ਮਾਨਸਾ 'ਚ ਬਣ ਰਹੇ ਅੰਡਰ ਬਿ੍ਜ ਕੋਲੋਂ ਲੰਘਦਾ ਰਜਵਾਹਾ ਅਚਾਨਕ ਟੁੱਟਿਆ <br/>

ਮਾਨਸਾ, 3 ਮਈ (ਧਾਲੀਵਾਲ)- ਸਥਾਨਕ ਸ਼ਹਿਰ ਦੇ ਚਕੇਰੀਆਂ ਰੋਡ ਫਾਟਕ 'ਤੇ ਬਣ ਰਹੇ ਅੰਡਰ ਬਿ੍ਜ ਕੋਲੋਂ ਲੰਘਦਾ ਰਜਵਾਹਾ ਅਚਾਨਕ ਟੁੱਟ ਗਿਆ | ਬਿ੍ਜ ਪਾਣੀ ਦੇ ਨਾਲ ਨੱਕੋ-ਨੱਕ ਭਰ ਗਿਆ ਤੇ ਕੰਮ ਕਰ ਰਹੀ ਪੋਕਲੇਨ ਮਸ਼ੀਨ ਵੀ ਡੁੱਬ ਗਈ | ਜਾਣਕਾਰੀ ਅਨੁਸਾਰ ਪਾੜ 30 ਫੁੱਟ ਦੇ ਕਰੀਬ ਹੈ | ਇਹ ਬਿ੍ਜ 20 ਫੁੱਟ ਡੂੰਘਾ ਪੁੱਟਿਆ ਸੀ | ਰਜਵਾਹੇ ਦੀ ਦਰਾਰ ਡਿੱਗਣ ਕਾਰਨ ਇਕਦਮ ਬਿ੍ਜ 'ਚ ਪੈਣਾ ਸ਼ੁਰੂ ਹੋ ਗਿਆ ਅਤੇ ਪਾੜ ਵੱਡਾ ਹੋ ਗਿਆ | ਮਜ਼ਦੂਰਾਂ ਨੇ ਭੱਜ ਕੇ ਆਪਣੀ ਜਾਨ ਬਚਾਈ ਹੈ | ਕਿਸਾਨ ਬਲਵਿੰਦਰ ਸਿੰਘ ਮਾਨ, ਦਰਸ਼ਨ ਸਿੰਘ ਤੇ ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ ਰਜਵਾਹੇ 'ਚ ਬੱਚੇ ਵੀ ਨਹਾ ਰਹੇ ਸਨ | ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਪਾਣੀ ਨੂੰ ਨਹੀਂ ਰੋਕਿਆ ਜਾ ਸਕਦਾ ਉਦੋਂ ਤੱਕ ਕੁਝ ਨਹੀਂ ਕਿਹਾ ਜਾ ਸਕਦਾ ਕਿ ਕੀ ਨੁਕਸਾਨ ਹੋਇਆ ਹੈ | ਉਨ੍ਹਾਂ ਦੱਸਿਆ ਕਿ ਨਹਿਰੀ ਵਿਭਾਗ ਨੂੰ ਪਾਣੀ ਬੰਦ ਕਰਵਾਉਣ ਲਈ ਸੂਚਿਤ ਕਰ ਦਿੱਤਾ ਗਿਆ ਹੈ |