂ ਪਹਿਲਾਂ ਹੀ ਸੰਭਾਵਨਾ ਜਤਾਈ ਸੀ ਕਿ 29 ਅਤੇ 30 ਅਪ੍ਰੈਲ ਨੂੰ ਆਸਮਾਨ ਵਿਚ ਬੱਦਲ ਛਾਏ ਰਹਿਣਗੇ ਅਤੇ ਹਲਕੀ ਬਾਰਿਸ਼ ਵੀ ਹੋ ਸਕਦੀ ਹੈ | ਮੌਸਮ ਵਿਭਾਗ ਦਾ ਇਹ ਵੀ ਕਹਿਣਾ ਹੈ ਕਿ ਇਕ ਅਤੇ ਦੋ ਮਈ ਨੂੰ ਮੌਸਮ ਸਾਫ਼ ਰਹੇਗਾ ਅਤੇ ਤਿੰਨ ਅਤੇ ਚਾਰ ਮਈ ਨੂੰ ਫਿਰ ਬੱਦਲ ਛਾਏ ਰਹਿਣਗੇ | ਇਸ ਦੇ ਨਾਲ ਹੀ 3 ਅਤੇ 4 ਮਈ ਨੂੰ ਬੱਦਲ ਛਾਏ ਜਾਣ ਦੇ ਨਾਲ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੋ ਸਕਦੀ ਹੈ | ਮੌਸਮ ਵਿਭਾਗ ਦਾ ਇਹ ਵੀ ਕਹਿਣਾ ਹੈ ਕਿ ਅਗਲੇ ਕੁਝ ਦਿਨਾਂ ਵਿਚ ਮੌਸਮ ਦੇ ਵਿਚ ਉਤਰਾਓ-ਚੜ੍ਹਾਓ ਰਹੇਗਾ | ਗਰਮੀ ਤੋਂ ਮਿਲੀ ਕੁਝ ਘਟਣ ਦੇ ਕਾਰਨ ਬਿਜਲੀ ਕੰਪਨੀਆਂ ਨੂੰ ਥੋੜ੍ਹੀ ਰਾਹਤ ਮਿਲੀ ਹੈ ਕਿਉਂਕਿ ਬਿਜਲੀ ਦੀ ਮੰਗ ਹੋਰ ਵੀ ਵਧਦੀ ਜਾ ਰਹੀ ਸੀ ਅਤੇ ਇਹ ਮੰਗ ਹੋਰ ਵਧਣ 'ਤੇ ਬਿਜਲੀ ਕੰਪਨੀਆਂ ਨੂੰ ਹੋਰ ਬਿਜਲੀ ਦੀ ਵਿਵਸਥਾ ਕਰਨ ਲਈ ਏਧਰ-ਉਧਰ ਹੱਥ-ਪੈਰ ਮਾਰਨੇ ਪੈਣੇ ਸਨ |