ਨਵੀਂ ਦਿੱਲੀ, 24 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਸਾਈਬਰ ਠੱਗ ਇਨ੍ਹਾਂ ਦਿਨਾਂ ਵਿਚ ਕਾਫੀ ਸਰਗਰਮ ਹਨ ਜੋ ਕਿ ਵੱਖੋ-ਵੱਖ ਢੰਗ ਨਾਲ ਲੋਕਾਂ ਨਾਲ ਠੱਗੀਆਂ ਲੱਗੀਆਂ ਮਾਰ ਰਹੇ ਹਨ | ਇਹ ਲੋਕ ਵਿਸ਼ੇਸ਼ ਕਰਕੇ ਲੋਕਾਂ ਦੇ ਬੈਂਕ ਖਾਤਿਆਂ ਵਿਚੋਂ ਪੈਸੇ ਕੱਢ ਰਹੇ ਹਨ | ਲੋਕਾਂ ਕੋਲ ਓ.ਟੀ.ਵੀ. ਵੀ ਨਹੀਂ ਆ ਰਹੇ ਪ੍ਰੰਤੂ ਫਿਰ ਵੀ ਉਨ੍ਹਾਂ ਦੇ ਬੈਂਕ ਖਾਤੇ ਖ਼ਾਲੀ ਹੋ ਰਹੇ ਹਨ | ਸਾਈਬਰ ਠੱਗ ਬਿਜਲੀ ਦਾ ਮੀਟਰ ਅਪਡੇਟ ਕਰਨ, ਬਿਜਲੀ ਦਾ ਕੁਨੈਕਸ਼ਨ ਕੱਟਣ ਆਦਿ ਬਾਰੇ ਲੋਕਾਂ ਨੂੰ ਆਪਣੇ ਝਾਂਸੇ ਵਿਚ ਲੈਂਦੇ ਹਨ | ਗਰੋਹ ਦੇ ਮੈਂਬਰ ਆਪਣੇ ਆਪ ਨੂੰ ਬਿਜਲੀ ਵਿਭਾਗ ਦਾ ਅਧਿਕਾਰੀ ਬਣ ਕੇ ਕੁਝ ਨਾ ਕੁਝ ਕਹਿੰਦਾ ਹੈ | ਉਹ ਲੋਕਾਂ ਨੂੰ ਭਰੋਸਾ ਦਿੰਦਾ ਹੈ ਕਿ ਉਹ ਉਨ੍ਹਾਂ ਦੀ ਮਦਦ ਕਰੇਗਾ ਅਤੇ ਨਾਲ ਹੀ ਲੋਕਾਂ ਨੂੰ ਕਹਿੰਦਾ ਹੈ ਕਿ ਥੋੜ੍ਹੇ ਪੈਸੇ ਅਦਾ ਕਰਨ 'ਤੇ ਕੰਮ ਹੋ ਜਾਵੇਗਾ | ਇਹ ਲੋਕ ਬੈਂਕ ਡਿਟੇਲ ਲਈ ਲੋਕਾਂ ਤੋਂ ਫ਼ੋਨ ਪੇ ਜਾਂ ਹੋਰ ਯੂ.ਪੀ.ਆਈ. ਐੱਪ ਰਾਹੀਂ 12-13 ਰੁਪਏ ਰਕਮ ਦਾ ਭੁਗਤਾਨ ਕਰਨ ਨੂੰ ਕਹਿੰਦੇ ਹਨ | ਇਸੇ ਪ੍ਰਕਿਰਿਆ ਦੌਰਾਨ ਉਹ ਵੱਖ-ਵੱਖ ਤਰੀਕਿਆਂ ਨਾਲ ਲੋਕਾਂ ਦੇ ਮੋਬਾਈਲ ਫ਼ੋਨ ਦਾ ਕੰਟਰੋਲ ਹਾਸਿਲ ਕਰ ਲੈਂਦੇ ਹਨ | ਇਸ ਉਪਰੰਤ ਉਹ ਬਿਨਾਂ ਓ.ਟੀ.ਪੀ. ਦੇ ਲੋਕਾਂ ਦੇ ਖਾਤਿਆਂ ਤੋਂ ਪੈਸੇ ਉਡਾ ਲੈਂਦੇ ਹਨ | ਇਹ ਠੱਗ ਠੱਗੀ ਗਈ ਰਕਮ ਨੂੰ ਲੱਭਣ ਦੀ ਪ੍ਰਕਿਰਿਆ ਤੋਂ ਬਚਣ ਲਈ ਸੀ.ਐਸ.ਸੀ.ਆਈ.ਡੀ. ਅਤੇ ਪਾਸਵਰਡ ਦੀ ਵਰਤੋਂ ਕਰਕੇ ਵੱਖ-ਵੱਖ ਵਾਲੇਟ ਅਤੇ ਖਾਤਿਆਂ ਵਿਚ ਟਰਾਂਸਫਰ ਕਰ ਦਿੰਦੇ ਹਨ |
