ਅੱਪਰਾ, 21 ਫਰਵਰੀ (ਦਲਵਿੰਦਰ ਸਿੰਘ ਅੱਪਰਾ)-ਕਸਬਾ ਅੱਪਰਾ ਤੇ ਆਸ ਪਾਸ ਦੇ ਇਲਾਕੇ 'ਚ ਚੋਰੀਆਂ ਤੇ ਲੁੱਟਾਂ ਖੋਹਾਂ ਦਾ ਸਿਲਸਿਲਾ ਬਾਦਸਤੂਰ ਜਾਰੀ ਹੈ | ਬੀਤੀ ਸ਼ਾਮ ਅੱਪਰਾ-ਲੋਹਗੜ੍ਹ ਸੜਕ 'ਤੇ ਸਥਿਤ ਗੁਰੂ ਨਾਨਕ ਚੈਰੀਟੇਬਲ ਹਸਪਤਾਲ ਦੇ ਨਜ਼ਦੀਕ ਮੋਟਰ ਸਵਾਰ ਸਾਈਕਲ ਲੁਟੇਰੇ ਲੋਹਗੜ੍ਹ ਵਾਸੀ ਔਰਤ ਦੀਆਂ ਕੰਨਾਂ ਦੀਆਂ ਵਾਲ਼ੀਆਂ ਝਪਟ ਕੇ ਫ਼ਰਾਰ ਹੋ ਗਏ | ਕੁਲਵਿੰਦਰ ਸਿੰਘ ਵਾਸੀ ਲੋਹਗੜ੍ਹ ਨੇ ਦੱਸਿਆ ਕਿ ਉਹ ਤੇ ਉਹਨਾਂ ਦੀ ਪਤਨੀ ਬਲਜੀਤ ਕੌਰ ਆਪਣੇ ਮੋਟਰ ਸਾਈਕਲ 'ਤੇ ਸਵਾਰ ਹੋ ਕੇ ਅੱਪਰੇ ਤੋਂ ਵਾਪਸ ਲੋਹਗੜ੍ਹ ਨੂੰ ਆ ਰਹੇ ਸਨ | ਜਦੋਂ ਉਹ ਗੁਰੂ ਨਾਨਕ ਦੇਵ ਚੈਰੀਟੇਬਲ ਹਸਪਤਾਲ ਦੇ ਨਜ਼ਦੀਕ ਪਹੁੰਚੇ ਤਾਂ ਦੋ ਮੋਟਰ ਸਾਈਕਲ ਸਵਾਰ ਨੌਜਵਾਨ ਜੋ ਕਿ ਅੱਪਰੇ ਵਲੋਂ ਹੀ ਆ ਰਹੇ ਸਨ ਨੇ ਮੋਟਰ ਸਾਈਕਲ ਉਹਨਾਂ ਦੇ ਨਜ਼ਦੀਕ ਕਰ ਲਿਆ ਤੇ ਚਲਦੇ ਮੋਟਰ ਸਾਈਕਲ ਤੋਂ ਹੀ ਬਲਜੀਤ ਕੌਰ ਦੀਆਂ ਕੰਨਾਂ ਦੀਆਂ ਸੋਨੇ ਦੀਆਂ ਵਾਲ਼ੀਆਂ ਝਪਟ ਲਈਆਂ ਤੇ ਸੂਏ ਦੀ ਪਟੜੀ 'ਤੇ ਸਮਰਾੜੀ ਵੱਲ ਨੂੰ ਫ਼ਰਾਰ ਹੋ ਗਏ | ਉਨ੍ਹਾਂ ਨੇ ਵੀ ਸਮਰਾੜੀ ਤੱਕ ਇਹਨਾਂ ਬੇਖ਼ੌਫ਼ ਲੁਟੇਰਿਆਂ ਦਾ ਪਿੱਛਾ ਕਰਨ ਕੋਸ਼ਿਸ਼ ਕੀਤੀ | ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਘਟਨਾ ਦੀ ਇਤਲਾਹ ਪੁਲਿਸ ਚੌਂਕੀ ਅੱਪਰਾ ਵਿਖੇ ਦੇ ਦਿੱਤੀ ਗਈ ਹੈ |
