ਜਲੰਧਰ, 28 ਮਾਰਚ (ਚੰਦੀਪ ਭੱਲਾ)-ਸ਼ਹਿਰ ਦੇ ਨੂਰਮਹਿਲ ਦੇ ਸੀਵਰੇਜ ਦਾ ਪਾਣੀ ਪਿੰਡ ਫ਼ਤਿਹਪੁਰ ਦੀ ਡਰੇਨ 'ਚ ਨਾ ਪਾਉਣ ਦੀ ਮੰਗ ਨੂੰ ਲੈ ਕੇ ਵਾਤਾਵਰਨ, ਪਾਣੀ, ਮਿੱਟੀ ਬਚਾਓ ਸੰਘਰਸ਼ ਕਮੇਟੀ ਨੇ ਕਨਵੀਨਰ ਕੇਵਲ ਸਿੰਘ ਦੀ ਅਗਵਾਈ ਹੇਠ ਏ. ਡੀ. ਸੀ. ਅਮਨਿੰਦਰ ਕੌਰ ਨੂੰ ਇਕ ਮੰਗ ਪੱਤਰ ਦਿੱਤਾ | ਉਨ੍ਹਾਂ ਕਿਹਾ ਕਿ ਸੇਮ ਨਾਲਾ ਜੋ ਕਿ ਤਲਵਣ ਤੋਂ ਚੱਲਕੇ ਗੋਰਸੀਆਂ, ਨਿਹਾਲ, ਫ਼ਤਿਹਪੁਰ, ਕੋਟ ਬਾਦਲ ਖਾਂ ਤੇ ਹੋਰ ਪਿੰਡਾਂ ਦੀ ਜ਼ਮੀਨ ਤੋਂ ਜਾਂਦਾ ਹੈ ਇਹ ਸੇਮ ਨਾਲਾ ਇਨ੍ਹਾਂ ਪਿੰਡਾਂ ਦੀ ਜ਼ਮੀਨ ਦੇ ਬਰਸਾਤੀ ਪਾਣੀ ਦੀ ਖੇਤਾਂ 'ਚੋਂ ਨਿਕਾਸੀ ਕਰਕੇ ਹੈ ਪਰ ਸ਼ਹਿਰ ਦੇ ਸੀਵਰੇਜ ਦਾ ਪਾਣੀ ਪੈਣ ਕਰਕੇ ਇਹ ਨਾਲਾ ਭਰ ਜਾਵੇਗਾ ਤਾਂ ਇਹ ਨਾਲਾ ਖੇਤਾਂ ਦਾ ਪਾਣੀ ਨਹੀਂ ਖਿੱਚੇਗਾ ਤੇ ਇਸ ਨਾਲ ਫ਼ਸਲਾਂ ਵੀ ਪ੍ਰਭਾਵਿਤ ਹੋਣਗੀਆਂ ਤੇ ਇਸ ਲਈ ਸ਼ਹਿਰ ਨੂਰਮਹਿਲ ਦੇ ਸੀਵਰੇਜ ਪਾਣੀ ਇਸ ਨਾਲੇ 'ਚ ਨਾ ਪਾਇਆ ਜਾਵੇ | ਇਲਾਕੇ ਲੋਕਾਂ 'ਚ ਇਸ ਨੂੰ ਲੈ ਕੇ ਕਾਫ਼ੀ ਰੋਸ ਹੈ | ਉਨ੍ਹਾਂ ਮੰਗ ਕਰਦੇ ਹੋਏ ਕਿਹਾ ਕਿ ਇਸ ਕੰਮ 'ਤੇ ਰੋਕ ਲਗਾਈ ਜਾਵੇ ਤਾਂ ਕਿ ਲੋਕਾਂ ਦੀ ਪ੍ਰੇਸ਼ਾਨੀ ਦੂਰ ਹੋ ਸਕੇ | ਇਸ ਮੌਕੇ ਸੋਢੀ ਸਿੰਘ, ਪਰਮਜੀਤ, ਪਲਵਿੰਦਰ ਸਿੰਘ, ਗੁਰਮੇਲ ਸਿੰਘ ਤੇ ਹੋਰ ਪਿੰਡਾਂ ਦੇ ਪੰਚ ਅਤੇ ਸਰਪੰਚ ਮੌਜੂਦ ਸਨ |
