ਜੰਡਿਆਲਾ ਮੰਜਕੀ, 16 ਜੂਨ (ਸੁਰਜੀਤ ਸਿੰਘ ਜੰਡਿਆਲਾ)- ਇਲਾਕੇ ਵਿਚ ਚੱਲ ਰਹੇ ਬਿਨਾਂ ਢੱਕੇ ਓਵਰਲੋਡਿਡ ਰੇਤ ਦੇ ਟਿੱਪਰ ਅਤੇ ਟਰਾਲੇ ਹਾਦਸਿਆਂ ਅਤੇ ਟਰੈਫਿਕ ਜਾਮ ਦਾ ਕਾਰਨ ਬਣ ਰਹੇ ਹਨ। ਲੋਕਾਂ ਵਿਚ ਚਰਚਾ ਹੈ ਕਿ ਚਲਾਨ ਕੱਟਣ ਵਿੱਚ ਮਸ਼ਰੂਫ ਪੁਲਿਸ ਨੂੰ ਇਹ ਓਵਰਲੋਡਿਡ ਬਿਨਾਂ ਢਕੇ ਟਿੱਪਰ, ਟਰਾਲੇ, ਟਰੈਕਟਰ ਟਰਾਲੀਆਂ ਚਲਦੇ ਕਿਉਂ ਨਹੀਂ ਦਿਖਾਈ ਦਿੰਦੇ। ਇਹਨਾਂ ਓਵਰਲੋਡਿਡ ਵਾਹਨਾਂ ਕਾਰਨ ਇਲਾਕੇ ਦੀਆਂ ਸੜਕਾਂ ਜਿੱਥੇ ਟੁੱਟ ਰਹੀਆਂ ਹਨ ਉਥੇ ਬਿਨਾਂ ਢੱਕੇ ਇਹਨਾਂ ਵਾਹਨਾਂ ਵਿੱਚੋਂ ਉਡ ਰਿਹਾ ਰੇਤਾ ਦੋਪਹੀਆ ਵਾਹਨ ਚਾਲਕਾਂ ਦੀਆਂ ਅੱਖਾਂ ਵਿੱਚ ਪੈ ਕੇ ਹਾਦਸਿਆਂ ਦਾ ਕਾਰਨ ਬਣਦਾ ਹੈ। ਜੰਡਿਆਲਾ ਜਲੰਧਰ ਰੋਡ ਤੇ ਬਣ ਰਹੀ ਸੜਕ ਵੀ ਓਵਰਲੋਡਿਡ ਵਾਹਨਾਂ ਕਾਰਨ ਕਈ ਜਗ੍ਹਾ ਨਾਲੋਂ ਨਾਲ ਟੁੱਟ ਰਹੀ ਵੀ ਦੇਖੀ ਜਾ ਸਕਦੀ ਹੈ। ਫਗਵਾੜਾ ਜਾਣ ਵਾਲੇ ਮੋੜ ਤੇ ਸੜਕ ਵਿਚਕਾਰ ਪਿਆ ਡੂੰਘਾ ਟੋਆ ਵੀ ਇਸ ਗੱਲ ਦੀ ਸ਼ਾਹਦੀ ਭਰਦਾ ਹੈ।
